disperadu

Disperadu..

Chie  restat solu in  disisperu

no at disizos  ne paghe intr’ e coro,

totu s’amore  e  onzi tesoro

lassat  sa  vida..chena rejone aberu.

Su boidu  e su nudda  sun  issoro

chi lean su logu in conca arreu-arreu,

totu  sos melmos  dae pes a sa cabita

faghene  paju  chin  sa conca cuntrita.

Idende solu nues  pigurinas

finas  in dies  d’istiu  e in s’ eranu,

pessat  chi totu  in malas fainas

che ‘oltet  su  destinu galanu.

Dae una tup ‘e rosa, sas ispinas

nde coglit, pessende siat vanu:

onzi   sabore, colore o sentimentu

bi  che lu leat  sa prima frin’e  ‘entu.

Est  alleadu  chin  fraziga tristura

e  chin sas umbras  de ‘oltada ‘e die,

illongan sos penseris  chena cura

e timene sas festas rie-rie.

Fuin a giogos  chi sa  criadura  

faghet  intender  a isse inie,

ebbai   cando tempus est finidu

mandat su mundu  cuddae arrajolidu.