colores

Colores….

Una dimanda como a bois fato

“ischides cantos sun sos colores?”

Arcubalenu  in  sardu  si l’agato

Cherzo pintare in cuadru fiores

Innant' in limb’ istranza bo lu fato

Bois  mi curregides sos errores

Entando como cominz’ a pintare

A bois pedo  ammie de ajuare:

nademi bois  si  in di’e fitianu

estides sa camija bianca o cana?

Su color’ e su sole su manzanu

Est giallu, o puru grogu  chei sa lana?

Cando s’amigu m’istringhet sa manu

Su coro ruju  diventat a sa gana

Alcio sos ojos a su chelu apitu

ido a   isse  azurru  e biaitu

De murinu su grigiu  at ‘estidu

S’ aminu  de sa zente ammudinada

Buju  opacu  su putu  l’apo idu

De abba  tota canta bulluzada

Irde  s’ ispera  verde su sentidu

Niedda che sa pedra affumigada

Su caddu aju, multinu o murru

Che tintieddu in sa  ‘ucc’ e furru.