abba (Lussorio Cambiganu) , linna (Franziscu Masia) e pedra (Peppe Pintore)

abba (Lussorio Cambiganu) , linna  (Franziscu Masia) e pedra (Peppe Pintore)


Giuseppe Pintore

Fia penzende amigos poetas
ca donnunu cun sa musa si sinna,
lassadas las'amus tantu chietas
pare nos mirana cun mala ghinna.
Tando a s'abba sa pedra sa linna
cantamos chi cherides e lietas,
duas oras las passamos impare
su tantu de no l'as'irmentigare.
.

Lussorio Cambiganu

Ite cheres cantare tue pintore
In limba sarda o italiana
Siat gosu o siat dolore
Totu ponimus chin dea Diana
Cando leadu est dae s’ardore
S’ animu che ruet in tambullana
Totu paret fatu pro sa cazza
Siat sardu che atera razza


Giuseppe Pintore

Tue lussoriu ca lu ses dotu
mi ogas a campu versu bellu,
es solu unu poeticu duellu
chi de so mannos amus connotu.
Chi podia ia cantadu a modellu
ultres su sardu finas ostrogotu.
No bi ponimos idiomas in mesu
e cantamusu in logudoresu.


Lussorio Cambiganu

No ti fat dolu e ne pesu
Apo sa poesia preparadu
No tio cherrer chi tue offesu
Ti sentas si limb’ apo cambiadu
Est beru su menzus logudoresu
No at paris in su faeddadu
Però cust’ ia eo Cambiganu
L’apo iscritta in italianu


Giuseppe Pintore

cando su sentimentu de su coro
nde'essit esprimidu cun sa oghe,
so versos chi arrivane a innoghe
los tenzo cunservaos che tesoro.
peroe mai chelzo chisi joghe
cun so sentimentos ca m'addoloro
comente tzelto tipos de mistieris
chi mi parene mastros molenteris.


Lussorio Cambiganu

 S’iscuja fit de ti fagher annotu
Chi binu no as postu in sa gara
Ca totu cantu e onz’ abolotu
Ch’ essit cando s’idea est jara
Affutidinde de su chi est –es notu
No dies med’ impoltu a cussa cara
Fin’ oe ap’ idu b’aiat cuntierra
Narana paghe ma chilcana sa gherra.


Francesco Masia

 Custa orta fio s’osservadore
de custas ottavas galanas
cundidas dae peraulas sanas
appo fattu s’accoglidore
e a tie caru peppe Pintore
chi non las naras mai vanas
umpare a Rino Cambiganu
bos istringo poetica manu..


Francesco Masia

Fio aaccanta a la faghere in Italianu
pro fagher calcunu crebare
ma poi su meu sardu andare
mi c’ada gitu a sardu pius sanu
so de naschida un’isolanu
e calchi maccu mi che cheret bogare
ma os sardicu dae conca a poddighittu
e cuss’imbecille ndè restada apittu..


Lussorio Cambiganu

Cumposta s’est como sa pariglia
Dae Tula Franziscu est arrivadu
A sonos de violin’ e ischiglia
Sa cumpantzia com’ a cumpletadu
No amus a esser sa meraviglia
De palcu mai fattu e improvvisadu
Però a s’abba prefelzo su ‘inu
Ca est netare ‘onu e divinu


Giuseppe Pintore

 Es piaghere cando nos'incontramos
pro sighire su poeticu caminu
che frades bonos nos tratamos
difendinde su tema cun detterminu
Lussoruiu irmentigadu no apo su inu
ca si fimis a vivinu no lu bufamos
peroe no at a mancare s'ocasione
de li ponne conca a su cubone.

Franziscu no soe de mal'umore
antzis mi sento fieru e cuntentu,
ca no mi leo perunu turmentu
e dromo che criadura minore
in vida l'ischis de donni colore
sinde idet proite in aumentu
es s'ignoranzia de sa zente
chi de vida no an cumpresu niente


Francesco Masia

Emmo ti creo e ti pontzo mente
e leo in manu de oro pinna
de ruolu mi leo sa linna
pro essere in tema coerente
m’impitada in fogu sa tzente
pro s’iscaldire e cando si sinna
impitada in sos fogos inchissos
ma fintzas pro fagher crocifissos ..


