BON' ANNU NOU.. a donzi cristianu

BON’ ANNU NOU….a donzi cristianu

A finas .. cust’ annu  ch’ est passadu

doighi meses e bator istajones,

cumpridas  festas e delusiones

siat in caldu che tempus  astragadu.

Dies  e nottes  chi sas cundisciones

de custu tempus nos at  cussignadu,

sempre sa luna, su sole e sos isteddos

an dadu lughe  a mannos e piseddos.

Idim’ innanti a su tempus benzende,

etam’ a palas  onzi  cussideru

siat malu, siat falzu o siat beru,

totu passadu  si ch’ est olvidende.

Giae s’annu nou so leende a seru,

mi paret  de lu ider  arveschende,

impare  a custa notte pigurina

ogache  dae su mundu  onz’ ispina.

Duamiz’ e undighi sun sos annos ‘idos

dae cando  Cristos  at postu  pè in terra,

tempos de paghe ateros de gherra

totu peroe sun istados   cumpridos.

Chie at trampadu a s’afferra-ferra,

chie de onestade  sun dechidos,

a totu como istringo sa manu

bon’ annu nou.. a donzi cristianu.

a Zuliedda.. fiore de paradisu

Zuliedda

A zuliedda.. criadura pigada in paradisu

Sas  rundines sun su chelu pinghende

Olos giucundos,  in chelu biaitu

Ido sa cara tua  colorida

Chei  su frutu  in sa na’ e sa mela.

…a tie.. chin sas alas so aculzu

Ti mando custos vessos  subr’ e telu

De petalos cobeltu e chin s’istelu

Garrig’ e amore  pro su coro tou.

In custu contu ses sa principessa

Ses sa pius folte..  resta su chi ses..!!

pane, amore a fantasia... annu nou...

Amore, pane e fantasia (annu nou )

In duas  otavas   chelzo pienare

Su coro ‘ostru  de pasu  e amore

Chissà  cant’ amus alu a remare

In grascia ‘e Deus de nostru  Segnore

Su  mund’ est gai malu ’e mastigare

Leadu  dae  podere e  dae s’errore

A nois nos  bastat  una poesia

Pro abbrazare  a totu  chie si  siat.

Poetas  tot’ impare, aculziade

A sa cabita de custu moribundu

Annu de istenios  e de famidade

Chi at aflitu totu cantu su mundu

A s’annu nou  poesia dade

E de affetu ligadel’ in tundu

Pro cantu poto eo li do sa mia

In rima: amore pane e fantasia.

cue subra

A cue subra

A cue subra che chelzo pigare

pro 'ider  totu chin sos ojos mios,

s’afannu chi  nos faghet columare

de lagrimas caentes cussos rios.

Currende   chena poder  pasare

tra montes fatende millis inghirios,

attraessende  'onzi continente

e sos pispinzos de totu sa zente

Che un’ isteddu chin coa lughente

tio su mundu tando  illuminare,

bogare a fora su chi gito in mente

chin nudas manos  lu podere  pintare.

Dare impoltu mannu veramente

a donzi cosa ch' iscat alligrare

sas criaduras  chi patin su fritu,

famin’ e poveltade l’ an custritu.

Chin  ispinas in dossu  che s’eritu

tio ilfelchire  sos males de  terra,

ca concas malas sun semper  apitu

pro  cominzare una santa gherra.

Ammodigare su coro cuntritu

e dare a totu de  frutu una  perra,
Mundu divesciu e diseguale

in duda semper tra ben' e su male.

Annu tristu

Annu tristu..

It’ annu tristu 'e penas e trummentu

custu chi a malu modu ch' est passadu,

 populu  ch’ an   mazadu est  cuntentu

d’ esser  como  corrudu e fustigadu.

'Oladu si ch’ est che-i su ‘entu

finas occanno, che annu passadu,

pagu bi restat de incorniciare

de custu tempus de ilmetigare.

