fiza..mama e pretendente (Black - Cambiganu - Pintore

Giuseppe Pintore

Chi caligunu rispunde presente
cun rimas e cuntzettos chi maniza.
Ponimos de nou in motu sa mente
gai su cheveddu no est a coiza.
Cantamos sa mama cun sa fiza
e cun issas puru su pretendente.
De poesia chi nd'azis unu riu,
po su seberu lasso liberu aviu.

Inizio modulo

Lussorio Cambiganu ^^^^^^^^^^^^^

Eo so mama la muntenz’ istrinta
Custa culumba no fuit dae nidu
L’ apo pessada, fata e bene pinta
E la muntenzo che cunzad’ innidu
Dae domo ti che 'ogo a ispinta
no est chin tegus chi faghet affidu 
No la do ne pro gloria e ne oro
Francu chi no li furese su coro.

Paola Black ---

Femina mi at fattu mama mia
fin'a manna m'at tentu costoìda
ma custa 'orta leo sa fuìda
ca no mi dat tottu su chi cherìa,
pritt' est femin' issa puru ebbìa
cando bi cheret mascru in sa vida...
... Tando lasso su nid' e mi sebèro
un'omine, chi siat su ch' ispero...

Giuseppe Pintore *

Mi so passende sa vida solu solu,
dogni die triballo sa campagna.
a sero cando recuo de sa muntagna,
sa domo mia paret bestida a dolu.
Pro tennere unu pagu de cossolu,
bi dia cherre pro vida una cumpagna.
Una nd'apo in coro e no es faula,
sa mama no cheret ma mi cheret Paula.

Lussorio Cambiganu 

Tue de sa muntagna ses sirbone
E cheres mezorare sa zenia
Cheres intrare intr’ e su cubone
Pro che furare a sa fiza mia
No la do a sa prim’ ocasione
Solu ca t’ est intrad’ in simpatia
Sa prella ch’ ap’ in domo costoida
Faghe contu de no l’ aer ma’ ida..!!

Paola Black ---

Mama, chi non nde cheres de matzone
intr' 'e s' ama costois s'anzonedda,
deo naro ch' est bonu che anzone
cussu chi tue male nde faeddas,
no est un' omine mancu mandrone
e no lu timas s'intrat in sa chedda...
...segundu su chi nde 'ogat a pizu
no mi perdes, m' 'alanzas unu fizu...

Giuseppe Pintore *

A narrer ch'es difitzile s'impresa,
mi paret chi siat pagu abberu.
deo mi sento un'omine fieru,
e no so pro ruere in vilesa.
de Paula m'atraet sa bellesa,
e isco mi tenet in cunsideru.
Pero sa mia ardente fiama,
istudare nde la cheret sa mama.

Lussorio Cambiganu 

Connosco de s’ omine ‘onzi pija
Cando si mustrat bellu e zenerosu
Che ruet in sa braja dae cadrija
Chie li ponet fatu dubitosu
Si fiza mia est menzus annija
Chelzo ch’ apet in vida pasu e gosu
No mi bastat sa vana promissa
De la pigare a s’altar’ in missa.

Paola Black ---

Tottu est ca mama disfortunada
de sa vida nd'as tentu mala paga:
naschid' eo, ti ses infiudada;
pritt' un'ater'omine no ti l'abbraga'
ca ses difidente e aghedada
nusches s'aghedu ca de 'tesu fraga'...
...ma issu pro men' est che muscadellu
omine durche, seriu e bellu...

Giuseppe Pintore *

Comente fato es femina dechida
sa chi deo tenzo intro su coro.
Cando chi no la ido mi addoloro
e cando l'ido mi creschet sa vida.
So pessende intro e custa chida,
li naro ca l'amiro e ca l'adoro.
Chi Cupido su coro m'at infustu

Lussorio Cambiganu

 De cantu nd’ ap’ intesu e nd’ apo ‘idu
Totu parian Parides gherreris
Mancunu de issos s’ est atrividu
Che tene de mi narrer ‘ue feris
Su coro chi t’at leadu Cupidu
Est su mantessi c’as impignadu deris
Cando t’ ap’ idu a fat’ e sa laghinza
Chi as coglidu.. e como si ruinzat.

