ite pecadu..

Ite pecadu…

Proite  no s’intenden sas  campanas

chi  zoccan  a  cuss’ ora su manzanu?

Folzis  in s’ighinadu lamentadas

si sun,  ca  las cherian  pius pianu.

Mentes  sonnidas  e ma’ ischidadas

dae su sonnu  fungutu  soberanu,

andende cuntr’ a bentu e  mala sorte

ispinghende sa limba  vesso morte

Como  pagu t’intendo, lebia  o forte

si no in coro meu zocheddende,

ateros sonos  giran in sa  in corte

onzunu s’est a tie ilmentighende.

Pro cantu eo ti giame e mi nd’ importe

atere  pes e manos sun prendende,

però de su chi naro nde so zertu

istonat  in Sardigna  su cunzertu.

Prima, de sonos  fit su mund’ abertu

 dae Caddura, sa Nurra  a Campidanu

finzas chi colpu ‘e grascia l’at infertu

s’ arrogu de limbazu italianu.

Nende chi fit  de su mund’  espertu,

imbeze Sardu  de ziviltade orfanu,

furat ch’ at su menzus tesoro

semper lughente in terr’ e  Logudoro.