In su Gorroppu
In su Gorroppu , logu e calancones
bi tio ponner totu su parlamentu,
abeltos a trascias e su ‘entu
e semenadu in terra de buccones.
A conca fica e a fogu lentu
tio ponner sos peus mascalzones,
in s’intrada los cussigno a Caronte
eppoi ponzo fogu a cussu ponte.
Cando in segus no poden torrare
sas feras totu essin dae tana,
mandados sos dimonios de satana,
cominzan issos a ilfolchiddare.
Unu pro unu, a totu preguntana
“Cal ‘ est de s’arte tua in su furare?,
Chi’ est in su pecadu mastru mannu?
Chie in terra ha fattu pius dannu?”
Tottu isperiende unu cuzzolu,
su poddighe li puntan dae lalgu
a zoccos de salia dae s’iscalzu,
si giran tot’ a s’omine solu.
“Canta mischinidade a carralzu
omines de viltade in oriolu,
dae sempre l’azis osannadu
eccomo sol’ iss’ est s’acusadu?”
“Cussu in vida de fadu eretu
nd’ at impitadu tantu in su disizu
su chi no at apidu, babu e fizu
in perun’ era..nemmanc’ in s’ isetu.
Chin feminas no at connot’ allizu
e tempus at passadu sempr’ arretu,
como no b’at muzere chi lu ‘olet
niune chi sas ‘ozas li cossolet.”
“Tue inveze de cale parte ses?
Cale mischinade t’at infamadu?
Ses pro casu cussu chi at postu pes
nende chi ladru est su romanu?
Eppoi tue, chi mancu bi cres,
as ispeldidu populu padanu.
in conca sa pasta lis as cundidu
nende de nazione divididu.”
A manca e in mesu b’ est sa zente
chi paret in giudisciu isperanzosa,
no an cumpresu chi intr’e sa losa
che sun intrados, de s’ira furente.
“Bois sezis istados, peus cosa
alides pius pagu de niente,
etende gulpa a s’ imbonidore
traitu azis populu et onore.”
In chima de sa pius alta runda
si alciat de sa paghe su vessilu,
su populu inie chen’ assillu
disamistad’ e odiu che munda-t.
Eppoi naran: “s’omine giustu millu!!!
Cussu chi de onore med’ abbunda-t
Comente faghet isse abaidade:
Pover’ in canna,ma ricu ‘e dignidade”
Nessun commento:
Posta un commento