giovedì 7 giugno 2012

cant' ischis amare

















cant' ischis amare


Ohi !! padre Luca cant’ ischis amare
Pius de  mill’ atores  rezitende
Faghes  coro  ‘e feminas ballare
Che   morocula  in tundu girende
Pustis  chi tue finis de pregare
De Paride  ti ses mascherende
Furas su coro  de Elenas  bellas
E las ilfrezis che in sartigli’ istellas.


Si fit a modu de tinde furare (padre Luca Cubeddu)

Si fit a modu de tinde furare
coment’e Paris a s’hermosa Elena
... dia andare corsariu in terr'anzena
pro una bella a mi fagher ladrone.
Tando mi dia antare cun rejone
de tenner un'Elena in manu mia:
bella, pro t'haer sempr'in cumpagnia
montes et roccas nde dia bettare.

Si possibile modu fìt istadu
de ti nd'haer leadu nessi a fura,
coment'e Paris dia esser andadu
a ponner guerra, ca un’hermosura
in cussu visu tou delicadu
disputat su colore et biancura;
pro tenner una simile figura
ogni cosa si podet arriscare.

Pro ti tenner presente a dogn'istante
s'oro de su Perù gastare dia;
s'essere che monarca in su Levante
che i su gran sultanu in sa Turchia
de s'hermosura tua fatt'amante
sa Sardigna in perigulos ponia,
su gran mogol ancora 'e Barbaria
dia ponner in armas pro gherrare.

S'haere sos tesoros de s'Olanda
cun totu sos navìos de Inghilterra,
cantos s'Ispagna et Franza nde cumanda’
contra s'America et sa Gibilterra,
sa Sardigna imbestida da ogni banda
dende battaglia per mare et per terra
ue ogni delissia s'inserra',
biddas, zittades dia arruinare.

Dia mover de banda de Ispagna
milli naves de gherra in sa marina,
a bandelas ispaltas in campagna
pro tenner s'hermosura pelegrina;
si intro esseres de una muntagna
a sa muntagna dia ponner mina
et de pustis ti dia che reina
de tota s'Europa incoronare.

Si s'arte militare che Pompeu,
o che Cesare ischere sa battaglia,
fin'a ti bider in podere meu
mi estia pro te de forte maglia,
dai pustis dia alzare unu trofeu
che Cesare in su campu de Farsaglia,
de marmaros alzende una muraglia
monumentos eternos pro restare.

Pro Elena s'istruesit tanta zente,
cant'in su mare non bi hat arena,
ma eo la discurro a differente,
chi tue binches sa matess'Elena:
issa fit grassiosa solamente,
fit grassiosa però fit murena,
tue ugualas a sa Madalena,
grassia et biancura sunt cumpare.

Coro chi t'hap'in coro a dogn'istante
et pro t'amare so finidu et mortu,
coro ch'istella ses sa pius brillante
che una trizza fine de oro isoltu,
ti consumis pensende sempr'amante
senza mi dare nessun'accunortu,
si non t'haere idu bennid'a portu
pius allegru minde dia andare.

Solu pro un'amante, altu gesminu,
ritira cussas nues dai su velu
ch'occultant sas ricchesas de su sinu
chi binchent in biancura nie et chelu;
non cues disizadas de continu
cussas melas de latte in tantu zelu,
sos amantes disizant un'anelu
si cussa diccia podiant lograre.

Padre Luca Cubeddu - Patada

2 commenti:

  1. Paola Black ‎---
    Sas melas e melones disizzados
    de cussa dea bell' at Padre Luca
    e gasi li fiorint in sa 'uca
    faeddos de amor' accalorados,
    ch'a sas femìnas su coro l' assucat
    e l'isettant a brazos apparados...
    ... forzis, fin' eo a l'aer connottu
    innamorada mi nde fi' ettottu...

    Lussorio Cambiganu


    Si d’ isse no ti podes ammorare
    In ghiru b’at unu patadesu
    Chi ‘e padre Luca ischit declamare
    Sos versos chi da’ isse at apresu
    Ti podet finzas s’arte insinzare
    comente at imparadu et intesu
    nachi dae molle nde piscat sos versos
    pustis bi cundit sos gustos diversos

    RispondiElimina
  2. Paola Black

    No dudo chi bi nd'eppat in Patada
    de omines de manna levatura,
    ma pro lomper tue a cuss'altura
    teves fagher manna sa sartiada;
    pro cant'eppas sa ment'istudiada
    divessu est s'istil' e sa durcura
    divessos sunt sentidos e cultura
    ca fit attera epoca passada...
    ...tando fit tempus de zente sinzera
    no como chi faeddant a vanvera...

    Lussorio Cambiganu

    La giras gai o goi sa padedda
    Dipendet dae manigu coghinende
    A bias Paul’ ateras Pauledda
    Semper a tie ido iscalchizende
    No apo nadu nudda in innedda
    Si no ch’ atere b’est isperiende
    A su disizu tou ch’ as cantadu
    De poder aer su padre innamoradu

    RispondiElimina