saludos a Bruno Agus (Pintore, Sini, Canova, Cambiganu e Bruno Agus)

Saludos a Bruno Agus

Giuseppe Pintore

Benennidu.

Grascias Bruno de sa richiesta,
cantu so cuntentu no as'a crere.
Deo so promotore,ma non mere,
che cuddu tipu chi cosit e sesta.
A t'aere chi nois est piaghere,
cumpadi sa musa umile modesta;
damos su tantu c'amus in podere,
passamus s'ora parimus in festa.

Ispero solu enzat agradessida,
passione costantzia cun impignu,
chi bi ponimos ma sena prettesa.

Tue mastru as'a bide sa resa,
consizeri sias e tzuighe dignu,
in parte totus ti do sa benennida.

Salvatore Sini

 S'aer' inoghe musa gosi digna
già est pro totus un'onore mannu
tzertu chi tue dai cuss'altu iscannu
fages ondra a nois e a sa Sardigna-

Lussorio Cambiganu ^^^^^^^^
^^^^^^^^

Tue de poesia testimonzu
A bolu in donzi palt’ e sa Sardigna
Deus ischit cantu b’ at bisonzu
De muntenner azesa cust’ insigna
Chilcamus de bi ponner aconzu
a modu chi su populu s’ impignat
che tie, Zizi, Masal’ e Pazzola
Piras e Seu..no la lassemus sola..!!

Si podes dae unu colpu ‘e manu
A custu grupu ‘e umile pretesa
Sa ‘oza e poesia est a cumone

De unigu sinzeru testimone

Betamus versos gai.. a mente ispresa
In diveltera de cantu profanu 

Francesco Canova ***

Ha su poeta d'essa baronia
ò puru ha su poeta otzastrinu
des sos palcoso unu paladinu
e a bolu cun bona poesia
su publicu mantenet'in'allegria
ca est cussu su sou bellu destinu
chi sa natura gia lada dotadu
e sias tra nois bene arrivadu...

Bruno Agus

 Grascias pro m'aer tra hois inclusu
e a sa sorte chi a bois m'amigat.
Bi at zente meda chi a palcu non pigat
e chi de mie balet de piusu.
E guai chi si fetat illusu
su chi a sas noe musas si bi ligat.
Certu b'est chie at pius aguantos
ma jà semus poetas totu cantos.

Salvatore Sini

 Pigar' a palcu no est cosa 'e pagu
ca bi cheret sa vena e su talentu
cun sos bessos che cristallinu lagu,
sos nostros si che 'olant cun su entu
ca pro sas musas semus de intragu
e solu lu faghimus pro appentu-
Tue chi ses pigadu in alta chima
sias pro nois duttor' e meighina.

Lussorio Cambiganu ^^^^^^^

Sas festas in donzi campanile
Fin allegradas dae sa poesia
Garas de lota o de cumpostile
Cubeddu a issas imbentaiat
No b’at misteriu.. e perun’ istile
Chi diat sa vena a chie no li naschiat
Comente chie de copas premiadu
Bos conto de Ciddoi su contadu:

“isculta caru populu festante
Custa como ti canto e poi m ‘arreo
‘ennidu so che un’ istella errante
Dimora. Logu fissu no ch’ ap’ eo
S’ essera puru unu Ariosto o Dante
So seguru chi premiu no leo
Ca ch’ at beniaminos apogiados
Chi sun chena cantare premiados”

Custa otava, Ciddoi la canteit in Buddusò.. no bincheit sa gara… ma posca de custas paraulas.. unu de su comitadu fateit sa coglieta..e risulteit premiu pius mannu de su ‘inchidore. Ciddoi, patadesu, staia semper in cuntierra chin Limbudu, si fateit 21 annos de tribaglios folzados.. pro reatu chi at semper negadu.. “s’ irrobatoriu de sa domo parocchiale de ‘Antina”, at fatu poesia meravizosas, e Antoni Cubeddu e Moritu.. lu cussideraian su mastru issoro..

Fine modulo