cossizos d'amore (Paula Black (Nieddu) e Maria Pirisinu

cossizos d'amore

Paula---
Maria, deo lu tenz' a disizzu
de fagher cun tegus una cantada
si s'argumentu chi nd' 'ogo a pizzu
t'aggradat e ti sentis preparada,
no est unu tema de apostizzu
ca seria mi la cherz' onorada...
... sa sebera tra Amor' e Affettu,
a nde cantare preju e difettu...

Maria---
Su cuntentu a mie lu dias dare
e sos temas mi ponen a s' attenta
si seber' eo s' amore, so cuntenta
ca mi piaghet sentiment' a ricambiare
e si sos amantes si poden amare
si lean a brazett' e manu tenta
sighende paris in d' un avvenire
ispero deo pur' 'e b'arrivire

Paula---
Tando a mie toccat cun s'affettu
a trattare, ma nde so suddisfatta
anzis est su tema in sa cumbatta
pro mene preferidu e perfettu
chi ti naro no b'agatto difettu
ca ben'a su naturale m'addattat...
...chi no sento amor' e passione
app' aer prus pagu confusione...

Maria---
Comente si vivit senza s' amore?
Chi est de custa vida unu sensu
cando duos si aman a s' immensu
s' ismentigat sa pena e-i su dolore
in su coro cumparit s' isplendore
de unu sentimentu giustu e densu
si vivis a sola custa vida 
la faghes trista e cossumida

Paula---
Chie de su ver' affettu nd' est mere
no timet zertu d' abbarrare solu
anzis a pes l'arrivat su cussolu 
e dae milli partes che li feret
ca su sentidu lenu li cunferet
sovranidad' in dogni cor'a dolu...
...e tottus sos amantes los conchistat
ca no b'at passione chi los pistat...

Maria---
Deo naro chi sa passione est importante
e cando b' est s' amor' est un' ispantu
ca de sentimentos lughet e d' incantu
faghind' unu carignu prus costante
s' amore cun s' amor' est abbundante
nde velat d' allegria su piantu 
ma cant' est bellu custu sentimentu 
chi ponet su criad' a su cuntentu

Paula---
Beru est, e ti dao sa resone
ses tue in sa menzus zoventude
e-i s'amor' est sa 'ostra virtude
da' chi zovànos sezis a cumone,
ma deo passad' appo s'istajone
cor' e carena mi sunt fattos rudes...
... e tando de s'affettu m'accuntento
e no sigo che a bois sos bentos...

Maria---
No creo chi rude sias in coro.....
Pro poder dispensar' unu carignu
est importante e mannu custu signu
ca su 'e su cor' est unu tesoro
igue b' est s' amor' e su ristoro
e de miradas issu già nd' est dignu
ca cun abrazos dulches e suaves
che 'olan in secundu males graves

Paula---
Maria, ti nar' in sinzeridade
su contu de comment'andat sa vida
sena d'esser trista ne affligida
ca su sentidu jambat cun s'edade
s'amor'est una fiamma nodìda
pero' s'istudat lestr'in veridade...
...e de su fog'ardente zovanile
bi restat sol'affett'in su foghile...

Maria---
Su cunzettu de s' edade apo cumpresu
ma de s' amore connosches virtude
cando las passada sa tua gioventude
sos nuscos de s' amore as aer intesu
est sentimentu rar' e no pretesu
unu durche fogu cun sa lughe
ma poi chi passan longos annos
abbarran solu contos de sos mannos

Paula---
S'amor' 'e zelosia est cumpanzu
mi paret ch'est sentidu ballarinu
lu tenzas tropp'attesu o vizinu
de pasu nde cunzedit pag' 'alanzu
a bortas prus de carignu dat banzu
segundu a chie faghet s'inchinu...
... pro bell'azzunt'est puru permalosu
no che-i s'affettu calm' e donosu...

Maria---
est beru ch est presente sa zelosia
in d una zusta coppia innamorada
e ti naro,menzus cosa no b' ada
ca dimustrat de s' amore zusta via
unu sinzu de sa manna calorìa
chi in duos cheret narrer fortunada
si b' est s zelosia est sinzu bonu
ca de s amore b' at giustu sonu..

