Zuseppe Monzitta (Pattada)

Su telalzu abbandonadu –

“Bà, ite sun custos pezzos mannos

Chi gighen battos pezzos quadrattos,

custos cannones drittos, bene fattos

chi paren duos sirios de chera,

e custa roda, giradi accera””,

mi narat fizu meu ‘e pagos annos.

“”S’ischias ite fini!, fizu caru,

ti l’ispiego chin paghe e amore,

custu fit unu simbulu ‘e valore

su telalzu, una macchina operosa;

mamma tua nd’ ischit calchi cosa

cando tessiat calchi pinzos raru.

Custa chi paret una trotta ‘e riu

Fuidita e liscia, fit s’ ispola,

su childalu chi girat a sa sola

coscias, peanas, chin s’ ispoladore,

fustes e littos, mi s’iscroccadore

sos pettenes chi dende sun s’adiu.

Subra susta banchitta cossumida

Da e manzanu chitto si spezziate

E chin arte tessiat e tessiat

Saccos, beltulas, telos e fressadas,

faunas bellas, mantas ricamadas

tessiat finamentra a s’imbrunida.

Tappettos coloridos chi paria

Falados dae chelu, sos fiores

Bi pinghiat, massajos e pastores

Baccas e bijos, abes casidderas,

puzones gioghittende in sas aeras,

sa domo custos pinzos mudaian.

Già lu ides Nannè, a dit’ istadu

Est reduidu, rutu in abbandonu

No li essit ne sulida e né sonu

Mesu pupuinadu totu cantu;

como tesset dolores e piantu

mancada issa, tottu  ch’ est mancadu.

Chin s’andare ‘e su tempus, cossumidos

Si sun sos pezzos, in biancu velu,

como cussos tappettos coloridos

mamma tua los tesset in su chelu