- Giuseppe Pintore
Semus che pilastros baluardos
in su nostru andare peregrinu,
ma custu lu es su duru destinu
chi toccadu est'a tanto sardos.
E ancora lu semus in caminu
chen'arrivare a sos traguardos.
Isperande dies pius luminosas
de salude paghe e pius gioiosas.
circa un'ora fa · ·
1 
Lussorio Cambiganu
Tantos pispinzos chi enin a sa mente
Chilcamus de los poder frimmare
Abbias lu faghimus frecuente
In palas d’atere totu de ch’ etare
Invetze de fagher divesciamente
Onzunu sas peleas d’atzetare
Chena isperiare mal’ e chie si sia
Totu si podet ponner in poesia
circa un'ora fa · · 1
Giuseppe Pintore
Sa poesia ischis est'unu jogu
chi faghe sa vida pius lizera.
Proite si cantada in donni logu
siat a manzanu o siat a sera.
Abboltas es de lamenta o isfogu
pero chena pelde mai s'ispera.
Cantu amos in s'intimu e su coro
in poesia s'esprimit a cifras d'oro.
circa un'ora fa · · 1
Lussorio Cambiganu
A sa mantess’ altesa viagiamus
cando sa musa ‘ona nos sustenet
lezeros in aeras nos pesamus
no b’at dimoniu chi a nois tenet
in su sens’ e sa vida poi intramus
dendeli cuss’ importu ch’ issa cheret
rimas de musas chi falan d’elicona
nos faghen bider sa vida pius bona.
circa un'ora fa · · 1
Giuseppe Pintore
Cando faghimos pindaricos bolos
su versu ja si trazat vagabundu
e nde tenimos paritzos consolos
cando prenetad'in su profundu
a un'ala lassamos sos oriolos
tocamos i segrettos de su mundu
ca s'ispiridu cando bolat lizeru
pare ca isvelat donni misteru.
58 minuti fa · · 1
Lussorio Cambiganu
Beru Pintore su chi naras tue
Est custu un’ arcanu profundu
Fin’ eo cando pig’ a cue
paret de gigher in manu su mundu
onzi pelea dae palas mi fue
e fat’ inghirios mannos a girutundu
sa fantasia misciada a bona vena
mi rendet mente et amina piena
52 minuti fa · · 1
Giuseppe Pintore
Chi la faghimos sa musas domas
casu istranu s'abberi s'intelletu
chi andamos a tirare sa sommas
bidimos su giustu cun s difetu
in'atera persona ti trasformas
ca su mundu ides totu cumpletu
e cosas chi mancu t'imaginaias
nd'essini a campu in sas poesias.
47 minuti fa · · 1
Lussorio Cambiganu
De custu nos podimus consolare
In tempos de ranchida congiuntura
Forzis nos dat su mod’ e isperare
Chi pessat bene in nois madre natura
Oburu solu pro cummiserare
Su fagher malu che tolta criadura
Pro poder narrer ness’ in poesia
Su chi cuat falz’ e ipocrisia.
39 minuti fa · · 1
Giuseppe Pintore
Iscas cando nde peso unu fiore
mi paret pius bellu su giardinu.
Ca mi paret chi de cussu sinu
apo sutu sa vena de s'amore.
Tzeltu c'abotas be su dolore
chi nos'atopa semper'in caminu.
Ma su giardinu mantenzo in trona
mancari b'at elva mala cun elva ona.
34 minuti fa · · 1
Lussorio Cambiganu
Sa poesia no faghet diferentzia
Tra ratzas, riccos, perunu colore
De aminu ogat suferentzia
Illezerigat totu su dolore
Chircat solu in mente cumpetentzia
Chi diat a su versu calore
Comente braja e fiam’ a su fogu
Chi iscaldit a totu su logu.
Giuseppe Pintore
Sa poesia e semper pitoresca
sa chi abbelli totu su creadu
dae tempos antigos an cantadu
esserat profunda opuru fiabesca
osselva tue sa cantada dantesca
cantu a su versu onore a dadu
cumpostu ana sa bellas cantone
tasso omero cun vigilio marrone
Lussorio Cambiganu
De una paraula it’ est su valore
Segundu te si podet achistare?
Naran zertos chi in su garegiare
Su menzus est su prim’ inchidore
No mi cunvinchet custu valutare
Mi paret de mercante bendidore
Pro me sa poesia est talentu
Chena padronu andat chei su ‘entu.
Giuseppe Pintore
be so deo de acoldu cun tue
pro cussu so istadu contrariu
s'istadu de s'animu intra cue
de lu premiare no es netzessariu
invitadu man'a cuncursu variu
ma sempere l'apo potidu fue
proite su versu chi tenet valore
non cheret incomios ma s' onore.
Lussorio Cambiganu
Como chi I’ amus de laru incoronada
Dendeli grascias chin nois generosa
Ennida s’est s’ ora e s’acabada
Ca ‘ a fine enit sempre onzi cosa
Etando ti auguro bon’ ustada
Muntene sa ‘oghe melodiosa
Ebbai siat a sero o manzanada
Riprendimus impare sa cantada
Giuseppe Pintore
Si che la finis como fino coitu
e ti ringrazio de sa cumpagnia
sempre bellu est'in poesia
de poder cantare in donni situ
istadi in paghe e in allegria
e prandedi cun bon'apititu
deo so sempre innoghe ispero
cun tue de cantare manzanu e sero.
Nessun commento:
Posta un commento