Giuseppe Pintore

Tando apo deo ateru minerale
chi de sa linna e su pius duru,
peroe m'intendo siguru siguru
ca no mi la passo mancu male.
So prima deo de piantas e animale
e no so de leare a manch'incuru.
Duncas non creo chi t'ispantas
so prima de s'abba e sas piantas.


Francesco Masia

Tue de esser forte già ti antas
cà faghes parte de mundu materiale
deo chi benzo dae cussu vegetale
prima fio semene e poi piantas
de rampos mios sun pienas tottu cantas
e bos’iscaldo in tempus invernale
e servo a servidores e padrones
e dae me si faghene giannas e balcones..


Lussorio Cambiganu

 Si bene apo su tema legidu
A mie tiat toccare s’abba
De unorare est fazile sentidu
Ma como m’est obligu chi l’agabba
Ca pro impignu ‘oe apo finidu
De iscrier innoghe, su ch’agrabba
Ap’ a torrare innoghe cras manzanu
Pro sighire chin bois faeddu sanu.


Giuseppe Pintore

Cantu naras Franziscu bene assomo
ca de frua a pianta ti mezoras,
pero una cosa narre ti chelzo como
cando chi de fritu enini sas oras
de pedra s'omine si faghe sa domo
chi no es custrintu a si colcare foras
e chi l'agata tempus malu incue
tando no l'iscaldis mancu tue.


Francesco Masia

Cando su babbu mannu ada fattu creadu
b’ada posto arte e bona pasciescia
cà fid’ischidu e de bona cusciescia
a mie frisca e sicca m’ad’inventadu
isse milli maneras e frommas m’a dadu
e so in razzas meda de marcas e divescia
e sas mentzus linnas arestes e montagninas
sun cussas chi ciughene rampos fortes e ispinas ..


Lussorio Cambiganu

 ‘ue si siat chi cherides parare
Nudda podides fagher in sa gara
Intro ‘e s’abba imparad’ a nadare
Azis in matta ‘e mama ‘ostra cara
Sa linna chena s’abba pro l’abbare
Tiat esser cosa meda rara
Ei sa pedra chen’ abba pro impastu
No tiat ligare tra issa, e restat crastu.


Giuseppe Pintore

 Ma lussoriu attenzione faghe
ti consizo de bi riflete bene
s'abba isco su valore sou tene
cando chi beste si bivet in paghe
ma chi osselvas su saldu nuraghe
opuru a s'agropoli in atene
a monumentu lu ides piantadu
peroe abba no nd'an'impitadu.


Francesco Masia

 Impito fintzas s’abba a m’attatare
l’accoglio in terrinu e raighinas
cando sun pius arestes sas ispinas
senza cussa mi poto fintzas siccare
ma cun s’ossigenu in s’aera la lasso andare
e poi torrada a falare in rios e chinas
si non fin’istados buscos a serbatoriu
bos caiana acciappadu tottu in tzimitoriu...


Lussorio Cambiganu

A sos ispijos devides ataccare
Sas ungias pro muntennere s’unore
A sa palte chi azis a parare
Chilchende de li dare unu colore
Eo no apo bisonzu de istare
Aboighende e fatende rumore
L’ischini totu it’ est sa funt’ e vida
“o forzis bois no l’azis mai ischida?”


Giuseppe Pintore

Tzeltamente s'abba no faghe male
siat moddina temporada o fiocas
e franziscu in su regnu vegetale
es tra piantas maduras e picocas
ma bi so deo forte cun sa rocas
lussoriu ti lu frimo su canale
tando mi fato s'abba tua amiga
proite che la serro intro sa diga.


Lussorio Cambiganu

S’abba già l’ischis, no la podes frimmare
Ca est sempre in riu curridore
Gai Eraclito su Socrate minore
Neit in “panta rei” filosofare
Si pones diga tue imbonidore
Issa la brincat cand’ at a pienare
Eppoi pessa a cantu su sole
Nde coglit dae inie cantu nde ‘olet.


Francesco Masia

Pro attraessare oceanos e mares
fatto canoas, pirogas e vaporettos
dono a su mundu pro cussu mentzus naes
fintzas pro faghere rodas e juales pro carrettos
como in su modernu mi faghene a brichettos
pro non bos bennere frittu e ne baes
e non est solu a bisontzos de Tula o Ardaule
chi servo a faghere cando bà morte su baule...