Cambian guvernos..chin sos guvernantes

ma sos pispinzos restan uguales,

alu  tributos  noos e replicantes

e naran chi semus  totu cabales.

Nois bezitos.. issos sas badantes

nos naran  chi sun curende sos males,

pover' Italia comente ses finida

fraziga  dae conca a raighina..

It’ est chi faghen  in cussu puddalzu

puddas  e puddos chena cocorosta,

gioghende sa  mariglia a modu falzu

si che leat a baru intera posta.

Est beru .. sun algas de muntonalzu

chena  limites  a sa cara tosta,

sun  issos  de su dannu sa rejone

s’ilgonza, de tota sa Natzione.

punt' e trettu

Punt' e trettu

In punt’ e tret’ e Sant’ Antiogu
Passo unu mamentu abbaidende
Su mare, e su sole arveschende
Chi paret diat vida a cussu logu

Sas abbas e fiores sun nuschende
fiag’ e pane caldu dae su fogu
pasat su mare asende cussa costa
chin undas carignendelas aposta.


Cantu sulenu mi dat sa frigura
cando ido s’ anzone naschende
paret chi su  mundu cambiende
siat dae sos ingannos e  brutura


Forzis sa mente m’este alu ingannende
Ma cherzo creer chin cust’ avventura
In ‘olos lebios e cantos  chi duran
potan  sighire  bellu   ‘e sa natura. 

AUGURIOS, SALUDU E FADU ERETU...

Augurios, saludu e fadu eretu

Augurios bos fato a modu meu

porrendebos sa manu  in bon’ isetu,

a totu  s’auguriu chi Deu

bos diat saludu, serenu e fadu eretu.

A  Isse pessade  chen’ anneu

e a su Fizu   chi nos  at in affetu ,

totu cantos nos gighet in sa mente

siat  ateu,  oburu siat credente.

zoccos d'agonia..

S’agonia…

Totu naran de te chi ses istadu

un annu  chi no cheret ammentadu,

medas sistemas asa fragassadu,

su  bonu totu est ilmentigadu.

Eppuru non b’at  pasu  o piaghere

chi  istet a sa sola  o chie cheret,

ca  est ligadu  a dolu e dovere,

a  bramosia ‘e  inari e podere.

Finas occanno  an cantad’ agonia

pro sa natura  e sa nostra zenia,

paret  chi tra un annu si peldiat

in d’unu bulione  e mai si siat.

Pover’ illusos  mannos e minores

chi no connoschen virtudes et errores,

atacados  a siddad’ e onores,

totu sezis che mene  pecadores.

Ite li nades a Nostru Segnore

cando  l’idides  in abbagl’ e lugore?

Forzis  chi est  istadu s’amore

traitu dae sempre in s’onore.

Nadale,  panettone  e  peltusita,

criaduras  zoccheddende fita-fita,

‘aue s’anima tua che l’as gita

chin sos calzones pijados  anca rita.

Trummentos  chi no dassan  mai pasu

cando  su  cumpanatig’ est romasu,

e-i su  destinu lassad’ a su casu

ti rendet  de frigura unu carasu.

Sos zoccos  de agonia in sas campanas

sun  pro  cussos massajos de sas lanas,

chi messan  cand’ ispig’ ammaltizadas

dae abbas  pigurinas,  triuladas.

Cando cantat  su coro  ‘ae su fungutu

sa  veridade  no connoschet lutu,

est  de s’umana  gloria in cussu putu

nebida et  giara  s’ idet chena cugutu.

abaidende dae su balcone..

Abbaidende dae su balcone …

Alu m’ammento  cussa bell’ ijone

ch’ idio , che a cuadru vivente.

de sos colores chi onz’ istajone

attian  in su monte  de ponente.

A cuss’ prim’ abelta ‘e balcone

sos ojos m’aberiana sa mente,

dendemi de bellesa un’ uccone

chi al’ in coro eo tenzo presente.

