martedì 14 maggio 2013

Otieri 'idda de poesia (Pintore, Sini, Cambiganu)



  • De fronte a tantu mi leo su bonete,
    cantareddu bella e famada sese.
    S'annu otighentos norantasette.
    Sa prima gara ana postu in pese.
    A mesu cabudanni in su mese,
    Reunido si sunu sos poete.
    Po idea e Cubeddu mente fadada,
    su babbu mannu chi l'at'aviada.


  • ^^^^^^^
    Beru est Pintore su chi naras tue
    Cubeddu chin Pirastru an fatu proa
    De poesi’ e palcu propiu cue
    An cominzadu custa cosa noa
    Dae tando garas faghene totue
    Ma de Utieri totu restan a coa
    Sa ‘idd’ e sa limba logudoresa
    Sorr’ e Cadhur’ e campidanesa



  •  No est pro casu chi sezis in falta
    pro cussa data chi azis tzitadu
    ca ancora prima e a boghe ispalta
    in sas piattas nostras an' cantadu?

    Frantzisc' Alvaru Mannu 'Erchiddesu
    mortu in s'annu settighentoschimbanta
    in custas garas bi fit sempre in mesu
    apretziadu in donzi festa santa.

    " Deo mi naro Calvia Piga Anzos
    mandigad'apo pan' e sette furros
    in sa gara che curren caddos murros
    ma su pannu lu lean' sos castanzos"

    (Frantziscu Alvaru Mannu nadu in s'annu 1700
    e mortu in s'annu 1750. Fit de sos mezus poetas
    de palcu in tota sa Sardigna) Su pannu fit su premiu.


  • Poetas cun su donu naturale,
    nd'aimis in donni bidda Barore.
    Fines ortueri improvisadore,
    nd'a tentu cun estru geniale.
    Pero Cubeddu a tentu s'onore,
    cunsagrat sa garas ufitziale.
    Pigado sunu de su palcu susu,
    e de tando sa gara est in usu.



  •  M'iscabiddo de fronte tziu Antoni,
    pro sa mannesa sua in donzi palcu
    ca forsit isse b'at postu su malcu
    umpare cun Pirastru e cun Tucconi-

    Ma tando su chi prima t'apo nadu
    no podet esser' una falsidade.
    O Peppe...no mi fettas iscasciare
    Ma forsi no nd'isco sa veridade.

    ( Si tra su 1700 a su 1750 Frantziscu Alvaru Mannu 
    cantaiat in sos palcos... ite bi faghiat?

  • So d'acoldu cun tue de siguru
    isse fit poeta de sos mazores.
    Meritosu fit de totu sos onores
    so narende nd'aiat ateros puru.
    Cantaini a lugh'e sole e a s'iscuru
    in chentinas e in palcos cun fiores.
    A nois cuss'iscola an tramandadu
    deo che tue nde soe onoradu.

  • ^^^^^^^^^
    No chelzo meritos in sa cantada
    Ma una cosa naro pro annotu
    Antoni Cubeddu in Patada
    At apidu su mastru che a totu:
    Alcadu Giuannanghelu, l’at dada
    “CIDDOI” de improveru fit notu,
    impare chin Cocera turronaju
    de s’ improvisu, isse su mastr’ e s’ aju.

  • Ides tando tenzo rejone deo
    ca sos poetas bi sunu totue.
    Ca nudda es faladu dae sa nue
    iscola puru bi cheret pesso e creo.
    So mastros Lussoriu fini incue
    nudda agiungo e nudda nde leo.
    Siana de oe mastros o de una ia
    basta triunfe semper sa poesia.

     ^^^^^^^
  • Restat Cubeddu in custu su re
    Pro primu at fundadu sa gara
    Dende a Otieri .. passu e pè
    A poesia ‘e palcu chi li naran
    Niune: eo, Barore o te
    Podimus a isse negare cara
    D’ aer dadu a poesia connotu
    Ponzenzel’ in orijas de totu

     in efetis, Antoni Cubeddu est giustamente su babbu de sa poesia de palcu, siat pro sa bravura poetica che pro aer istituzionalizadu sa poesia de palcu. Ma est beru chi aiat bera istima de Ciddoi, poeta improvisadore patadesu, de s' ottighentos, chi gighian a mentovu totue, pustis che fineit in presone innozente pro vint' annos, pro s' irrobatoriu de sa domo de babbai letore de 'Antina, pro gulpa de una femina limbi mala. Cando nd' est bessidu dae presone, Ciddoi l' inviteit a sa festa de santu Pedru de 'Antina, a modu sou:


