frigur' e mente... corpus immaculada

Frigur’ e mente..corpus immaculada

De Venere s’immagine ses tue

dea de sa bellesa  incantadora,

sas  frommas  tuas giompen a ‘ue

nues  e  bentos nde faghen  dimora.

Sos  chi ti braman  abbaidan a cue

chena mover sos ojos tota s’ora,

tota sa zente nde restat incantada

de una bellesa  ida e no toccada.

Chena cunfines e chena tempus zertu
est sa bellesa chi  natura t' at dadu,
a tie dea   t'at  fatu   pro inzertu
chie t'at post' in terra et inventadu.
In grascia manna e chin su cor' abbertu
su casu singulare  t' at donadu,
chi onz' essere vivente  in passizada
t' abbaidet a sa cua, sa caminada.

Totu torran  in pagh’ e armonia

sos sentimentos  chi  moven  sa mente,

nde faghen cantu  e bella poesia

de sa natura menzus ispediente.

Passas lezera   e s’abberit sa via

pro intrar’ in su coro de sa zente,

ses  cuss’ incantu dae tot’ isetada

frigur  ‘e mente , corpus immaculada.