Isettende semus de su 'eranu
chi fettat carchi die soliana,
chissai chi nos torrede sa gana
de leare una rima in manu;
gai santu, maridu e mundana
si càntene su ruolu umanu...
...e contet donzunu sa novella
si li paret custa gara ch'est bella...
A-Santu
B-Maridu
C-Mundana
---A) Santu
A mie s'istajone no mi firmat
ca m' 'isto tottu s'annu remonidu
in cumbentu mi che so costoidu
fenas a cando Deus mi cunfirmat,
prima de pecare chie s'arrimat
est semper in su mundu preferidu...
...mancar'ancora no mi conte santu
pro donzi pecadore prego tantu...
---B) Maridu
Divess' est sa mia vocazione
mi piaghet a godir'in su mundu
no app'aer s'ispiritu profundu
ma zertu nd'apo prus suddisfascione
de a tie chi t'istas in presone
voluntariu la giras in tundu...
...sa clausura no est arte mia
ca tenz'una muzer'a cumpanzia...
---C) Mundana
Ma deo chi cun donzi ratza trato
de omines, ca los connosco bene
totus a prima o posca chin mene
s'ispassiant maridos e prelatos,
ch'abiten in cumbent'o in palatos
bisonzu chi s'inare bi lu tene'...
...pro pagare su meu serviziu
a fora de dom' o sant'ufiziu...
---A) Santu
Bae chi no mi tentas pro niente
tue chi ses coment' a Madalena
ca su fogu chi tenz' eo in vena
est fide pro Deus Onnipotente
duncas a nudda balet chi mi tente'
cun su fare tou non m'avelena'...
...Dinare non de 'ogo de buzaca
ca no t'appo in su lettu affaca...
---B) Maridu
De sa paga chi mi traballo deo
pagu nd'idides, mundana e pride,
sol'a muzere mia dao fide
ca l'amministrat e no nde li leo
nen de lu dar'a bois maccu seo
gastandel' in offert' o sifilìde...
...In domo b'agato pan' e recreu
c'a l'est fidele iss'a contu meu...
---C) Mundana
Già bos bantades ambos virtuosos
a banda mi ponides a s'affossa
ma da chi bos ammustro una cossa
sa manu bi ponides viziosos
a mie los pedides bas' e gosos
c'ambos bos corco cun abile mossa...
...e piantades foghil' e altare
da chi su mele bos fatt'assazare...
---A) Santu
De mele non nde tenes un'uttìu
e si l'as, est frutt' 'e merzimoniu
c'andas a brazzett'a su dimoniu
ses frutu chi at manzàdu su chìu
ti chircas aghianu e batìu
pro furàrelis su patrimoniu...
...e su chi portas tue no est mele
ca est pecadu ranchidu che fele...
---B) Maridu
Muzere mia arbule fruttosa
mi dada donzi die su cuntentu
l'apo rispettada 'onzi mamentu
dae cando chi la tenz'a isposa
ca est semper frisca che una rosa
nen mai l'app'intes' unu lamentu...
...prite deo so omin'accabadu
e m'accuntentat reu e corcadu...
---C) Mundana
A bier si tue cuntentas issa
su lettu est affare riservadu
pero' in bidd' a mie m'ant contadu
cando andat a s'iscurtare missa
chi cun s'iscus' 'e fagher priorissa
si ch'intrat a collochiu privadu...
...chin su pridèru intr' 'e sagrestìa
e no est pro li dare un'ostìa...
---A) Santu
Callia, limba mala velenosa
ch'in cresia no bi nd'intrat mundana
che a tie, betza e pilicana
ancor' 'aghiana e disizosa
ses una pibera fatta pazosa
cun su dinare ch'in lettu ti dana...
...De badas no ti mutis Madalena
ca in burdellu cantas sa novena...
---B) Maridu
Tott'imbidia mi paret a mie
cussa chi movet su tou rancore
dae pitzinna pèrdid'as s'onore
e como bies totas che a tie
già ti cherias torrada sa die
pro li negare su primu favore...
...a su cane chi t'at postu farrancas
e t'at pagadu pro aberrer ancas...
---C) Mundana
Cundennades a mie sen'appellu
sen'ischire sa zusta veridade
cando Jesus nd'at tentu piedade
de una femin' 'essid' 'e burdellu
la salvat dae su tristu flagellu
ca si 'endiat pro sa povertade...
...Li narat: "Bae, no peches piusu,
e lassa su traballu ch'as in usu"
---A) Santu
Deus sa Madalen' at perdonadu
ma nar' ite ti podet perdonare
a tie chi pessighis a pecare
e su perdonu no l'as atzetadu
si puru chi ti l'epas cunfessadu
no ti seras in cussu pratigare...
...ti nde beffas de sas preigas mias
prite c'as pecadu ateras bias...
---B) Maridu
Zertu chi su famine lu est feu
ma bi ponet mediu su traballu
cand'un'est sanu no ruet in fallu
ca est de sa famiglia su recreu
accumpanzadu l'este dae Deu
e sa muzere li curat su gallu...
...ma bois miseros iscumpanzados
morides solos sen'esser curados...
---C) Mundana
Arratza de fortuna ch'est sa tua
tenner in dom' una sue anzada
est semper curre-curre unfiada
chi pagu oramai l' 'ides nua
no t'atzetat un' 'asu a s'accua
e ti 'antas d'aer sorte biada...
...pro gai ti allues su luminu
poninde fat' a mie in camminu...
---A) Santu
Finimos sa chistione umpare
sa zann' 'e cresia lasso abberta
e m'ist' innant' in cue a s'allerta
ch' 'enzedas ambos a bos cunfessare.
Cun su poder' 'e Deus samunare
poto donz'anima bruta e ferta...
...e pro sa 'ostra prego de piusu
cun s'azud' 'e sa Virzin' e Jesusu...
---B) Maridu
Deo già bi curro a su pespèru
ca soe cristianu pratigante
e m'app'a cunfessare in s'istante
chissai ch'issa puru tenzat sèru
e chi s'arrendat prestu a s'impèru
de Deus, e piantet sos amantes...
...Ca pro s'anima chi este impura
solu sa fide l'agattat sa cura...
---C) Mundana
Pigamos tand'a turr' 'e campanile
da chi divessas sunu sas campanas
accudan maridos, prides, mundanas
dae burdellu cumbentu e cuile
donzunu sonet su chi at in gana
a segundu de su sou istile...
...E chie s''antat chi no at pecadu
si morzada pro primu irroccadu...
Nessun commento:
Posta un commento