De totu sos  ammentos  giovaniles

chi poi torran  mudos in s’ammentu,

mi sulenades   como cand’ enides

cuadr’  ilfustos,  asciutados a bentu.

Fatos  pro bos cantare ‘ois parides

dae sos isteddos  de su firmamentu,

finas  si s’umilesa  bois cherides

sezis  de me su re custu mamentu.

.

melmos istracos (pensioni?? araba fenice)

Melmos istracos.

Istracos ‘ai sos melmos   lastimosos

mustrende sa fadiga  ‘e tota die,

sun una vida  chilchende  sos reposos

chena poder  narrer : perché ne chie.

Pagu connotos issos an sos gosos

meda piantos,  pagos  rie-rie.

Poveros melmos  istracos  de sa vida

chi pagu an connotu  ‘emmancu  ‘ida.

Si  tian cherrer  pro pagu  frimmare

e bider coment’  est   sa mandronia,

oburu solu  pro poder   giogare

chin sonnios  e olos de fantasia.

Pro  poder  un’ iscut’ assazare

su chi no an  mai idu una ‘ia.

Melmos  dae sa fadiga  manigados,

melmos chi tempus at  ilmentigados.

Melmos asciutos  dae  su caldu e fritu,

dae piore,  pispinzos e suore,

sol’ a su pasu  ch’ ispetat sun apitu

de una  vida  ‘e trascias e dolore.

Como su chi pro issos  fit diritu

restat  unu  sonniu imbonidore,

li naran : “no b’at nudda pro a tie,

forzis pro fizos tuos una die.

d' amore...unu ranu

D’ amore ..unu ranu.

Cantos Nadales  passados in sa vida

chi   no che torran pius a sa mente,

pius tempus passat , pius   frecuente

e custa die est  prestus olvida.

Annos chi passan, a bias,  penitente

e no s’abizan de Santa Naschida,

ebbai  che passat die  chena cumprida

cand' atraessat  s' istell’ e  s’ oriente.

De sa  lanedda  chi ocann' an coglidu

pro ponner  su presepiu  in decoro,

si nd’ at apoderad’ intr’ e  su coro

e inie  in fraschia  che faghet nidu.

Che criaduras e ojos issoro

in di’ e oe  si cheret cumpridu,

siat  su corpus e finas su sentidu

pro narrer  “d’esser zente eo  m’onoro”,

Sa naschid’ in s’arveschid’ e sa die,

comente  su fiore in beranu

e bai s’anzoneddu  bellu canu,

dana sulenu a totu e fin’ a mie.

Gai  in di’ e Nadale, onzi manu

chilcat  de istringher a chie si siet,

no at impoltu si pianghet o riet

bastat  chi porret d’amore unu ranu.

a sos disterrados patadesos

Santu Ainzu (a sos disterrados patadesos)

Posta in su montiju soliana

a lacana ‘e Barbagia e Logudoro,

dende sas palas a sa travuntana

abaidas sos montes de Nuoro.

Totu a mie ispantu mannu dana

sas baddes chin sa natura issoro,

dae sant’ Ainzu abelta sa ventana

de vista e piaghere nd’assaboro.

De Monte lerno  e cussa punta cana

sas roccas mi cunfoltana su coro,

cando tanco sos ojos mi ristoro

intendo  de maistru s’aria sana.

A totu cantas sas animas in pena

chi biven de ammentos giovaniles,

fagheli  torra ider sos gianniles

de dom’ issoro chi gighen in carena.

No est de zeltu pro rejones viles

chi  sighini  chin custa cantilena,

est solu ca penseri bos sulena,

s’idet dae su chi dades e atides.

E tando fina custu faeddare

bos podet torra in palte cunfoltare.

peldende s'identidade

Peldende  s’identidade…

Alu no mi do una rejone

proite  custa limba ses peldende,

ido  bander' e sa natzione

de bator moros chi si ch’ est cuende.

