Sa murra
Intendo oghes, parimus in cazza
cando in posta passat su polcrabu,
no est zeltu in musica su grabu
ma che a cando in terra ruet tazza.
Paren fusiladas chen’ agabu
giannitos a s’issuldu ‘e can ‘e razza,
infora etados chin coro e chin azza
no si cumprendet su fizu chin su babu.
Olan sos brazos, che palas de mulinu
podighes chimbe si sun pro ambas manos,
deghe de issos a murra sun falados
“muzzu che troza e b’ etami su inu”!!
Ides piseddos impare a pilos canos
totos ammisciu istranzos e beghinu,
alcende sun solenne unu casinu
e-i sos lamentos sonnidos sunu vanos.
It’at a esser chi rendet giogosa
una dioi calda cuntierra,
che cando milite chi faghet sa gherra
in molte anzena idet una rosa.
Como enujos sun tocchende sa terra
numeru ses insistit in sa posa,
no b’essit mai, paret chi bi gosa
comente cando cocoi si ch’ inserra.
Est unu fagher meda elementare
pro cussu pesso chi b’apet isetu,
chi una ia nessi apan rispetu
finas pro chie, nudda at ite dare.
Su chi a prim’aboju est a minetu
lu faghet pro aversariu acumbessare,
no b’at de malu in sa oghe alciare
che finit totu in binu ‘e bonu ‘etu.
A mie paret che cando pane ilfurrat,
prima si fresat e poi s’aturrat.
Nessun commento:
Posta un commento