rosa

De rosas bellas…


De rosas bellas meda nd’ apo idu
mai  profumadas che a tie,
semper allegra e frisca donzi die
torras a mie  che   rundine a su nidu.
Tue chi ses lezera che  nie 
mi naras cosas chi no ap’ ischidu,
immagines chi essin dae sentidu
e faghen fiorire fin a mie.

Rosa. ses tue  fiore galanu
cale  siat chi t' estat  su  colore,
siat a sero o puru a manzanu
pienas donzi logu de amore.
Cando ti coglio in prammu 'e manu
paret chi a corpus dias calore,
rosa ses tue fiore de abbare
ca sempre frisca deves restare.

Rosa ses tue lughe in sa mirada
de sos giardinos e su log’ areste,
sa meravitza ‘e totu disizada
in donzi festa ses sa menzus beste.
Cando su sole faghet s’acerada
chilcat a tie e narat “’u’ este?”,
“cussu bellu fiore profumadu
chi pienat de gosu su criadu.”

Rosa mi das su chi mai niune
resessit a mi dare generosu,
trunchende sas cadenas e sa fune
chi ligat donzi fagher donosu.
De ‘elosias no nde ses immune
ma tot’ adoran su tou reposu,
sos ateros fiores de giardinu
ti faghen su sorrisu e s’inchinu.

Rosa ses tue e no bi nd’ at mancuna
chi potat a tie simizare,
totu l’as apo bidas una-una
bellas si,.., ma no ‘e paragonare,
Cussos colores dados dae sa luna
paren fatos aposta a t’adornare,
rosa .. cando su sole est bessidu
custu manzanu in coro t’apo idu.