Paret  ‘etata sa maleiscione

chi  tra pagu l’idimus  molzende,

chin su latinu e sa limba grega

che finit in libberos de butega,

Pagu l’intendo  com’ in sas garreras,

in sos zilleris  o logu de tribagliu,

fin’ in campagna  limbas furisteras

chin calchi faeddada pro ilbagliu.

Sas   mamas nd’ ogan totu sas maneras

pro insinzar’ ater’ in trancamagliu,

a cussos fizos  chi cras an a pessare

chi sardu est  ilgonz’ e faeddare.

Intendo como   arrejon'  e agonia

in cunferenzias   pro issa organizadas,

pro li curare cussa maladia

propostas  fatas e ilmentigadas.

Si nde faeddat  pro l’impitare ebbia

pro interessu  ‘e cosas agatadas,

si  limba sarda andat in mala sorte

finas populu sou  at fiag’ e morte.

Etando de  proposta bi nd' at una:

de narrer “Eo so sardu e lu faeddo”,

so naschidu innoghe pro fortuna

chin batiles  d' amore eo la seddo.

Bella comente te  no b’at mancuna

chin tegus  eo m'azuffo e poi ameddo,

Tue ses  s’amada  limba ch’ apo a notu

dae sempre a ti’ ap’ idu e connotu.

camineras..de poesia

camineras... de poesia

Sa poesia a bias  dat rispetu

E nos che pigat a subr’ e s’aera

Innanti  a su divinu in su cuspetu

Nos gighet  tando custa caminera

Est solu  unu penseri  ‘e fad’ eretu

Chi  poeta pessighit  a  manera

 no est  una chimera in su riflessu

ma  s’ amore pro issa  dat s' accessu

che guevara

Che Guevara

Vita sospesa  ad un fil di lana

ove  il coraggio disteso si dispone

di una ricerca folle..seppur vana

della giustizia  nella rivoluzione

l’dea di libertà  per gente  umana

tenuta stretta  con forza ed  emozione

è questa   di virtù la cosa rara

che aleggia ancor di te ..OH!! Che Guevara,,,

ite se tue..??? (foto lago lerno Pattada)

Ite ses tue..??

Ite ses tue, amada poesia?

Forzis  disizu  intro ‘e me cuadu

chi dae  semper  totue chilcaia

e mai apo in  vid’ agatadu?

Ses tue  in s’aera oghe ‘ia

Chi  orijas e coro m’ an leadu

intrende  tue,  isparin  sas peleas

e sambene s’iscaldit in sas venas.

T’ apo chilcadu chen’ arte peruna

cando in giann’ e coro ses intrada,

ebbai  lezera che ‘a lugh’ e luna

intr’ e s’anima  ti mi ses pasada.

Paraulas leadas  una-una

paren  costumes de sa cavalcada

de idda mia,  chi che a mancuna

mi dat briu, ispiru e fortuna.

In sos disizos  tue ses presente,

mai una ‘ia chi mi lasses a solu

siat in terra  che   bolos frecuente

mi das s’ispinta e isprico su 'olu.

Ido  su mundu  e totu sa zente

tot’ impreada , chi mi  faghet  dolu,

imbeze  tue chi nachi fisi morta

mi  faghes bider custa  'idda risorta.

Pastores de Barbagia ..

Pastores de Barbagia




Comente in pultascione, 
lentas sas amas
attraessende su pianu,
 sighende
tratas de unu tempus passadu.

Iin sa idda alu drommida
arrivin apeddos de canes
 e boghes de pastores.
Tramunende sas amas, 
in montes.


Mentres su sole raunzat
 et ispinghet sa luna
ch..i che fumu si solvet.
Unu giamende s’intendet,
 e pustis,
un’ ateru rispundit e si perdet..


Pessamentosu su pastore tucat
atraessende s’ adde tra:
sos montes de sa Barbagia:

pennelar..pensieri

Pennellar..pensieri

Quante poesie ti hanno decantata?

Quanti  “sei bella” ti hanno dedicato?

