preparende sa resolza

Preparende sa resolza.

Manos d’ abbilidade cossumida

Azenden su calvon’ in sa furrera

In   braja  ‘ia benit  iscaldida

Manigh’ e corros  e perun’ atera

car’ e toru  postas in  premida

In caragolu  e gai las azeretat

Sa  serra  ‘olta  chi  l’at ammesadu
Torrat  in jau  de  frail’ apicadu. 

Cantu su corru istat ilfritende

Unu cant’ e   atalzu  ischirriadu

Chin tenazas  de fogu  afiende

In furrera  che finit  irrujadu

Pustis  cando calura l’ est  riende

s’ incudine li dat  in coidadu

impare a su malteddu  una bisura

a zocos  ‘essit fromma in tiradura.

Cando  fiama est bene tirada

Restat  de tribagliare chin sa lima

Pro l’abbellir’ e galania li dada

a  frailalzu dat  fam’ e istima 

sighit s’ arcu  dae fromma leada

maniga ligat dae co’ a chima

alcu e perras chin su girabbacchinu

chimbe istampos  chin su ribbatinu

s’ aneddu  preparadu  a sa finida

d’ ottone chin motivos isculpidu

benit  postu chin punza ribbatida

li dat  su  gustu 'e pinzu mai bidu

si torrat fiama  a fogu  un' iscaldida

 paris in molle d' ozu ben’ ischidu

tempera, ata  e s’ afiladura

est segretu 'e fama chi l’addurat.