Francesco Masia

M’atatto de materias e liquidos
e mando allegria in sa tristura
a chie setzidu in foghile mando calura
e regalo consolu a sos poverittos
e mantenzo in familia tottu istrintos
cà emano bonos fiagos e bonura
e daghi segada abete bonu linnaiolu
a Nadale servo a s’omine de consolu....


Giuseppe Pintore

Anda a pianu caru Franziscu
no ti ch'essas che caddu curridore,
senza perda e terra ses in arriscu
non cresche ne pianta ne fiore
Lussoriu d'Eraclitu a s'onore
curret in terinu asciutu e friscu
dae eras antigas e moderna
totu passat solu deo so eterna.


Lussorio Cambiganu

Pro cantu podes essere eterna
Pedra ses sempre unu minerale
Comente sa pessona chi s’iberna
Ses frimma dae s’eternidade
E tue linna che unu pachiderma
Andas pianu si abba no li dade
Sol’ eo so criadura soberana
De natur’ elementu galana.


Francesco Masia

Caru tzuseppe nont’arrocches in rejione
si s’abba est pro sa vida fundamentale
sa linna no est poi elementu gai banale
e si sa pedra est materiale de costruzione
bisonzada de dare giustu pesu a sa questione
e de bidere obbiettivamente s’essentziale
de tottu ada bisontzu omine antigu e modernu
e grazie a mie iscriede in fogliu de liberu e quadernu...


Francesco Masia

 E tue Lussuriu faedda a boghe bascia
deo non t’appo dadu mai tortu
si s’abba consolada gardinu mortu
deo servo a carpentieri e mastruascia
dae me si faghede forte e robusta cascia
pro muntennere pane caldu e mai tostu
pro s’essere umanu balede de pius s’utilidade
e mi seberada cando so istajonada e de calidade..


Giuseppe Pintore

 De nou anda pianu t'imploro
Franziscu no les anda furiosa,
deo de sa pedra mi nde onoro
bi so in monumentu e in losa.
Es de me chi nde alanzas s'oro
si as diamante es pedra pretziosa.
chi de abba o linna es solamente
es gioiellu chi non bale niente.


Lussorio Cambiganu

Linna ses linna, no fates sas muinas
De me restas custrinta servidora
Umile pedi abba a raighinas
Cando su caldu occhit sa colora
E si su fogu ti brujat sa ispinas
A mie giamas che santa sarvadora
D’esser unica prenda ses illusa
Ateros materiales como s’usa.


Francesco Masia

Como chi setzis intrados in bon’ora
de bos rispondere appo tottu s’interessu
appo semper aggiuadu su progressu
e fatto parte de mediterranea flora
so de ambiente sanu mentzus fattora
e tottu su mundu m’ada in possessu
abbello logos, mando saludu e so utile
e non mi sento mai vana e né futile..


Giuseppe Pintore

Chi os'acaparrades su diritu
su tema no lu ogo fora de manu
s'abba chi si difende Cambigianu
de vida gia lu tene su meritu
sas colonnas de Bernini in vaticanu
ossevade e sas piramides d'egitu
cun s'obeliscu in mesu postu reu
a meraviza de su mundu intreu.


Lussorio Cambiganu

Su marmure ch’ est in Vaticanu
Ogadu l’an dae montes de Toscana
In tribulia essidu est pianu
Dae fungutu ‘e Alpe Apuana
Poi Bernini b’at postu sa manu
Pro cuss’ ammentu chi ancora b’ana
Ma pessa si sas abbas fini siccas
Comente a Roma las aian gitas?


Francesco Masia

Abbas chi erodini sas roccas
raighinas chi s’ingrassana a sas abbas
in su mundu fenomenos los’agattas
tue essere vivente la bides e la toccas
si ses biu in tottue las’imbroccas
cà su creadu a misura tua las a fattas
e siada,pedra,abba,linna o atteru elementu..
dae subra bene fattu est istadu cuss’inventu


Francesco Masia

E non lu nego e non fatto mala critica
Si est a beru chi s’abba mi faghet intrusciare
a cugnu so impittada pro l’ ispaccare
pedra vulcanica,marmorea e granitica
zedidi in cussu fintzas sa cumpatta trachitica
e iscultores poi la podene malleare
impitto s’abba e ndè so padronu
e a sa pedra li do fromma e fintzas tonu..


