Nunnale (foto Silvestra Pittalis)

Nunnale

Custu manzanu  a prim’ aurora

Cando sole no at fat’ arveschida

Dae Orune  apenas in fora

Falende   a Marreri t’ apo ida

Est su chi fato donzi di’ a talora

Ma  oe duda m’ at postu s’ essida:

“proite  ses  goi in mente mia

morta  ses tue..o puru ses bia?”

Si  pedra  ses,  chie t’ at postu cue?

Zigante sentinell’ e su canale

Narami  si podes, chie ses tue

Antig’ abbitadora de Nunnale?

In pes pares chi sias subr’ e nue

Bijones  de astru  zelestiale

E tando  rispunde a sa dimanda:

“chi’ est  in custu logu chi cumandat?”

Mi paret  d’ aer apidu cumpresu:

“ses tue chi ses de  vida mere

Si l’amas.. no ti faghes  arresu

Isposala  che sa menzus muzere

No sias  dae sos pregiudiscios presu

Faghe  sa cosa bona in piaghere

Perdona, sias donosu e zentile

E s’ animu  ti fiorit che in abrile”

Olvidos, s' iscritura sarda antiga...

Olvidos..

Paraulas postas in sas pedras ladas

Piramides,  pabiros  de s’ Egitu

In losas dae totu profanadas

S’ agatat  sa cultura e su diritu

Comente  sunt naschidas e bistadas

Totu s’ ischit  de cue  in cussu situ

innoghe   restat  su passadu vanu:

naschida, vida e sardu sambenadu.

Ell’ ite sunt, totu sos  sacros putos,

Pedras ficadas, dolmen, tumbas antigas?

Domos de janas, megaliticos rutos

Nuraghes  e sas turres  amigas?

Parimus comente canes iscutos

Pistados dae  faltas e sas brigas

E puru b’ est  de Uta su gherreri

E  brunzos chi  nos narant su misteri

Sos  annos   sunt passados a mitza

Cando  altu s’ inzegnu  s’ est pasadu

S’  urgogliu t’ at cambiadu chitza

Chi  alu bidimus.. ca est restadu

De  artes   e  cultura ses sa fitza

Comente mama ses de s’ olvidadu

Totu  paret chi restet  in presente,

franc' in sa limba 'e sa sarda  zente.

INVICTUS (William Ernest Henley) s’ invincibile

INVICTUS (William Ernest Henley) s’ invincibile

Dae su profundu de sa notte chi mi inghiriat.
 Niedda comente unu putu.. dae unu polu a s’ ateru.
 Torro gratzias a cale si siat Deus chi esistat 
pro s’ anima mia chi non si dat binta.

In sa mala istrinta de sas circustantzias
 non so torradu in segus nen apo abboigadu.
 Suta sos colpos de 'istrale de sa sorte. 
Sa conca mia insambenada, ma no abbasciada.

A cuss’ ala de custu logu de airu e de lagrimas
 benit solu s’ arrore de sas umbras. 
Et alu sa mineta de sos annos m’ agatat
 e m’ at agatare chena timoria.

Non at impoltu cantu istrintu siat su passatzu.
Cantu columada de penas sa vida.
 Eo so su mere de su destinu meu.
 Eo so su capitanu de s’ anima mia.

(sa poesia fit impitada dae Nelson Mandela pro illetzerigare sos annos de presonia cando bi fit l'apartheid.)

s' uguale

s' uguale

Uguale.. pretzisu e cabale
Ca giustu ponet passos in totue
Uguale su juu noale
Chi sulciat sa terra in cue
Paris andant sos animales
Comente naras paris eo e tue 
Diritos, sonnios paren detzisos
Uguales non sunt totu pretzisos

manna s’ aparit in sa diferentzia
sa lite tra diritu e capitale
In terra falza ‘e democratzia
Mercadu in fainas de su male
Sutammissa lege de prepotentzia
Mancu tempus paret pius uguale
S’ illongat pro chie nd’ at fat’ abusu
Delusu de isse .. est su bon’ usu.

su diritu

Su diritu

Si giustu est su dovere

It’ est  in su dovere chi est giustu?

