sa tupa..

Sa tupa.

Imbelta s’ est  sa cumpanza mia

no isco pius ‘ue l’agatare,

la so chilchende  in donzi logu e bia

ma paret chi si chelfat  cuare.

M’ at lassadu   in mare a mesania

a solu ..chena  punt’ e la mirare,

mi paret  onz’ intantu  de l’ aer bida

pustis  che s’ umbra  leat sa dipartida.

Mi  naran chi forzis est  drommida

sut’ e  sa tupa  chi leat sa vista,

difatis  s’ ultim’ olta chi l’ ap’ ida

a cue fit dereta .. curva e trista.

L’  apo pessadu ,  cussa fit s’ ischida

comente unu  colpu  ’e pibirista,

un’ attimu  mi so resu cumbintu

d’ aer su mundu in punzu  e isse bintu..

Como chi sa chintolza ap’ istrintu

ap’ a  bessire torr’ a la chilcare,

la sento  folte istringhende su  chintu

paret apit’ a mie pro la giamare.

Mi  fato toeleta e bene lintu

aculzio a cussa  tupa  a  l’ agatare,

luego  narat:  “chelzo restare sola”

e dae  sa  vista mia  si che ‘olat.

Est  sa gioventura  chi che colat

die chin die , sos annos sun passende,

 su passadu sa vida mi consolat

pro como   e pro tempus benzende.

Sa rosa,  in su giardinu e sa viola

eo canto  si su coro m’ est ballende,

de giovanu muntenzo fantasia

sa tupa  brujo  e iscrio in poesia.