Lussorio Cambiganu

 Linna podias esser bella cosa
Pro ziminea o fatta a zimpone,
Ma si t’ilfundo cando ti reposa
In su linnalzu o fatta a carvone
Alese cantu zizia fiagosa
Chi pudit onzi logu ‘e su rione.
No l’as cumpresu dipendet da’ ammie
Sa vida tua la solvo che su nie.


Giuseppe Pintore

 Gia bo sezis postos de bona lena
chi guasi apo intesu so tzocos,
como attenzione prestade apena
c'a mie no criades assolocos
mira pro sas piramides so blocos
trazados che los'ana in sa rena
an'impiegadu sa frotza e sa zente
no bi fidi mancu s'abba currente.

Franziscu no andes brinca brinca
ca sa linna tua as de difendere
solu a issa valore deves rendere
ma tue ses faghinde sa moninca
abba o linna a cantu poto cumprendere
cheres deo apo sa pedra lorisinca
ches famada e faghet figura
in donni logu su granitu e gaddura.

Lussoriu tue cun s'abba jara
cres de ogare a pizu so modellos
Franziscu giuale taulas isgabellos
nde faghe puru de bellesa rara
Michelangelo su marmu de carrara
l'a modelladu cun sos iscalpellos
oberas de rara bellesa in veridade
che su davide cun sa piedade.


Francesco Masia

A tottu piaghede in foghile a s’aggroddare
de ijerru in mantzanadas zelidas e frittas
bene setzidos in cadreas de linna e banchittas
e bi so deo totta allumada a iscaldire e a consolare
pius so sicca e pius mi piaghede a brujare
e parede nudda ma dae semper tue m’impittas
e si b’ada iscetta de lardu dae ispidu infilada
itè ndè naras in familia de una bella arrustisciulada? ..


Lussorio Cambiganu

Tue de sambenadu ses pintore
e cheres gai difendere s’artista
No s’arte ‘e sambenadu o iscultore
Ma cussa pedra ogada e poi pista
S’abba bi cheret in s’arrodadore
Pro s’ata de sos pinzos chi achista
Poi t’ammento chi pro lu trasportare
Su marmur’ e carrara leat su mare.
Ammentadi chi meda in sa natura
Est abba siat in mare che in terra
Chen’ issa morit linna e pedra dura
Ca non servit in paghe ne in gherra
Issa che ogat dae corpus sa bruttura
E dae ‘ucca su sidis chi s’inserra
Pro difender sa pedra as pagu giogu
Finas chin iscultores de onzi logu.


Giuseppe Pintore

 Deo so dura e mi leo consolu
non timo abba ne fogu allutu
cando s'allumat in su fumajolu
sintende de su fumu su fiutu
sa roca lu coronat su erritzolu
e de issa dipende su murmutu
chi bos dada assulenu e armonia
ca est'incantu dulzura e poesia.


Francesco Masia

 Dae vulcanos erudentes mi so frommada
cando sas lavas falaina a trainos
appo pienadu territtorios e caminos
e pro seculos sutta terra sutterrada
poi s’omine m’ada leadu e impittada
pro serrare siada tancas che tirighinos
so dae milli minerale bene cumposta
e d’est pro cussu chi m’impreana cà so tosta..


Lussorio Cambiganu

Ambos parides a s’arranc-arranca
Che sos poetas chi cheren arrivare
A una domo chena peruna banca
‘ue no b’ at nudd’ e manigare.
In s’ Arnu, Dante sa limba che tanca
Pro issa dae bruttura samunare
Ebois alu chirchende in sa lotta
De poder fagher chin megus rebotta.


Giuseppe Pintore

Dante in s'arnu cantad'in poesia
sa cale a totus nos faghet iscola,
Franziscu cn sa linna si consola
cun sos alvures de onni zenia
amentadebos de pinucio sciola
chi la faghe catare sa pedra ia
sende issu de sa pedra artista
sa notas tots las ponet in pista.


Francesco Masia

 A lischides itè b’ada poi de bellu?
chi de frommas deo nd’appo a bulia
finzas Davide cando boccheidi a Golia
in cuss’impari e famosu rude duellu
fidi tres bias pius’altu de livellu
chi paffeidi a tottu impossibile sa pariglia
cà isparada dae un’umile frundighedda
fatteidi meda dannu cussa tunda pedrighedda..


