Poetas e artistas

Poetas e artistas

Poetas e artistas tot’ impare

unidos  in piata “Fantasia”,

pro poder  una die  abbaidare

su mediu  'e torrare in armonia.

Si damus a s’ ispiru  ite contare

faghimus una bella  sinfonia,

chi  totu  an  a coro  in su sentidu

s’ ispantu  de sa vida  ‘e su naschidu.

M’ ammento   meravizas  ‘onzi die

cando currende fatu  istaio,

a  giogos de imbent’ e   boc’ e nie

su coro  a tocheddos  lu tenio.

Totu  parian  benzende  a mie

sos gosos  e  pauras non timio,

de pumas  e de alas fio estidu

brinchende   sas cresuras  mi so ‘idu.

Gai comente tando,  como so

cando  m’ enit a mente criadura,

prezisu  in rimas ponzo e bos lu do

su c’ amus bidu a prima naschidura.

Su chi fit tando, proite como no

d’ aer  su ben’ e totus gas’  in cura,

‘ucones de pane  cumpaltidu

pro  totu fagher narrer “so esistidu”.

Cale dificultade  nos ingannat

cando su tempus bolat che su ‘entu?

Pro pagu, lassamus foltuna manna

sos dicios, sos amigos e s’ ammentu.

Sas frinas  nos  tremene che sa canna

e  de pauras  faghimus apentu,

paret    a nudda  chi siat selvidu

su c’ amus  fatu e su c’ amus bidu.

Poetas e artistas  bois l’ ischides

cal’ est  in coro ‘ostru  su cossolu,

aculzu e in su punzu la  gighides

s’ idea de sa bellesa  e no solu.

Pintores  in colores lu ponides

cussu cuadru   chi azis tentu a bolu,

 bois poetas , mannos e minores

In su desertu, pradu   de fiores.