A tiu Anghelu Carboni.
Salude e bona die ti’Angheleddu
mancari virtuale no at’a cre,
cale onore mannu cun foste
de poder’ cambiare unu faeddu.
A lu faghed’in arte poesiana
ischinde ca no est’arte mia,
ispero custas pumas de poesia
un’iscuta de recreu li dana.
Aboltas mi ponzo in cust’impreu
peroe camino a bascia fronte,
timinde a bintrare in su rodeu
no soe Pindaru ne Anacreonte.
Gia l’ischit ca bi olet arte e cura
pro cantu poto mi leo s’obrigu,
pungo sa musa e li pedo azigu
calchi versu pero sen’impostura.
Bias tantas mi trattana ene
calchi bisita mia puru amittini,
de m’acurtziare a s’Ippocrene
de trubulare s’abba non permitini.
Gai cun issas che colo sa die
isperantzosu mi dana sa manu,
cando angustiadu cando rie rie
che umile peregrinu ch’es luntanu.
Ma mi elza foste calchi nova
li fato sa pregunta fora male,
proite sutapostu a dura pova
chi lu siat serenu est’essentziale.
Po su liberu ch’in donu m’a fatu
a brincos pesadu mi e su coro,
lu tenzo cunservadu che tesoro
apretziadu l’apo e li soe gratu.
Cando chi leadu l’apo in manu
unu minutu non podia resessere,
s’insostenibile lizeresa de s’essere
fia lezinde cale casu istranu.
Apo nadu pascescia tene Kundera
non benzo mancu a s’impignu,
ma custa est istoria reale e vera
de lu legire como es pius dignu.
Cominzo s’inguaribile vagabundu
canta fortza de animu ite podere,
de voluntade detzisu fin’a fundu
de su pessu a si nde faghe mere.
Mi so postu a cunfrontu ilgonzosu
chi falada mi nde sunu sa lagrima,
cale zigante ite persona frima
dominante in su patire maestosu.
Foste a mie ti’Angheleddu
m’a dadu una letzione de vida,
paret chi deus l’a postu a guida
ca coloridu ide cantu es nieddu.
In s’andala de custa vida terrena
non bi noto un’iscuta e tzedimentu,
semper’a un’ala lassa sa pena
si mustrat serenu in su patimentu.
Godit e assaborat cuddas cosas
chi unu die faghiat curre curre,
e mustrat a donn’omine c’ocurre
sa simples armonias chi si gosa.
Foste ti’Angheleddu oe es custu
un’eroe tra tanto mannos eroes,
pro cantu su destinu l’at’infustu
donni die nd‘es dende sos proes.
Anghelu de lumene e de fatos
custas sunu sa giustas peraulas,
ateros che a mie li sunu gratos
sentimentu e sincheru sena faulas.
T’ia cherrer de no esser’atesu
pro l’istare vicinu nessi un’aizu,
ma chi no bada intopos in mesu
mi l’apo apagare su disizu.
Tene su donu cun pagos atzinnos
de narre cosas c’ateru no nada,
proite in mente tene so disinnos
paret chi sa columba bi es falada.
Solu cun sa mirada isfogada
su vulcanu de fortza ismisurada,
amorosu afetu retzit e dada
e ue bes su bisonzu consolada.
Custu bive sou est’esemplare
mustrat sa fortza e sa voluntade,
sa virtude sa gloria s’umanidade
mai in sa vida de s’abandonare.
Como, li leo s’ifadu ca so ifadosu
cun custa musa mia iscalabrada,
ma ca es bonu e pascesciosu
ispero nessi l’epat’agradada.
Ispero ancora chi unu sorrisu
li diat cust’umile musa mia,
chi de consolu un’iscuta li sia
gai in coro mi lu tenzo intzisu.
Ite narre li poto ti Angheleddu
de tanta amistade a coro in manu,
grascias a Lussoriu Cambigianu
de tantu onore mi leo su cappeddu.
Virtuale trazadu amos su ponte
m’est’onore so fieru e cuntentu,
un’abbratzu de s’olimpicu monte
l’imbio a punta de gennargentu;
De igue lu lea zefiru delicadu
a s’orija li narat in d’unu susurru
de Pintore su saludu est arrivadu
imbiadu de coro caldu che furru.
S'anima.
In su frenetigu ambiente terrenu
ue paret su fisicu suferente,
bias tantas nos ch'essit de mente
de s'anima sa fortza e s'alenu.
Naran tzeltos chi siat gai potente
ocultada sena limide ne frenu,
abboghinat cando chi es silente
e muda es cando be su serenu.
Poi mortu s'imboligu chi at susu,
libera torrat a ue es bennida,
de su corpus mortale no faghet usu,
ma torrat de nou in atera vida,
pro si purificare de piusu,
finas chi Deus la tene remunida.
Cun afettu amistade e simpatia
un’abbratzu mannu a menzus intendere.
peppe pintore.
Nessun commento:
Posta un commento