Sas chistiones de sa limba sarda

Sas chistiones de sa limba sarda

Su sardu sun puntirinos in chelu
Chi dan sa lughe a tota s’ aera
S’ isteddu pius mannu. Hello michelu!!
Narat “cal’ est sa faeddada vera?”
A faca chin arrogu e tantu zelu
Si pesat de Casteddu una chimera:
“so eo chi Sardigna tenzo in pesu
Pro cussu naro est campidanesu”

“e no” rispundesit su Logudoro
“so eo chi faeddo limba ‘ona,
poetas, iscritores dae su coro
an impitadu custa pro padrona”
totu sun meres de cosas issoro
francu cando atere issos donan
e tando naro a tie no as cumpresu
e restas cab’ e suta inie presu.

Sas ateras istellas triuladas
Totu chi cheren intrar’ in sa parte
Dae Caddura o Tathari faladas
Chi s’ Alighera issas porrin s’ arte
Dae Nugoro, Ozastra issas misciadas
Pelden sas musas e chilcan a marte
Finas su genovesu 'e Carloforte
Cheret fagher parte de sa corte.

Cantu sun bellas sun sempr’ a sa sola
Onzuna chi si isperiat a issa
A niune si mujat sutammissa
E gai tempus e sa vida colat
Restat su fatu chi pro l’ aer bissa
Onzunu posca sa limba che ‘olat
E gai no bi nd’ abbarrat mancuna
a lughe lebia che giaru 'e luna.