- Tempus de ferias --- Austinu Nieddu poeta de Lei de 96 annos in grascia 'e Deus .. (Masia.. Pintore.. Cambiganu e Sini)

-- Tempus de ferias ---  (Austinu Nieddu)

Sa musa sas ferias s'at leadu
e sos poetes sun in vacanzia
de su cant' intendo mancanzia
ca so in domo solu arrimadu
cando cantos torran in bundanzia
tando so deo chi rest'ammudadu
...pur'eo nde tia tenner meritu
de pasu, ca so 'ezu derellitu...

Apen' apo sa feria finida
bos dimando subìtu su cungedo
dae 'ois amigos mi dispedo
pro mi ch'andare a s'atera vida
tantu si est sa fortza cossumida
e ispassos pius no mi cuntzedo...
...como mi ponz'in totu a reposu
pro cantu so 'istadu generosu...

• 
  

  Francesco Masia .
  
  

  Faghimus sas personas serias
  sos poetas non de tenen dinaris
  terrinu non s’acciapada in paris
  cà non podene andare in ferias
  in Italia abbundana sas miserias
  e si los sonniana montes e maris
  si calcunu s’est ‘istejdu e abbandadu
  est cà contos in familia non at torradu
  
  prima de leare cungedu
  cumbenidi in sa vida de approffittare
  ancora b’at tempus a pasare
  si maladia non b’at a impedu
  si b’est s’aggiudu de S.Perdu
  bi restat ancora tempus a poetare
  pro como istade pacadu e serenu
  rimende fintzas a s’urtimu alenu
  
• Giuseppe Pintore *
  
  

  Chi manca sa salude nd'apo dolu
  e sa musa no si pode permitede
  de si pasare ca in oriolu
  ruet chi si firmat es de amitede,
  su versu sena cumandu solu solu
  si pesat e non cheret l'imbitede.
  Es solu unu mamentu e rilassu
  ma luego torrat a move passu.
  
  Mi paret fea cussa profezia
  lassamos a un'ala su turmentu.
  Ancora auguro pius de chentu
  a mente sana cantende in poesia.
  Deo po cantu poto cumpagnia
  li fato siguru in donni momentu.
  Totu custu bastat de lu cherrere
  ca podimos su grifone aberrere.
  
• 
  

  Lussorio Cambiganu ^^^^^^^^^
  
  

  Lastima.. no mi faghes Austinu
  No leo in cussideru su lamentu
  Anzis a tie imbidio de continu
  Pro zeniu in poesia e su cuntentu
  Comente carradellu de su ‘inu
  Mezoras finas posca de sos chentu
  Postu ses como a ti lamentare
  Ma est solu s’ iscuja de cantare
  
  Zeltu ti lean a conca sos ammentos
  Fiotos de piseddas riende
  Cando cuntivizais sentimentos
  E fatu lis estaias currende
  Como ateros disiz’ e apentos
  Los bides e luego ses tenzende
  Sas dies chi tue bides passare
  Est cantu pius podes amare
  
  Salvatore Sini 
  
  Custu lamentu tou tant'accoradu
  appenas como l'apo lettu e bidu
  ma già atera ia t'apo nadu
  de no 'istare frimmu e avvilidu,
  manc' un' aizu tue ses mancadu
  ca intro 'e coro nos ses arruvidu.
  Leadi cussas ferias meressidas
  e torra lestru cando sun' finidas.
  
  Austinu Nieddu
  
  A totucantos bos rendo s'omaggiu
  pro chi tevidu m'azis iscurtare
  ma no bos poto mancu premiare
  ca mi sezis cumpanzos de viaggiu
  como so deo chi rest' a disaggiu
  no bos pot'in su cant'accumpagnare...
  ...c' a s'edade mia lu cumprendides
  chi totu sas fortzas las perdides...
  
  Si l'ischizis cantu nde so cuntentu
  su 'e intender su 'ostru modellu
  azis intesu su meu lamentu
  subìtu respost'azis a s'appellu
  bos saludo cun tantu de cappellu
  ca mi tenides ancor' in ammentu...
  ...mand'a totus unu saludu caru
  cun sa poetica coron' 'e laru...