Cando mi frimmo...

Cando mi frimmo…

Cando  mi frimmo  su sero pasende

abbaido  s’orizonte  chi est  cue,

e-i su sole chi  s' est imbelghende

in segus  montes e de  una nue;

s’aera  paret, a fogu brujende

 ischentiddas  d’isteddos  fue fue,

subitu fattu s’acerat sa luna

e mi saludat  “a tie bona fortuna”.

Est tando..  chi  eo tot’ in d’ una

mi sento de su mundu imperadore,

sa mente de miseria geuna

e in coro no carpit su   dolore .

De ingiustiscias no nd’ ido mancuna

soltas in sa natura e-in  s’amore,

totu mi paret fatu a pinzellu

dae sa manu 'e Sanziu Rafaellu.

ue arrivit  folz' e fantasia
si biven dies chena tempus malu
totu  paret su mundu in armonia

est tando chi coglio sa poesia

pustis de meda tempus, pesso alu
chi sa 'etzesa .. est che sa pitzinnia.

• Paola Black 
  
  Rafaell' in manu s'arte aiat
  de pintar' aurora e tramontu
  ca su pinzell' aiat semper prontu
  e pitore famadu già lu fiat;
  
  peroe sa chi tue miraias
  este arte de Deus subrafina
  no este umana ca est divina
  est etern' e addurat semper bia.
  
  ...Ma unu cuadr' o una poesia
  pro cantu bellu nde restet s'ammentu
  su tempus l'irbiorit, l'arruinat,
  
  imbeze sa natura ch'est reina
  imperitur' 'ogni die s'istentu 
  ti dat, ca no at aer finitìa...

  
  
• 
  

  Lussorio Cambiganu

  
  

   Si Rafaellu in s’ arte est bistadu
  De sa bellesa massim’ autore
  Gai natura a tie at pienadu
  De poesia in donu su valore
  Est beru chi s’ artista pius famadu
  Restat pro sempre su nostru Segnore
  Ma che a Giotto allievu e Cimabue
  Gai dae Dante as imparadu tue.
  
  
  Giuseppe Pintore *
  
  
  E deo ca no apo cussos trastes,
  no apo unu quadru de pintare.
  Solu a bois poto amirare,
  e mi narades mi no lu guastes,
  isto luntanu, ma cheria imparare,
  basta chi sos colores m'impastes.
  Fortzis lu fato un'iscarabochiu,
  che Gepeto chi a fatu a pinochiu.
  

  
  

  
  

  • Lussorio Cambiganu
  •  Pustis paraula at nadu buratinu:

    “babbu” a su mastru chi l’ at criadu
    Geppetto a sa boghe s’ est ‘oltadu
    Et bistu at su sou bambinu.
    Gai ses tue Peppe su disterradu
    Baddu de nois.. sut’ e monte divinu
    Sa poesia nostra as pialladu
    Ma alu niune a tene at suberadu.
    
    ola Black
    
    Cussu ca lu fidi un' artizanu
    mastru 'e linna famadu Gepetu
    modellat unu fizu chi umanu
    pariat sen'aer unu difetu,
    e Peppe ca bi l'at in conc' 'e lettu
    sa Musa chi lu jughet a sa manu...
    ... ischent' e fizos d'art' 'e poesia
    los piallat pro nd'aer mezzorìa..
    
    .
    

    
    

    Giuseppe Pintore *
    
    
    Lussoriu no as rejone incue,
    po cantu deo cumprende poto.
    Tue cun Paola comente noto,
    sezis pintores de campos e nue.
    Chi deo conto unu Cimabue,
    bois mi superades ca sezis Gioto.
    E che issu bos leo a modellu,
    ca manizades colores e pinzellu
    
    .
    

    
    

    Paola Black ---
    
    
    Bos naro cun sinzer' umilidade
    digna no so de b'istare in mesu
    ca sa linna chi nd'atto manc'inchesu
    su furru l'at ch' 'ois alimentades;
    de s'arte 'ostra paret so attesu
    mancari ch'un'azudu mi lu dades...
    ...Che Pinocchio mi creschet su nasu
    ca sas Musas mi negana su 'asu..
    
    .
    

    
    

    Lussorio Cambiganu
    
     Su asu chi sa musa t’ at negadu
    No est de poesia , ca l’ as tota
    Det esser cos’ a nois pagu nota
    Chi alu forzis no asa contadu
    Chin bois palfo che polchedd’ in jota
    Sempre de versos mi so atatadu
    Sa veridade est: noll’ intendimus
    In s’ antu tou .. totu nos bidimus..