facebook

Face book

Chi est ch’ at batidu cust’ inventu

chi  totu est fatend’ ammachiare?

gosu abbias, ateras trummentu

ponet sa fantasia  a bolare.

Siat a sa seria  o coment’ apentu

oras de vida che faghet passare,

totu su mundu intr’ e inie finidu

comente  muncarolu   remonidu.

Manzan’ e sero, a prim’ abbelt’ e oju

totu inie abberin  s’ isperaglia,

chilcan sas novas, o  ater’’ abboju

chen’ agatare su cabu de sa maglia.

Abbias  si buscat de totu, che in su poju:

siat pische ‘onu, o puru   inie s’ incagliat,

su sinu ‘e sa rejone e su sentidu

paret  su connotu  mai cumpridu.

Inie  pessende  de poder    agatare

su  chi de’ sempre est ‘istadu  negadu,

de poder  un’ iscuta faeddare

de totu  su chi s’ est  prima  cuadu,

Zente chi pessat de poder poetare

faghet  de mediu d’ esser invitadu,

a su cunsessu  de musas d’ Elicona

subitu poi  si nde faghet padrona.

Totu nos giamat isse a s’apellu:

notifigas de grupos e amigos,

divent’ est  motiv’ e arrempellu

finas a  tarda note ben’ aldidos.

Cand’ a manzanu sonat campanellu

est s’ora chi nois semus pius sonnidos, 

ma prima  d’aer su pè  in terra pasadu

bidimus  cale novas b’at  ‘intradu.