dae sempre...

Dae sempre…

Su ‘entu, s’abba  donat  sa natura

de frommas  chi  ispantan sa mirada,

cando  sa man’ e s’ omine   ‘oltada

no  la percossat  e sa bellesa furat.

Gai sos montes, sas addes de Patada

sun dae sempre  museu  in abbeltura,

chi a s’indonu  pro totu sun sa cura

pro su disizu  ‘e s’anim’ agatada.

Custa fortuna  in grascias  est falada

pedende   solu  dae coros calura,

chie bi   ponet  passos  o b’addurat

pro  tempus  de li dar’ iscampiada.

Comente  sa bellesa  pius pura

no  at bisonzu d’esser caratzada,

bastat  de la leare a s’abbrazada

cand’ at bisonzu  e sentit paura.

In tempos malos,  l’ap’ ida s’iscura

patende  sorte mal’ ilfortunada,

fogos  e zapos   l' aian triulada

fat’ in  piantos  e niedda  che mura.

Cando la ido  dae ‘Unne a sa Jura

mi paret de la gighere  cuada,

intr’ e su coro dae  sempre disizada

alu la gito ..e  sempre  dat gosura.