Dudas chi dant anneu

In mesu a su dolu o piaghere.

Su frutu de s’ argustu

Est bonu  cando est furadu o meu?

Dubbios e dimandas

Postos  dae semper .. solita risposta

“sa lege l’ at detzisu”

“Pro bene de su populu l’ at posta”

Mancu su paradisu

Ti cheret si no cumpris  s’ iscritu

Lu narant sos zuighes

Chi  deves in sa vid’ andare dritu

Ebbai totu serviles

Semus de leges  emalu  diritu

Siant  de atza o viles

Iimpresonados  totu nois semus

Chena gulpa peruna

Cundenna  chi  no torrat ma’ in segus.

custu amore - boltadura dae "questo amore" ...di jacques prevert

custu amore boltadura "questo amore" ...di jacques prevert 

Cust’ amore

Gai violentu

Gai fratzile

Gai tenneru

Gai disisperadu

Custu amore

Bellu che sa die

E malu che su tempus

Cando su tempus est malu

Cust’ amore gai beru

Cust’ amore gai bellu

Gai cuntentu

Gai  allegru

E chi si nde faghet befe

Tremulante de paura comente una criadura a s’ iscuru

E gai seguru de sé

Comente un’ omine trancuillu in coro a sa note

Cust’ amore chi impauraiat sos ateros

Chi los faghiat faeddare

Chi lis faghiat  sa chitza mala

Cust’ amore ispiadu

Ca nois l’ ispiaiamus

Pessighidu feridu apeigadu ochidu negadu e ilmentigadu

Proite nois l’ amus pessighidu feridu apeigadu ochidu negadu ilmentigadu

Cust’ amore totu intreu

Alu  gai biu

E totu solianu

Est tou

Est meu

Est bistadu su chi est ‘istadu

Custa cosa semper noa

E chi no est mai cambiada

Bera comente una pianta

Tremulante che putzone

Calda e bia che s’ istiu

Nois podimus ambos

Andare e torrare

Nois podimus ilmentigare

E pestantu torrare a drommire

Ischidare  peleare imbetzare

Drommire alu

Sonniare sa morte

Ischidare  rier e riere

E torrare a minores

S’ amore nostru est cue

Revessu comente s’ ainu

Biu che su disitzu

Crudele che sa memoria

Macu comente sos rimpiantos

Tenneru che s’ ammentu

Fritu che su marmure

Bellu che sa die

Fratzile che una criadura

Chi nos abbaidat riende

E nos faeddat chena narrer nudda

Et eo l’ isculto tremulante

E abboigo

Abboigo pro tene

Abboigo pro mene

Ti suplico

Pro te pro me pro totu cussos chi si amant

E chi sunt amados

Eja eo lis abboigo

Pro te pro me e pro totu sos ateros

Chi non connosco

Frimmadi in cue

Inue ses

In cue, ‘ue ses bistadu ateras bias

Frimmadi

No ti movas

No ti nd’ andes

Nois chi semus amados

Nois a tie amus ilmentigadu

Tue non nos ilmentighes

No aiamus che a tie in custa terra

Non nos  fatas diventare astragados

Finas si meda atesu semper

E no importat inue

Dae – nos unu sinnu ‘e vida

Meda pius a taldu in sas manchinas de unu buscu

In sa foresta de sa memoria

Pesadinde como

Dae – nos sa manu

E salva – nos.

ojos de manos (Louis Braille,)scultura di Antonino Ruggeri

ojos de manos

Pro  ti poder gosare

Cun  ojos de su coro eo ti miro

Sa vida ap’ a tocare

cun manos  fat’ a ojos eo m’ ispiro

per poter  gioire

con gli occhi del cuore ti guardo

toccherò la vita

ispirandomi  con le mani  che osservano