cantende a Santu Lussulzu .. giuanne Frongia e Lussorio Cambiganu

Giovanni Frongia

Santu lussulzu s'invitu zentile,
ringrazio, e in cambiu ti mando,
solu versito dignos de cuile.

invanu mi strapazzo, e dae tando,
de chimbantannos faghede e piusu,
c'apo istranzadu, prite mi domando.

Che sansone sos pilos mapo tusu,
senza chi esser cuplize dalila,
e peldidu apo tottu, filu e fusu.

chimbantannos de vida posta in fila,
pro me chimbanta sun de presonia,
chi s'essere retrozzedidi e mutila.

Massimu chie abba e poesia,
teniada a su sambene misciada,
gridada istraziu, in'estrema agonia.

S'aganipe sorzente mi est siccada,
po chi ancora e abba umidu appada,
restada una funtana inquinada.

Si po buffare unu laccheddu tapada,
mancari eppas sidiu, est azzaldu,
deliriende ogni versu ti iscapada.

Ruede chi hat bufadu chito o taldu,
e non lut salvan cun sa burrazza issoro,
mancu sos canes de santu bernaldu.

Lungos cantos de chigulas in coro,
in sos caldos istios; e puzzones,
bat canterinos a piumas de oro.

Fra cantu, e danzas milli passiones
raccontana) ma sos cuccos resta cuccos,
mancari mascherados de paones.

Iscobeltu, e cumpresu ana sos truccos,
de finziones e falsas oratorias,
cumentos vanos, e versos caducos.

De sos lamentos mios sas istorias,
non ti racconto prite ti rattristana,
sende privas de lumene, e de glorias.

Sun che alvures reas, chi no istana,
senza apozzu de varios puntellos,
chi ruinde si isciuppana, e si pistana.

Mancu poden torrare cuddos bellos,
annos de birde edade e zoventude,
chi tottus fini abeltos sos canzellos,
grazie, e bonas garas, cun salude.

G. F,

Inizio modulo

Lussorio Cambiganu Santu Lussurgiu (Lussorio)

Lussurgiu sas ispadas at leadu
pro dare forza a s’imperu romanu,
dae Casteddu Segnore l’at giamadu
pro li dare sa fide cristianu.
Sas glorias e cumandos ch’at ‘etadu
e s’ evanzeliu at leadu in manu,
pro custu zestu de alta dignidade
Roma l’at postu in disamistade.

Nudda, pro Isse b’at piedade
lu pessighin in tota sa Sardigna,
onzi mineta pro isse indebade
sighende sempre s’astru chi lu signa,
a totu nende su coro istade
pro una religione gai digna.
Cando sa fide obbligu l’impone
no timet disaogu ne presone.

Brincadu at sas lacanas de fora
dae Casteddu e su Campidanu,
prima a Bithia poi Sulci e a Nora
preghende sempre chin su cor’ in manu.
In Cornus, Neapolis in bonora
at convintu populu profanu,
poi in Romana connotu su cunfinu
in Fordongianus ochidu l’an mischinu.

In donzi logu nois l’amus vicinu
e meda zassos bi restat s’ ammentu:
Celargius, Sant' Idu l’an ‘ighinu
Uliana, in Corrase e Gennargentu.
Totue chejas puntirinan terrinu
Santulussurgiu nde pesat cumbentu.
Custa sa vida de santu Lussorio
chi eo prego finzas chi no morio.

Giovanni Frongia

 Ite sese ho Lussoriu lussulzesu,
custas ottavas ue sun bessidas,
ca no apo afferradu ne cumpresu,
si dae mente tua sun paltidas;
si tou est su zampillu casa istesu,
sun bene reguladas e medidas.
Chi tenede boscu fittu abita belva,
e foras bogada sa flora e riselva.

Lussorio Cambiganu

 Grascias a tie oh!! Giuanne Fronza
Pro cantu a mie rendes unore
Custu est meu sant’ amparadore
Lu naro chin urgugliu e no birgonza
De Sardigna est santu gherradore
No at bisonzu de ‘antos chi bi ponza
Lu fata goi o puru a rim’ isconza
Restat semper s’ ero’ e su Segnore
Eo de isse nd’ apo sa numenada
Dae Casteddu, pigadu est a Patada

Giovanni Frongia

 tando non ses de lussulzesa colza,
deo pensadu t'apo lussulzesu,
prite su santu de cussa cussolza,
ap'idu chi onoradu asa e diffesu,
tando ses de sa idda e sa risolza
mentre deo so binu oltueresu.
Duncas m'onoro d'essede isolanu,
però da chimbantannos so Romanu.

