chin.. Anghelu..

Faeddu chin Anghelu…

Sos annos sun passen’ in poesia

dae cando  m’ as abbeltu s’isperaglia,

no isco si est sa tua o sa mia

custa musa ch’ isparat a mitraglia.

La gito  fatu , sempre est imbia

‘ue ponzo   passu bi restat sa raglia,

paret  su can’ e totoi  masedu

mi sighit chena m’ esser de impedu.

Onzi  mamentu  lu coglio  intr’ e sa nella

de sas siendas  bene costoidas,

totu remonzo  in sa rima bella

pro  dar’ ammentu a chie no las at bidas.

Sun  atimos  de lughes  chi s’istella

lassat  de su coete.. poi finidas,

prima  chi  si ch’ imbelgat in s’eternu

nde l’og’ a foras  dae  cuad’ internu.

A bides cant’ est  donosa sa vida?

Cantos fiores naschen dae su dolu,

pariat d’esser  solit’  atrivida

de poder dare a tie  cossolu.

Chin   cosa  mai apid’ e ne bida

unu manzanu  chin  penseri solu,

de ponner su piant’ in  cuss’ ispera

chi nos  at  dadu  nusc’ e vida vera.

Custu manzanu, legend’ a Padre Luca

in su libberu tou ,  sempre presente,

ap’ idu  cantu tue   li das buca

a s’ animu rebelle .. impenitente.

Abbias fatu su logu si tucat

e cantat  vid’ Hermosa  pro sa zente,

poi  tot’ in d’unu chilcat su cuntentu:

cussu divinu, intr’ e su cunbentu.

Cant’ est  trista, tantu  soberana

est  s’stadea  chi cheret su pirone,

no b’at  nudda  chi bivat in chitana

ca che lu leat su primu bulione.

Zeltu piaghet sa vida bella e sana

ma pustis  cheres finas  millione,

no  finin mai  in vida sos disizos

comente paris  ‘enin sos fastizos.

Cando t’ ap’ idu  in sa cunferentzia

s’ atera die ,  in s’ oru  de  Casteddu,

chissà cant’ as patidu sufferentzia

chi t’at leadu  corpus e cherveddu.

E puru dae s’ ojada  in  elocuentzia

 ap’ idu a tie   comente piseddu

chi gighet  su mundu in pramm’ e manu

e no connoschet  malaid’ e sanu.

Bell’ a Nostra Segnora  presentada

chin s’ umilesa tua l’as fatu donu,

faladu nd’ as sas penas dae Patada

pro las  porrire a ‘Issa  in abbandonu.

Segura est  sa grascia chi ti dada

ca ischit cantu s’ animu est bonu,

tantu est bonu  cantu est  cumbatente

cuntra  sos males chi ferin  sa zente.

T’ ammento cantu t’ ap’ imbidiadu

nadende a tretu longu  in abb’ e mare,

no amment’ e t’ aer mai suberadu

in  artes  de sa vida o su giogare.

Sempr’ onzi cosa  a seberu leadu

a frutu bonu  as gitu a madurare.

De una cosa, però  sa ‘ issa est mia:

"d’ isterrer versos   in sa poesia."