Forse natura è stata generosa

Tu  che d’immagine sei  il fiore e sposa

Sei  del pensiero  lo spazio più invadente

E della mente  sei  immagine eloquente

Non  c’è  dipinto  di  pari  meraviglia

Nessuna stella la tua  bellezza  piglia.

aite torras...???

Aite torras…??

Cantu ses bezu, ses  pizzinneddu,

onz’ annu rinnovende dae nou

nd’ essis  torra che puddighineddu

biancu nidu dae sa bucc’ e s’ou.

In die fritta ilfusta ‘e lentoreddu

totu enin a su cuspetu tou,

onz’ annu su meraculu rinnovat

s’ispera  in su sentidu  chi nos movat.

Curren ammentos a cando criadura

isetaio  a missa ‘e puddu,

cando Babbai Bitti o don Mura

a mesanote “Est naschidu Cuddu”.

Ti pasaian  subr’ e una pedra dura

ma fritu no aias e ne tuddu,

A subra  'e campanile pigaio

e campanas a festa zoccaio.

Como  chin sa edade  s’ est  solvende

su zoccu ‘e sas campanas  de sa festa,

mi paret de l’essere intendende:

pagu ..comente est sa zent’ onesta.

Passat  sa die tua franculende

pessende  a su tempus chi nos restat,

aite torras alu  pro a nois

si s’animu gighimus che bobois?.

in sa mirada tua.... nel tuo sguardo

In sa mirada tua

Tio poder cantare una cantone

o puru atraessare  su  deseltu;

pro  dare lughe  e  atenzione.,

nadare  chena fine  in mare abbeltu.

In  coro  chi zocat   d' emoscione,

bid' orizontes  atesu  e lidu inzeltu.  .

Ahi!!  Lezeru  su penseri  'olat..

chilchende  in sa mirada ..una parola.

Verbu  chi dat  zeltes' a sa  presenzia
pro dare  a sa terra bon' arrancu,
valores  bellos e d' inteligenzia

chi ligan  bene a penseri francu.

Accò..  idende so'  in  ojos tuos
sos mantessi  disizos d' ambos duos.

Nel tuo sguardo…

Potrei  cantare  adesso una canzone,

oppure attraversar  vasti deserti

pur di destar  solerte  l’ attenzione.

Nuotare  all’ infinito in mari aperti

col cuore  scoppiettante  d’ emozione,

orizzonti  lontani e  lidi incerti.

Ahi!!  ‘si leggiadro  il mio pensier  s’invola..

cercando  nel tuo   sguardo  una parola.

oh..!! fior..

Oh..!!   fior..

tu... cos’ hai dietro  quello sguardo?:

d’  immenso  spazio  che par   abbracciar,

 un mare azzurro tutto da attraversar?

Il tuo pensiero fiorisce in un bel prato

E sboccia insieme ai  petali del   fior

Nel suo  profumo  ed intenso color

Diffondono  fragranza  nello spazio,

Par di sentire il battito del cuore

Che grande  fa di te .. il viso  ..oh!!  fior..

lun' e sole

Lun’ e sole

Lughe.. tue ses lughe  abbagliante

chi leas  su costazu a su sole,

a sa luna  s’imbidia li dole

cando aparis tue che brillante.

Pro cantu in fantasia mi che ole

ressesso pagu a esser costante,

in sa mirada tua  armoniosa

ido  su sole, chin sa luna s’isposa.

Luce.. tu sei la luce accecante

Che  sta all fianco del sole

La luna muore d’ invidia

Quando ti  mostri così brillante

Per quanto impegni la fantasia

Non riesco a descriverti

Nel tuo sguardo armonioso

Vedo il sole che sposa la luna.

zente sarda

Zente sarda

Bennid’ est  s’ora  de nde faeddare

Si  semus  populu   ‘e bona carena,

o puru  nos si pijat sa piena

de cussu  riu  ch’ est  pro   iscasciare.