  •  ^^^^^^^^
    Beni a santu Pedru ‘e sa giae
    C hi b’amus una festa diveltida
    A costu de ‘olare chei s’ ae
    Pro te b’ ap’ a ponner anima e vida
    Dae me onzi gustu tes’ aer
    E i sos gustos mios mai s’idan
    Pro chi sos gustos tuos sun benzende
    Passados sun sos mios e passende


  • Lussorio Cambiganu Fit amigu finas de Zuseppe Moritu .. e su mantessi che a Cubeddu li mandeit sos saludos:

    Tantos saludos dadeli a Moritu
    Nadeli chi Ciddoi gia est torradu
    Già cheret lastimadu poveritu
    Cuddu c’ an innozente cundennadu
    Chena fagher mancanzia ne delitu
    Vintun’ annu ‘e trabagliu folzadu
    Chi ‘enzat a lu ‘ider in frigura
    Prima chi siat postu in sepultura

    Moritu li rispundeit

    Bene torradu Ciddoi a Bantina
    Deus ti ardet de peus trabaglios
    Su mundu est unu mare de ispina
    Denzun est sugetu a sufrire taglios
    Solu s’ onnipotenza divina
    No est sugeta a ruer in isbaglio
    Omines semus de terra e de piuere
    S’ umanidade est sugeta a bi ruere


  •  Bellas e de sustanscia, tando is poetas fini sighidos pius de oe, lu imustra su fatu ca custas ottadas, imparadas a memoria e tramandadas de babbu in fizu, es su menzus archiviu chi tenimos in sardigna. 

    Fit narada de is poveros s'iscola
    sena microfon
    o ne registradores.
    Tando attentos sos mprovisadores
    iscultaini sa zente saldignola.
    Sas ottadas andaini ola ola
    teninde in piata caldos umores.
    Oe sunu sos poetas a distantzia 
    ca no cumprendene s'impoltanza.



  •  Una cosa est tzerta chena faddu
    chi siat Ciddoi, Cubeddu o Pirastru
    che los gighimus a sa festa a caddu
    totus meritan' titulu de mastru.

    Pro chie de pius o chie de mancu
    a custa terra nostra an' dadu onore
    e si ancora si cantat in palcu
    est pro si sigat cantende s'amore.

    E mai at a morrer cust'istoria
    ca ch'est in coro a sa cultura nostra
    sos chi sun' mortos los amus in gloria
    sos chi sun bios sighin digna giostra.


  •  ^^^^^^^^^
    In custu trastu at fatu s’ imbaru
    Sa ‘oghe de sa noa poesia
    Mancari no diet fam’ e laru
    La muntenet in mente e coro ‘ia

    Zeltu che Piras e Cubeddu est raru
    Chi nascat in Sardigna o ‘ue si siat
    Ma nessi pro chie cheret cantare
    Dat su modu a totu ‘e s’ agatare

  • So mannos sunu in s'alta sede
    como sunu de issos so nebode.
    chi tessene so bantos e lode
    comente es zustu po sos erede.

    Deu ca es mannu e tantu pode
    ateros poetas at'a cuntzede.
    Mancari in cust'era moderna
    chi sa poesia adduret eterna.


    a Lussorio Cambiganu

    Iscrie, iscrie...ebbiva su rimare
    mai ti manchet cussa bona lena
    cando ti leggio cussa rim' amena
    sero sos brios perdidos torrare
    e cun gioia resesso a olvidare
    sos males chi m'affritzan', donzi pena.

    Semper su coro tue m'as atzesu
    pili nieddu, lutzigu, ruffudu
    puru poeta 'e istile pattadesu
    chi sa musa deghile at isfunadu.
    Bìdende, a donzi cosa ponzo afficu
    ca torras birde donzi ramu siccu


    • ^^^^
      Torrat a mie su bonu sentidu
      Cando agato sonos d’amistade
      Gai comente unu bonu frade
      Paret sa rima tua apo vicinu


      Paraulas pones de calidade
      Chin liricas chi faghes de continu
      In cussa limba de su Logudoro
      Chi ambos nos leat chelvedu e coro

Nessun commento:

Posta un commento