ciaravugliu

Paginas de ciaravugliu

Sas  paginas de su ciaravugliu

‘olan e sun boladas che-i  su entu,

nd’ ap’ idu zeltas  e  l’ap’ in ammentu

chi an atidu dolores e subugliu.

Ateras   poi  su coro m’ an  tentu

a custa vida misciada in un iintrugliu:

‘ue b’at  venas  de abbas ‘on' e  riccas

chi meda ‘oltas però s’agatan  siccas.

Sas pius bezzas  andan in lebiesa

subr’ è  culumba  candida innozente,

forzis est su mamentu pius dezente

chi restat dae sa naschid’ a s’ezesa.

Nudda ‘e malu bi restat in sa mente

‘emmancu  nudda in coro bi pesa,

ca  cussa prim’ edade l’apo ida

comente  una campagna fiorida.

Cando sa gioventura  idet lughe

su mundu paret  in prammu ‘e manu,

ma finas tanto, pianu-pianu

cominzat apparire calchi rughe.

Peroe no nde peldet su ranu

ca  est de colza dura che sa nughe.

S’abizat chi s’agatan sas piagadas

ma alu isse leat sas faladas.

Poi in tempus de  maduridade

 si pesat  domos impares chin sa cria,

e su tribagliu chi a bia - ia

no sempre est  in serenidade.

Mamentos sun de gosu e tribulia

de pessamentos  e felicidade,

totu  su chi si attit a domo

est pro su bene  de pustis e  como.

Poi sa fine s’ idet   sorridente

chin pesos  chi s’atacan a sas palas,

lezerigados  dae  cussas galanas

ijones  in ammentos  de presente,

sas malas poi restan cuadas

chilchende de fuire a sa mente.

sa vida no es  mai immaculada

chin forza issa cheret aconzada.