Seculos  medas passados in pena

isperiende  zente dae mare,

chi fatu  ‘e s’insoro  navigare

amus  peldidu  totu  in donz’ ilmena.

Semus o no , de antigu connotu

fatu 'e  tribulias e  ingannos??

Si dae fora isetamus  sos mannos

amus a pelder  su destinu totu.

Cando  amus a samunare  pannos

in abbas  chi coglimus a fiotu,

pulimus issos  dae su corrutu

ch’ intristit  sa Sardigna dae annos.

‘Ue che sun  finidas  sas ideas

de  una  terra antiga  in mes’ e mare,

chi paret fat’ aposta pro istare

insula  ‘e  sole  e chena peleas?

Tio cherrer un’ iscut’ ammentare

sos sacrifizios e sas cosas feas,

sas inzustiscias  e  totu sas  begas

chi amus bidu  semper  dominare.

Como est ora  de nde la finire:

Sas lanas, sas  chimeras  chena fine,

Ijones chena  cabu e su machine

chi prim ‘e nascher  cheren aultire.

Truncamus  sas cadenas de mudine

ca  dignidade devet  fiorire,

mai s’ acunnortu devimus pedire

 chin sa “O” manna giamamus  s’ Omine.

Naro: “ a fora totu  zente indigna”

dae su podere ch' at fatu sa colza,

ch’ idet sol’ una manigadolza

 cumone fatu tota  sa Sardigna.

Leamus che sa caus’ e s’ilgonza

e su malcu chi male ‘alu nos signa,

gia dimustradu at cando s’impigna

chi  finas ’arriu in caminu s’aconzat.

nodos a petene

Nodos a petene

Su petin’ est  bennidu  a su nodu

de contos  male fatos, como  giaros,

iscobeltos furfantes e sos  baros

gighimus  sas foltighes a s’arrodu.

Sa  malintragna  occhidu nd’ an sos faros

de ziviltade  fata a bonu modu:

 familia, iscola, saludu  e  su trabagliu

istudados  che faru a trancamagliu.

Como giamadu an unu duttore

pro poder  ponner  a su dannu reparu,

no isco si est menzus un isparu

pro  avitare penas  e dolore.

Pro cantu  un incras mi siat caru

no bido  perun arcu de colore,

chi potat dar’ ispera  a custu mundu

ferid’,  offesu,  traitu e moribundu.

Sa paghe,  s’umilesa  e s’unidade

sun su disizu tantu decantadu,

pustis  de pagu sempre ilmentigadu

che a s’ amore,  natura e amistade.

Su chi  guvernat  sa mente  ‘e s’ Istadu

sun  sos valores  de paga calidade:

Narzisu, Marte,  Apollo  e sa richesa

de s’aparentzia  nde faghen sa bellesa.

Ohi!! Vana gloria  in conca sempr’ intrada

tue ses  sa ruina de s’istoria,

de populos  mudidos dae sa boria

chi  chilcan aidos a faca de s’istrada.

Zente chena  incras e ne memoria

renden sa Patria una malefadada,

leada  dae  sa bram’ e s’ egoismu

dae  su visciu, falzu protagonismu .

Maria Immaculada

Maria Immaculada..

Un’ anghelu  appalfid’ intr’ e domo

l’ annuntziat  de cussu mann’ avventu,

no  ischit proite a Issa como,.

Maria Santa Mama  in s’ispaventu;

Virzine..!! ch’  est   raida  in su sinu

ca  pro Zuseppe nd’ at s’isgumentu,

de  li poder  cuare  su divinu

Issa ,  che  bianca nie Immaculada,

che candida  culumba intr’ e su nidu.

Mama  ‘e  Cristos, Deus  l’at disignada

chena   l’aere  dadu  unu carignu,

dae altu  custa gloria l’est falada,

porridu dae anghelu  unu signu.

In su lugore ‘e grascias  atidu

e in  umilesa  atzetat  s’impignu,

est de s’umanidade  su sentidu

chi pius  nos aunit a  s’ama.

