aultidu...

Aultidu…

Si Deus torrat at ‘ onzunu su sou,

in chelu  pigan cussas criaduras

chi  no an bidu nudda dae nou,

in  d’ una vida ‘etad’ in sas cresuras.

Inie ilfechidas dae su rhou,

no an  apid’ in terra sas bisuras

chi su Segnore  at disignadu

pro  esser  dae totu sol’ amadu.

Forzis  in su disegnu  soberanu

tot’ est  iscritu, totu est previstu,

nende nos  “bois  animu cristianu”

de  fagher malu, Isse s’ est abbistu.

Falad’ in terra, ‘estidu de umanu

subr’ e sa rughe at postu su crabistu,

chin su dolore samunat su pecadu

esempiu  gai  ladinu nos at  dadu.

Naschidu  est  in gruta poveritu

chena manteddu ne lizos de oro,

a  faca no l’iscaldit su coritu

ma:  ain’ e oe chin s’ alen’ issoro.

Gai   a totu che  cazzat su fritu

cando pienat   d’   amore   coro,

comente  mama e babbu generosu

chi  no lis  tocat mai su ‘elosu.

Pro cantu podet parrer de tristura

dolore est de isse cuss’ amigu,

chi dat  in s’Eternu  sa gosura

a chie no nd’ at peldidu  su sigu.

In lacanas de vida  sa messura

incunzat  in peleas su menzus trigu,

sa semena ch’ at fatu in aradura

ch’ at aultidu  su bis’ e criadura.