essidas.. chin Paula ..

essidas


Lussorio Cambiganu

A ite ses apitu?
Si no bi pesso eo
A ti ponner in motu fantasia
Cuada che s’ eritu
A lorumu ti leo
Pustis mi punghes in sa carre ‘ia
Cantu bi ses pessende
Ti so isperiende
Mi pares tue icona de Talia
Mi donas onz’ intantu
S’ illusione de t’aer acantu.

Paola Black

Ca no bi tenzo novas
de ti contare oe
pro cussu no t'offendas Cambiganu,
de rimas duas crobas
furadas a sas Noe
ti mando como cun sentidu sanu,
peroe chi l'azetas
ti naro si l'isetas
chi semper t'app'in mente fitianu...
...amig' in poesia
già l'ischis chi sa ven'est galu bia...

Lussorio Cambiganu

Già l’isco chi ses bia
Che abba de trainu
Ses frisca, ses donosa e trasparente
Tue ses in mente mia
Che a su boneghinu
Chi mi faghet bene a sa mente
Ses tue bella cosa
Ses amiga diciosa
No t’ ap’ a barattare chin niente
Cand’ aparis innoghe
Est comente chi t’intende sa ‘oghe

Paola Black

·         ---
Intant'unu bi mancat
su ternu cumpletare
ancora no est torradu su gregu
chi custu triu tancat
e tand'a poetare
no est a len'andare che su zegu;
umpar'in tres currimos
chi tantu già l'ischimos
neune de sos tres resurtat legu...
...anzis chin enerzìa
poetamos umpar' in calabrìa...

Lussorio Cambiganu

Pinta ses tue in d’ una foz’ e laru
ilfusta dae lentore su manzanu,
fecundas su sulenu pius raru
cando ti tocco in punt’ e manu.
Onzi mamentu chi t’ ido m’ est caru
su chi mi dolet , tando torrat sanu,
ballos in tundu o passu torradu
peso pro te cando t’ apo miradu.


Paola Black

Biad'a chie rezit cuss'onore
d'esser' 'onzi die in conca tua
ca che Dea la pintas a sa cua
la 'estis d'arc' 'e sole de colores
mancar'iscurza siat e s'est nua
li sestas milli versos de valore...
...e de laru e de frores l'ammuntas
chi paret cun santas in chel'assunta...