betzu

bezos

It’est’ chin’incantat ‘e sabia bellesa?

Forzis  cuss’arva cana chi l’adornat

oburu  de sa vida sa etzesa?

Eo naro chi onzi cosa li donat

ca est  s’istoria  de s’uman’  impresa

chi su destinu  at fatu cominzare

chen’ aer  diritu  ‘emmancu pretesa.

Ojos istrintos pro alluzinare

nde coglin  dae terra sos ammentos,

poi los torran a ilboidare

chilchend’ inie de los render cuntentos,

dende motivu a s’issoro bividu

sighende sempre  bonos argumentos,

abias  lenu ateros atrividu

bias  tortas e dritas in caminu.

De totu su ch’ at fatu e su ch’ at bidu

li torrat a sa mente , mischinu..

e narat: “cussos   fin ateror tempos

no che a como  chi so tot’ un unchinu”.

Tando briosos currian cuntentos

sos penseris e sonnios  bolende,

chena  pispinzos e chena pessamentos

‘che intraio in s’aera gioghende.

“Cal’ est  como su post’ in sa terra

pro me chi no so pius tribagliende,

in d’ unu mundu totu a cuntierra

‘ue  sa presse est unicu valore

e a su bisonzu sa janna si serra”?

Pro me,  tue arvi canu ses s’unore

de su  passadu, sincras e su presente

m’abizo chi si lenit  su dolore

solu idende tegus penitente.

De sos males  chi pienan su mundu

ti rendes contu  su dannu chi sa zente

faghet pro nudda o che falar’ a fundu

impare  a su creadu ch’ at connotu.

Onzi cosa chi ti girat in tundu

est  pinzu chi a tie est sempre notu

ma solu como faghes sa dimanda:

“tue chie ses ? presentadi 'e botu”.

Vida  fat’ e su logu, sempr’ in randa

no ti connosco mancu in logu meu,

currende,  tot’ apo postu a banda:

su tempus bonu, s’alenu  e su recreu.

Si nd’est andadu, che bolos de atunzu,

che rundines  chi lean  ater’ impreu.

Totu mi ch’ est fuidu dae punzu

como iseto  a tie.. in manu ‘e Deu.