Lussorio Cambiganu

Ancor’ insistis chin Pinucio sciola
In bidda at pesadu monumentos
Piat’ e poesia a pedr’ e mola
Che l’at bogad’ isse sos ammentos
Una funtan’ e trachite si cossola
De abba e de sonos de ‘entos
Sinduncas finas sonos e piatas
Chin s’aba e totu sun istadas fatas


Giuseppe Pintore

Franziscu ses beninde a contu meu
Davide cussa lota no l'a suferta
fortzis es ca gai a chelfidu deu
e sa conca a golia bi l'ad'aberta
Lussoriu no as fatu manna iscoberta
Sciola a serradu unu zassu intreu
in cussa funtana bella cunsidera
sa pedra a fatu s'abba presonera.


Francesco Masia

l’atzis presente sa pedra de imbuttire?
est s’iscartu pro bonu muradore
cando unu est tontu là leana a paragone
e de cussu niune mi podede mai ismentire
bos’informo cà lu devides tottu ischire
e bos la passo culturale edile informatzione
cà in passadu nd’appo impittadu deo puru
e pius de unu nd’appo pesadu de forte muru..


Manuel Deiana

M azis che sempre tentu riguardu
e m azis che sempre postu in contu
E oe mi cherzo a mustrare prontu
pro vantare custu camminu sardu
e ispero non mi contedas po tontu
si sò innoghe arrivadu in ritardu
ispero de non creare problema
si como benzo e dimando unu tema


Francesco Masia

Manuel ischis chi ses su ben’arrivadu
e sas discussiones sunu meda importantes
s’abba,sa pedra e sa linna sas traes portantes
e in tres custu tema cheriada affrontadu
si su capu (Tzuseppe)mi dada su mandadu
t’affidamus “sa terra” bastu chi non t’incantes
isperemus chi permissu bentzada intro de occannu
cà toccada a lu dare solu a su poeta mannu----


Lussorio Cambiganu

 De pedras apo idu moderinas
Sa linn’ ispesso a carvone e chejina
Como fin’occidente est in ruinas
Ligadu che sa linna a una fascina
A Manuel das sas terras pigurinas
Ma no balet mancu pro istrina.
Totu ripartit dae sa forza ‘e s’abba
Cheni issa menzus vida chi s’agabba.


Giuseppe Pintore

 Deo ancora e cantare tenzo gana
proite a sa musa soe fidele,
peroe chelzo narrer a Manuele
tene passenzia in custa gara galana
e non ti les ne fele ne mattana
mattana non ti lese e ne fele
ischis ca ses sempre su benennidu
ma lassa in ters su tema enzat finidu.


Francesco Masia

 E tando in paghe la riprendimus
cun su tema fattu solu a trese
non interessada cale ruolu lese
e in cussos elementos nos movimus
iscambiamus su chi nois cherimus
deo como leo pedra e bò l’iscudo a pese
bois duos iscambiadebos su tema
pro fagher de custa gara unu diadema..


Lussorio Cambiganu

Si la sighimus comente narat isse
Viagiu chena fine at a bessire
Anzis nos perdimus che Ulisse
Cando tropu at chelfid’ atrivire
S’abba sa manigadu a perisse
E pius connotu at potidu ischire
Etando eo cuvintu bo lu naro
Chi tema meu est forte e lu rincaro.


Giuseppe Pintore

 Lussoriu chi cun s'abba adduras
tando deo toca chi sa linna mi le,
Franziscu iscudet perda a su pe
ca ja nd'agata de meas mesuras
ma sas pertigas mias deves cre
cando sunu robustas e maduras
sunu onas pro oberas bonas e malas
proite pesantes falana in is palas.


Francesco Masia

 bos sò iscultende poberu de mè
e ispendo peraulas che mancias lautas
sun tottu e antigas sas mentzus istatuas
sa pius famosa est cussa de mosè
fatta dae iscultore cunsideradu su rè
fintzas si esistidu in eras infaustas
cando fidi finida colpu de marteddu l’iscudeidi
e pruite non faeddaiada li domandeidi...


Lussorio Cambiganu

Linna o pedra sezis in sa natura
Naschidas pro esser impitada
Dae s’omine chi inzegnu b’addura
Ma finas ‘e zente mal’ assortada
Linna a bias chi s’irferchidura
L’at lassada sola e ismuzzurada
Sa pedra como difende franziscu
Ma no lees tropu iss’ in arriscu


Giuseppe Pintore

chie a fortuna d'ennere a mundu
non benit pro oldine o pro brulla
ca es frutu de s'amore profundu
finze ss chi naschen dae s'ampulla
mama e babbu felice e giocundu
de linna li preparana sa culla
e totor duos istrintos coro a coro
a si fizu auguran sonnos de oro.


