… ‘ue sa bestia est menz’ e cristianu
Si custu est su mundu chi vivimus
menzus chi fogu nos che leet totu,
niune nd’ est a mancu ca est notu
finas si unu prammu no bidimus.
Atreche crisi ..semus mortos e totu,
semus ienas chi totu consumimus,
ma de mal’ e sa terra chi l’ischimus
faghimus finta de no l’aer connotu.
Ponimus fatu a sos canes d’isterzu
chi naran “ sa vida est sempre gai”,
chie no l’azetat passat sos guai
e finit in furcazos a s’irferzu.
Santos no b’ at pro chie no at ‘idu mai
lugh’ e su sole in su mundu terzu,
Deus meu aite, as fatu cust’ ischerzu
de permitter un’ ilferru diai.
No b’at isetu de frimmare sa fine
de dies chi naschen su manzanu,
s’umanidade at leadu pianu
sa vid’ a giogu e a seriu macchine.
Mente malaida in su corpus sanu
atatu ‘e avididade est s’omine,
penso chi tando pius nudda cumbine
‘ue sa bestia est menz’ e cristianu.
Nessun commento:
Posta un commento