Lussorio Cambiganu

 Est beru chi tue ses romanu
Cantu lu est chie ponet sas alas
Olat atesu dae sas dies malas
Ma coro sardu lu tenet in manu
Ammiro de a tie sas cantadas
Mandrolisai dat binu galanu
Amigos bonos tenz' in Ortueri
Siat de poesia che de zilleri..

Giovanni Frongia

 ja bada in'oltueri binos bonos,
su coro iscaldana, e ponene allegria,
poi s'intende murras, e bad sonos,
a ritmos de ballu, e poesia;
e tantos los possedin cussos donos,
estros de argumentu e fantasia,
si diveltin ballende a murra jogana,
e diffizziles rimas ti rettrogana.

Lussorio Cambiganu

 Gai paret.. chi b’adduret su gosu
In biddas nostras, ‘ue semus naschidos
No an presse d’ esser già arrividos
Preferin su pasu e su reposu
Forzis issos sun sos ben’ ischidos
Ca no miscian sa vida de ‘elosu
Isetan cussas oras serentinas 
Pro ilboidare ampullas e chentinas

Giovanni Frongia

 folzis sun visitadas sas cantinas,
de istranzia, e ospites amigos,
però bat campos pienos d'ispinas,
ca non seminan ne olzos ne trigos,
non s'intende de canticos muinas,
de boinalzos e massajos antigos,
ca este abbandonada ogni cussolza,
e frundidu ana aradu e messadolza.

Lussorio Cambiganu

 An a torrare .. a cue a folza
Si cheren su piatu pienare
Sinono famin’ an’ a cascare
E de frutture manigan sa colza
Pagu b’at como de ischirriare
No b’ at falada .. est totu pigadolza
Mischinu chie d’ abusare pessat
Menzus dae sa vida chi ch’ essat

Giovanni Frongia

 sa vida e ristringhinde sola sola,
non bad polcalzu in bidda ne mannale,
signale non d'esistidi de alzola,
ho tribaglios de formas manuale,
bat calcunu chi andada a siscola,
ma manca sa ripresa capitale.
frimu s'aradu apprendista e artista,
senza dinare semus e provista.

Lussorio Cambiganu

 An a torrare massajos e alzolas
Chin falches pro laore de messare
Mannujos pustis an trebbiare
Finas piseddos de altas iscolas
Sas roccas puru an a semenare
De bananas e frutas esoticas
Dae su manzanu a su ser’ a taldu
An a connoscher su fritu e su caldu.

Giovanni Frongia

 cuddos tempos passado pius no passana,
e restada che una istoria ismentigada,
sos piseddos de como no s'abbassana,
a messare una tula lentorada,
sa terra, est terra e in terra la lassana,
ca faghed male un'schina curvada.
ca sun visciados e custu est suzzessu,
da proare sos aggios de progressu.

Lussorio Cambiganu

 Ma como totu s’est arressu
Ateras bias s’ est bida cussa roda
Torrat in segus de vida s’ interessu
E pagos sos disizos sun de moda
Inteligente, macu e finas fessu
Canapu pro chintolza istrintu annoda
Totu s’ at manigadu babbaudu
Foltunadu chi at alu saludu

Giovanni Frongia

 Po zeltos ciarlatanos e intrepidos,
semus gosie, e sos males dilagana;
guvernan male, creschene sos ghepidos,
e sun sempre sos poveros chi pagana,
paren prezisos aziles e lepidos,
cando dinari anzenu a domo tragana.
Lussorio, sos arressos semus nois,
issos non han ne famine, ne ois.

Lussorio Cambiganu 

Nos est gai, comente naras tue
Fin’ issos an’ a bider cussu roccu
Comente calat a terra sue nie
Si solvet.. gai issos fatan zoccu
Pag’ interessat sa solt’ issoro a mie
Campados sempr’ a fura e iscroccu
Zent’ in piantu.. issos a rie – rie
Fatan sa fine mala de sa nue.

Lussorio Cambiganu 

Cun piaghere e mannu disizu
Apo de te ‘nu pagu profitadu
Tue comente babbu.. eo fizu
T’ ap’ idu .. e tantu ap’ imparadu
Tue Elicona isperias dae pizu
Eo dae basciu t’ apo abbaidadu
Ti porro gratzias pro sa zentilesa
Chi siat romana o ortueresa.

Fine modulo