Francesco Masia

Caros mios isorvo tottu sos nodos
cando bos faeddo cun tzentilesa
pedra cun cimentu faghede presa
e sos muros bessini pius sodos
linna s’impitada pro li dare modos
e abba pro impastare in lestresa
ma su chi dada fortesa a muru bene armadu
est su crastu de riu bene frantumadu...


Lussorio Cambiganu

Caru Pintore sa culla o su laccu
No est pius de linna chi si usa
Dae tando mannu est s’istaccu
Ca plastica pro issa s’abusa
Inveze che a tando in gravidanza
Criadura in abba alu danza
Sa pedra no impito in fraigare
Ma idru, ferru pro mi carralzare


Giuseppe Pintore

No creas chi oe nd'epas consolu
cun s'abba tua non cantes osanna
Franziscu si faghet una omo manna
bive cue serenu senz'oriolu
ma penza sa bellesa de su balzolu
nannighende as cantadu sa ninna nanna
e in cussa amorosa e balla fiaba
fi fatu de linna non de granitu o abba.


Francesco Masia

 Si s’abba est de vida elementu essentziale
e sà linna materiale meda importante
dae pedra si faghede pilastru portante
lu narada de ingegneria su manuale
s’inventu dae antighidade pius geniale
impittada dae s’omine in costante
e siada modde o tosta cussa materia
cun mammaru e granitu si faghede cosa seria ..

Lussorio Cambiganu

Forzis su casu a mie at donadu
In custu casu una manna fortuna
Est elementu chi totu su criadu
At in su corpus chi leat a donzuna,
pessona, animale chi est nadu
dae s’abba no bi nd’ at mancuna
chi no s’ilfrischet da issa onzi die
sempre che dat olta a inie


Giuseppe Pintore

 Lussoriu sempre s'abba tua l'impites
gia l'isco chi no nde semus privos
Franzisu un'iscuta a bi reflites
ca sos penseris los tenes attivos
amentadi sos omines primitivos
chi custruidu ana sas palafites
sa prma costritzione geniale
pro si difende de sos animale.


Francesco Masia

 Cussa pius tosta servidi pro arrodare
su tufu pro faghere blocchettos e contones
sa trachite pro camineras e istradones
su mammaru pro tumbas adornare
s’ardesia lavagnas pro insegnare
su granitu pro pedriscias de balcones
semper gai est dae cando esistidi mundu
e s’omine l’ad’impitada semper in abbundu....


Lussorio Cambiganu

Como amigos de cantu in sa pinna
Proponzo a bois de nde la finire
Ischimus chi: abba, pedra e linna
Sunu totu uliles in su bivire
Abias iscrio rimas chi no atinna
Pro poder a bois rispunduire
Ma custu est su ch’ essit dae testa
Andat tot’ ene in clima ‘e festa.


Giuseppe Pintore

 s'aeres tue su tema jambadu
aimis cominzadu totu de zero
ma ca in s'abba ses adduradu
su tema enit finidu cunsidero
ma no soe pro cussu airadu
chi si sigat goi de coro ispero
b'aia pro sa linna un'enciclopedia
ma si cherides la faghimos finia.


Francesco Masia

Pedra e linna appo trattadu cun sustantzia
dendelis s’insoro veru valore
sentza differenza de calidade o colore
ma abbaidende solu a sa suatantzia
siada mobile camera o istantzia
cussos materiales si faghen onore
e pro las difendere mi so postu a sentinella
fintzas chi funzionada e mi girada bene sa rotella

Como amigos caros serro sa cartella
cà cust’argomentu est longu e non ada finitia
pro bos’abbratzare bos lasso s’ultima mia
ispero chi nd’essada rimada e sa pius bella
chi brillede in firmamentu che istella
est disitzu e volontade de Frantziscu Masia
pro la bidere in altu notte e die
in manera chi bos’ammentedes de a mie



Giuseppe Pintore

Fi totu pro che colare un'iscuta
e fatu l'amus egregiamente
bos ringrazio pro sa bona muta
basta chi bi siat frecuente
como chi la serramos sa disputa
istade sanos de corpus e de mente
cando cherides deo sempre acudo
os'astringo sa manu e bos saludo.