In chilca…
Ballan totue a passu torradu:
unu innanti e duos in segus,
paret unu destinu cumandadu:
oe dioi e pustis cras peus.
Sa zente bidet solu su passadu
su benidore paret a manc’ e Deus,
nisciunu chi fatat sa meraviza
de un’ in cras pro cambiare chiza.
Post’ a un’ ala sa mala bramosia
de podere su mundu cumandare,
restat mischina sa democrazia
fat’ a bisera dae su malafare .
Mai una ‘olta, nemmanc’ una bia
chi lugat un' isteddu pro isperare,
su determinu chi su mundu nd’ arrizat
ch’ ido comente fiore chi s’ allizat.
Cantu bi restat de cussu caminu
c’ amus leadu a prim’ arveschida,
cando sa terra che unu lumicinu
aiat azesu sa fiam’ e sa vida?
Forzis sa chera issa c’ at cossumidu
ebbai cuss’ avventura ch’ est finida,
o alu sighin sos seculos a mizas
in chilc’ e Deus o de su c’ assimizat?
Nessun commento:
Posta un commento