lunedì 26 marzo 2012

ecuilibriu


















Ecuilibriu…

De totu sas galanas turturellas
chi  ‘olan in sa mente mia,
bator  ritenzo sian pius bellas
e  las isterro  in  sa poesia.
Comente criadura in sas novellas
prima  l’isculto in sa fantasia,
pustis  in versos eo las ripito
comente  siat meu su ch’ apito

De sa natura impito sos colores:
s’abba, su chelu  e tota sa campagna,
ammiro  de su mare sos umores
siat a reposu o cando ‘ogat sagna.
Sos   alvures, piantas  e  fiores
tenzo in coro a fidele cumpagna,
su  sole.. e de notte sas istellas
paren de  luna, suas menestrellas

Ater’ idea  dae semper amada
est su logu ‘ue   so     naschidu,
cando  la ido a sa  rientrada
da’ Oliteta de sedd’ in s’aidu.
M’ aparit sa  ‘idda  de  Patada
comente  su disizu ch’ ap’ estidu,
ammancu de onz’  impedimentu
 a  fac’ e orizzonte  e car’ a bentu.

In custu mundu  totu fioridu
tio  cherrer  s’omine acuntentare,
tot’ uguales  sun in coloridu
sas lacanas nde tio totu ‘etare.
Sos de aculzu  de sambene a  su gridu
pro narrer  totu los chelzo amare,
semus  de sa natura fruidores
siat in gosu, penas  o dolores  .

A subr’ e totu   de custu criadu
b’est sa  Forza  Manna  giudichende,
comente  l’at  Isse  disignadu
tiat cherrer  de l’ ider andende.
In fide a nois l’at cussignadu
errore chi nos est peldonende,
difatis  onz’ intantu ponet manu
a dannu ch’ enit fatu dae s’umanu.




Nessun commento:

Posta un commento