‘entos de travuntana…
Patada , de su passad’ ammentu
chie de te nde faghet mestieri,
atere olat in conca su penseri
chilchende antigos sonos in su ‘entu.
De vida sempr’ istada cossizeri
a tie in sa mirada sempr’ atentu,
chilco in tegus sa frina ‘e sa calura
cando su fritu intro ‘e coro addurat.
‘Entos de travuntana e de Caddura
ispintos dae sas chimas de Limbara,
intran in Baidu e atin sa friscura
dae sant’ Ainzu in su Soziu s’imbarat.
In cust’ ijerru fritu, meda durat
ilfritende sas manos, pes e cara,
ma su foghile b’est in su cuzolu:
pro me calura e de coro cossolu.
Sas rimas fatas pro ti decantare
aggiunghen pagu a su chi ses istada,
dae su chi ses, sempr’ ap’ a leare
sa forza pro sas alas in pesada.
De cuss’ ispinta chi mi faghet ‘olare
pro t’ider dae altu reposada,
dae subr’ e sedda falan sos terighinos
che lagrimas ch’ ilfunden ojos mios..
Nessun commento:
Posta un commento