Uniga  vera  gloria ch’ apo idu:

s’amore, sa pasciescia ‘e  mama,

cussa  chi  tot’ impare  nos abrazat,,

e narat: “ama..ama…ama..et ama”

tuffo d'azzurro..

tuffo d' azzurro

È coi  tuoi occhi che voglio parlar

Ove il mio sguardo  posso rispecchiar

Vederlo immerso  nella tenerezza

Dell’ acque azzurre dell’ immenso mar

Assaporar  la dolce tua freschezza

Tenuta  ‘sì , da una  lieve   brezza

Che soffia  sempre per attutir  'l calor

Che brucia  membra  pervase dall’amor.

a primu 'olu...

A primu ‘olu..

Custu manzanu  eo ap’ intesu

paraulas chi si fin cumponzende,

comente puddighinu naschende

l’ap’ idu  fora  ‘e  s’ou a mesu.

Isse  sa buccia fit biculende

ma alu  intro totu che fit presu,

isetaiat de fagher su logu

pro nd’ essire a  brincu in primu ‘olu.

Sun  cussos verbos chi  cheren  intrare

leende  fua  in zeltos mamentos,

cando moven  fungutos sentimentos

ma no b’at modu ‘e poder  frimmare.

Como chi peldid’ apo sos ammentos

mi  restat  solu  de los copiare,

tando comente como, fio solu

iscultende  cantig’ e rusignolu.

At unu tratu  eccolla  sa muina

chi  m’aberit   cuss’arcan’ intragna,

chi dae sempre  chena chi mi nde lagna

mi punghet  sa mente che ispina.

Apalfida si m’est in sa campagna

cussa cumpanza de anim’ ighina,

mi  cantat una dulche melodia:

“ sa menzus est.. sa chi mai iscriia “”

donna

donna

La luce che risplende nel tuo viso

L’ho letta  stamattina  nei tuoi occhi,

Ove riflette d’incanto il tuo sorriso

che d’emozioni  diffondono , non pochi.

Della  fortuna che al tuo cuore ha riso

vorrei  conoscer  i segreti  e- i giochi ,

sei  d’anima e di vita acqua termale  

che fa volar il ben’  e affossa il male.

Bosa

Bosa

Bosa est una bella zitadina

Posta  a faca  de su riu mannu

Temo li naran, bi pioet onz’annu

Lassan pioer  abba  russa e fina.

Poi cantada l’at  poeta mannu:

Murenu Merchiorre  li cumbina

In otada, bator’ o  terzina

de  cumprimentos chi li faghen dannu.

De cussu mastru chi logu at unoradu

Chin  su rimare sou  e sa presentzia

Devides cumprendere in passientzia

Su disaogu chi l’at riservadu.

Ca’  tota  cussa manna penitentzia

In art’ e poesia at furriadu

Sos ojos suos sa lughe an oscuradu

Ma s’est atzesa in  coro e intelligentzia.

a s'improvisu...chin Pintore

Poetende  a s’improvisu..chin Pintore

Giuseppe Pintore

A mie paret custu gruppu minore
senza mancu lu cherrer si ch'ses mortu,
como bos giamat'a s'appellu pintore
pro lu torrare in vida, e poi risortu
calchi gara faghimos a primore,
tantu de no nde pelde s'acunnortu.
Narademi bois chi sezis prontos
in poesia a saldare sos contos.

Lussorio Cambiganu

De custu grupu pagu eo ischia

E gratu como rispond’ a s’invitu

Beppe mi punghet che a un eritu

Idende si paraulas m’essia-n

Si tue de ammie fis apitu

Accolla  sa  pobera poesia

Cussa  chi mi donat sa conca mia

Pro dare piaghere a custu situ.

Giuseppe Pintore 

Deo ti naro solu benennidu
proite isco puru cantu ales,
semus pagos peroe no ba males
deghe e otto semus as bidu,
es minore su gruppu ma s'est'unidu
intramos puru in temas geniales.
Cun sos ateros amigos a cunsonu
passamos in allegria un'ora in bonu.

