otto 'e maltu

Otto ‘e maltu

No est pro oe.. ma pro totu s’ annu

Pro  deris.. e pro tempus benidore

Pro  dare gratzias  cando primu pannu

M’ at postu .. pustis  de grande dolore

Unu manteddu  chi m’ at fattu mannu

Manos diciosas  chi m’ an dadu amore

Pro custu  e pro ‘onzi cosa dada

A mama  oe  do prima  pessada

Fatu   benit, ma no de sugunda

Sa chi m’ at postu  cuss’ anedd’ e s’oro

Remonidu m’at  dae garrer’ e runda

Donendemi   d’ issa menzus tesoro

Sempre  presente, d’ amore fecunda

M’ at post’ in manos   anim’ e su coro

In  vida mai li  poto  ripagare

S’ ischirriu  ch’ at  fat’ a mi cojuare 

Su donu  chi mi faghet  onzi die

Est d’ ider  battor ojos  controllende

Sos suos   paren  a bias chi rien

Ca  fiza mia e sua  est creschende

Issas impare   m’isetan sempr’ inie

Siat in domo ..o cando sun pessende

De m’ ider  in sa gianna  recuire

Pro poder  in sa vida resessire.

No ilmentigo  parentes e custrintas

Siat mannas  che de  primu fiore

A totu l’ as abbratzo  ben’ istrintas

Torrende lis unu pag’ e calore    

Feminas  al’ ajanas  o puru bintas

Las penso  chin d’ unu sign’ e  unore

Gratzias a totu  feminas  de sa terra

Faghimus  s’ amore e no sa gherra.