Paula---
Ite cheres chi nerza, fizza cara,
sa zelosia bisonzat midire
ca bastat un'istante pro faddire
sa mesura; cun su tempus l'imparas
chi a congruos nde podet sufrire
solu chie la provat fort' e giara...
...imbez' in s'affettu sa zelosia
no s'esistit, nemmanc' a mesania...

Maria---
Paola sa zelosia est interessu
e a sos dubbios rendet sa risposta
deo no connosc' 'e sintumu proposta 
ch' ispinghet sa pesson' a mal' eccessu
sa folzadur' est tosta che su gessu
a sas dimandas dubbiu l' apposta(t)
ma mal' est cando dubbiu no b' ada
e pro s' amante, s' est innamorada....

Paula---
Ch'innamorada ses ma no zelosa
tando ti podes narrer fortunada
peroe zelosu in carchi cosa
podet esser su chi t'at pro amada
e pustis già t'agattas menomada
in sa libertad' e fide digiosa...
...ca est s'amore dulze chi ti ligat
pero' chin sa zelosia si brigat...

Maria---
A inue sa nostra fantasia
ch' est arrivende in custu momentu
est bellu a nos fagher cumpagnia
sena ch' ettare faeddos a bentu
m' est agradessiu su dibbattimentu
improvisende sa nostra poesia
nos lu devimos imprimere a sa mente
ca custu est chi piaghet a sa zente

Paula---
Su cunfrontu no est mai perdìdu
cand'agattas cumpanz'in arrejonu
pro chi siat mezzan' opuru bonu 
prus d'iscuta t'abarrat imprimìdu,
massimamente cand'est colorìdu
de sanu grabu in su chistionu...
... Chin piaghere t'ammento Marìa,
salud' a tie e sa cumpanzia...

Lussorio Cambiganu 

D’amore sezis bois sa pregunta
Totue lu chilcades fin’ a sero
in arvescher de sole pro aggiunta
Idides su chi naro e in cor’ ispero
Est Cupidu chin friza bos dat punta
bos triulat su coro ‘ue m’acero
Cando dae cara ogades sa bisera
Totu bos sezis già soltas che chera

Paola Black 

Zeniale su trattu
e bundante sa vena
sas Noe t'ant coronad'a istolu;
che menzus ros'in rattu
as s'anima piena
de varias dotes chi dant cunsolu;
favella colorida
brios' e saborida
in dogni rima chi pesas a bolu...
...chin vera maestrìa
las pones in Alas de Poesìa...

Lussorio Cambiganu 

Alas de poesia
Mi faghen bolare
Ca apo med’ istima de natura
No est solu fantasia
Ma sa ‘oz’ e amare
Su mare, chelu e donzi criadura
Sas feminas diciosas
Sunu sas menzus cosas
Chi bisonzat de aer sempr’ in cura
Tue Paula Nieddu
In poesiea ses coro e faeddu

Manuel Deiana 

de amore azis fattu una cometa

...de s arcu istellare in sa punta..

.ca candu semusu in cussa vetta..

.sa passione pius manna est raggiunta

...e nn bin d at che atera presunta.

..modalidade pro arrivire a meta.

...s amore. s istella preferida..

.bos siada in donzi passu lughe e guida

Lussorio Cambiganu 

Maria Pirisinu
Nde faghes un’ istella
innoghe de sa sarda poesia
At core e sinu
E finzas rima bella
Paret ispera de noa zenia
Sa passione manna
La tremet che sa canna
Ischende chi in versos la poniat
Chin Mauel poete
Incras podet currer che coete-

Paola Black 

‎---
Como su coro meu
at noa una fiza
già l' ìes chin seru sighit s'ormìna;
e si lu cheret Deu
chin custa meraviza
sa sarda rima torrat cristallina
a sos antigos cantos, 
ca meritat sos bantos
de sos presentes e de sa madrina... 
...ca po prima m'onoro
d'aer connottu custa prend' 'e oro...