una dimanda...

Una dimanda…

Una dimanda alu chena risposta

tio cherrer  a su mundu  pedire,

“aite  no s’ intendet sa proposta

de viver  in sa paghe,  chelz’ ischire?”

Dae sempre  s’omine  si l’at posta

eppuru  no si cheret impedire,

chi  a lacanas tra vida e sa morte

cumandet dae  sempre su pius forte.

Uman’ ispiru paret  dezisu

dae sos males chi nostru Segnore,

at nadu “no b’at logu in paradisu

pro riccos e chie no  dat amore”

Issos si lean su mundu a risu

e pienan  sas domos de dolore,

dezidin  de sos populos sa sorte

pienende de sambene sa corte.

Cust’ est  populu chi si faghet ‘antu

de aer  frades  de ratza  minore,

chi no potan istar’ a s’agguantu

lu  dimustrat   de pedde su colore.

“Eo  fizu ‘e Cesaru  so santu,

tue  de me ses solu servidore,

ses  naschidu tortu  che a jau,

ebbai  ti che moris de isciau”.

Cant’ est torta  dae sa veridade

s’idea  ch’ in vida est inchidora,

de aer  totu sa felicidade

furende  a su prossimu dimora.

No b’at mediu  a cuss’ unidade

chi nos dat  sinzera:  “in bonora”.

Forzis peroe  no amus pius su bulzu

pro frimmare sa fine ch’ est aculzu.