Su riu iscasciadu
Sos rios paren chi sian ‘essende
dae sa cascia ‘ue an sempre cultu,
niune si nd’ est preocupende
in sonnios paret totu fatu a sultu.
Sa zente zega sola trampulende
de isperantzias chi ana totu multu,
unu destinu paret signadu
in custu mundu male disignadu.
Mancados sun isetos in sa terra
de paghe, cunvivenztias ziviles,
no b’at pius medi’ a sa gherra
a sos istintos de vida pius viles:
s’inari, su podere in cuntierra
intradu est chin ‘iru in sos gianniles
de ‘onzi domo in totu su mundu
‘ue curret animu vagabundu.
Omines toltos , chi pessan illusos
d’ esser sos meres finas de su chelu,
no iden chi dae sos malos usos
fin’ issos restan in ragas de telu.
Tropu sos riccos, tropu sos abusos
chi s’an lead’ a risu ‘onzi zelu,
como chilcan de frimmare un’ riu
ch’ at iscasciadu onzi fagher sabiu.
Nessun commento:
Posta un commento