Jann’ e giae
Unu disizu su coro m’istringhet
cando friscura intrat in sa mente
e su ch’ ido totu mi si pinghet
de un’ incras chi paret lughente.
Sa melodia ‘e musica mi gighet
a bider solu grascias in sa zente,
cussa chi tantu paret lontana
eppoi m’ischidat a zoc’ e campana.
Pius atesu mi che paret posta
e pius est su disizu mannu,
de istringher’ a mie a sa costa
su chi semper nos at fat’ ingannu.
Est una falz’ idea meda tosta
chi solu faghet de nois su dannu,
sue pessare chi b’at diferenzia
tra s’ umana zenia, d’onz’ erenzia.
Leados dae muinas chena cabu
sighimus sos disizos traitores,
no idimus in coro mama e babu
e pienamus saccos de dolores.
Ma si bi podet ponnere agabu
e dare abba sol’ a cussos fiores,
chi atin frutos bonos in sa nae
e de sa paghe sun sa janna e giae.
Nessun commento:
Posta un commento