sa cuscescia

Sa cuscescia…

Istanote sa luna sorridente
Ap’ idu.. chi mi faghiat su zinnu
S’ aera tota jara fit fatende
Apo pessadu : “ est de bonu sinnu!”,
cussu chi dae meda fio isetende
comente criadura in su ninnu
in sonnios de morfeo so ‘intradu
mundu bidu mai, ne disizadu.

Sa prima chi m’ at fatu piaghere
Est s’ istrint’ e manu ‘e una Segnora
No pariat teraca e mancu mere
M’ at nadu “sias bennid’ in bonora!!
Narami su disizu,..ite cheres
De su chi pius ti mancat ancora?”
D’ incantu tot’ in d’ unu so restadu
A s’oghe apen’ a issa ap' iscultadu.

“nudda” rispundo, “eo mi sento ‘ene
Mi paret chi no apo bisonzu
Como chi bido a tie, chi totu tenes
Onzi penseri malu s’ est isconzu
In venas paret abba su sambene
Chi abbat su terrinu in s’ atonzu
Onzi disizu como s’ est ‘oltadu
In su chi mai aio chilcadu”

Mamentu chi brincat onz’ istajone
Chi faghet su chelu respirare
Cando sa zente paret a muntone
Finas cando ses solu a ti mirare
Est cussu chi coglit s’ ocasione
De viver chena nudda apitare
Totu in vida .. totu nos est dadu
Est intr’ e nois.. chi cheret chilcadu.