Lussorio Cambiganu

Tue chi semper rispundes a tonu

As in sa mente temas geniales

No bastan  de paraulas  cuintales

Bi cheret arte, frigura  e sonu

Tando chin orofinos  ispeziales

Si cosin versos  e atera cosa ‘e bonu

No b’at  paura ma solu disizu

Cando  babbu faeddat  a su fizu

Giuseppe Pintore 

deo fortzis soe su pius umile
de totu custa sarda manna corte,
peroe chi de cantare tenzo sorte
m'agradat a tenne caru su cuile.
Tue mi faeddas cun coro gentile
ca l'ischis no so robustu ne forte.
Aboltas si oltana puru sos chelveddos
e mi fuo a su sonu de i malteddos.

Lussorio Cambiganu

Tando est chi tue ides sos isteddos

E campos  ogados  a beranile

Ca mannu est su tou istile

Fatu che  iscultore in iscalpeddos

Tue chi no connosches sa vile

Lintura ‘e pes  comente sos catteddos

Naras  in cantu  su chi conca tua

Ti dettat e no faeddas a s’accua.

Giuseppe Pintore 

A mi che pigare a su poju
mai apo pensadu sena meritu.
Es solamente innoghe s'aboju
cantende sena sonu in'iscrtu.
Lu faghimos setzidos in s'abitu
senza tenne paura de su forroju;
chi aberi sa conca perra perra
poninde sa carena in cuntierra.

Lussorio Cambiganu

Est  pro  gosare, no zeltu pro gherra

Chi de paraula faghimus sa virtude

Che  domadore  chi a caddu rude

Li ponet  sa briglia e isse s’isperra

Comente  onz’ animale in gioventude

No cheret nudda chi a isse l’inserra

Solu innanti connoschet  su padronu

Chi in sa doma l’at fattu mannu donu.

..a su grupu "solu in sardu"

Solu in sardu

In custa cumpantzia sol’ in sardu

Si podet faeddare  tota die

Siat  a seriu che a rie – rie

Dae manzanu finzas a  sero tardu

Assuprin dae totue, dae ‘ue si siet

Abias dae terra grega chin riguardu

Beppe Pintore  mandat sos saludos

Gai sentidos , de l’intender sos suldos

Totu che  dan una bona manu

Andende a sa bratzeta e in bonu coro

Dae sa Nurra  a su Logudoro

Si passat a Gaddura e Campidanu

Totu abojat provintzia de Nugoro

Ozastra, Barigadu  ‘e Oristanu

Mariedd’ e Ossi est su regista

In umilesa  sa fide si nd’ achista. 

Ti' Antoni...... (a Antoni Palitta)

Ti’  Antoni.       (a Antoni Palita)

Oè..ti’ Antò.. fio isperiende

sos  cuadernos chi azis  lassadu,

iscritos  dae cando  bois  gioghende

in gioventura , eppo’ in tempus passadu.

Nd’ apo coglidu cando fizis gherrende

chin cussu male chi mai bos at dassadu,

ma  in su tempus  passadu gai o peus

mai  perdid’ azis s’ amore  in Deus.

Mi so ammentadu cando minoreddu

rientraio  a domo da’ iscola,

e bois  in su giannile chin manneddu

mi  giamaiazis: “aculzia a sa sola”.

Chin  faghere  umil’ e tenereddu

a boghe lebia, sonos de  noitola:

“sezid’ innoghe, oga su caltolariu

istudia meda, no sias beltulariu”.

Fizis e sezis  de idda testimonzu

de sas ideas  e de sos pensamentos,

de chie at dadu tantu in su bisonzu

e chie de idda a peldidu ammentos.

Ma sempre  ‘ois chi d’unu fagher conzu

no  bos  bessiat dae ucca lamentos,

azis  pessadu sempre ‘ue si sia

de faeddare chin alta poesia.