Paola Black ---

S'in sa laghinz'at pàschidu meschinu
est ca troppu s'est agattadu solu
da me no 'ìat ancora cussolu
sa neghe no l'at issu poverinu,
ma deo c'appo coro attarzinu
no bi ruinzo e no mi dat dolu...
...Imbeze proppiu ca est espertu
abberit s'aidu chi no est abbertu...

Giuseppe Pintore *

Assumancu aere tentu su coraggiu
de li faghe s'amore manifestu.
Invetzes timorosu de unu protestu
a pes suos no mi ponzo in viaggiu.
Pesso a sa mama de faghere omaggu
de fiores ca tantu pro su restu,
Non creo abberu ch si nde dolada
los agradessat o che los imbolada.

Lussorio Cambiganu 

A sos fiores deves dare abba
Prima d’ intrare a sa domo mea
Sa rosa ch’ est innoghe no agabbat
Mai d’ esser pro tene una trobea
Prommissas tuas a su jau arrambat
Si no mi cheret ponner in pelea
Tantu ti naro e nde so cumbinta
Chi pro occanno no bo la do binta.

Paola Black ---

Pro men' ettantu deo no lu lasso,
in mes' 'e tottus est su preferidu
pro gai sa vita sola mi passo
ca no nde cherzo ateru partidu,
mancari m'attas sos riccos e rassos
chi sunt in bidda e chi m'as battìdu...
...pro mene sunt pobèros de valore
ca Pepp' est su prus bell' 'e sos fiores...

Giuseppe Pintore *

Mi paret ca bi ando a domo,
o unu paralimpu bi mando.
No isco ses menzus deo ando,
ma no isco sa janna aberit como.
Cantu chelzo deo bene assomo,
siguru nde soe chi la domando.
Cun so risito suos e mirada,
un'isperantzia ona mi dada.

Lussorio Cambiganu 

Cantu disizu tue as ispera
De podere su giannile giumpare
Bives de fantasia e chimera
Ma no as mancu ite manigare
Sa tua mi paret famine vera
E cheres solu mata pienare
no mi naras ite cheres de’ vida
familia, unore o solu pibinida?

Paola Black ---

Cara mama ti naro una cosa:
prite t'impuntas a custa manera
issu cheret a mie a isposa
e deo cherz' a issu chi b'isperat
no ti fettas troppu ismaniosa
de mi cunfinar'in sa ziminera...
...ca un'atteru foghile m' ispettat
et est de s'isposu chi mi rispettat...

Giuseppe Pintore *

Amus a bider dominiga manzanu
a ora e missa l'iseto in sa janna.
Tantu de inie non mancat issa,
che femina ona cantat in osanna.
Bi lu dimando poi de sa missa
si cheret puru a boghe manna.
Comente feridu a su coro meu
issa puru nd'at'a tenne recreu.

Lussorio Cambiganu

 Dominiga manzanu a or’ e missa
Mi podes agatare in sa gianna
No zeltu pro che frigar’ a issa
Ma pro leare una surra manna
Pustis a tie fat’ una promissa
De ti porrire una femin’ e canna
Ebbai cando tenes bene fritu
T’ iscaldis e no restas cuntritu

Paola Black ---

Nademi cantu custa cuntierra
durare det, ca m'est iseliende,
so che sordadu dispersu in gherra
no s'ischit s'est ferid' e s'est molzende,
sa missa est pro mene sutt' 'e terra
chi la sighides gasi moliende...
...Bos pianto ambos in su portale,
mi fuo e cambio caporale.... 

Fine modulo