bentos cuntrarios (foto g.p. Melis)

bentos cutrarios

Est de sa vida chi si leat s’ unda
Et issa chilcas de poder montare
Alciat a subra o posca ch’ afundat
E tue chena nde cherrer falare
No est zereta e nemmancu tunda
Culvas, pigadas b’ at de suberare
Bentos cuntrarios chi frimman sas alas
Bolas in altu.. si sulan a palas

menzus bellesa non b'at .. (foto di Giampiero Melis) bellezza di Dorgali.

menzus bellesa non b'at

Tantu  ses  fata pro ti narrer bella

chi no  s’ agatat unu paragone

nemmancu  sa pius lughent’ istella

brillat  che tie in perun’ ijone

tue de sa bellesa reginella

dea  impar’ a Venus e Giunone

si mai si nd’ at bidu in sa natura

a tie  at copiadu  e ti lu furat.

una limba normale, moderna e antiga

Limba  moderna e antiga.

Milla !! chi nd’ est  bessende  dae s’ inserru

De annos  chi  l’ ant fata reposare,

Sos cancaros astraos de s’ ijerru

 Chi  faghen  sa lutzana  intostare.

Tancada  in su buju  de l’ ilferru

Diaulos  chi  l’ ant fata penare,

Como  paret  si tochet  cun sa manu

Cuss’ abba  ‘e cominzu de beranu.

Ses beru chi  de sardu ses amigu

De  limba  ses su primu difensore,

Su coro e sa mente gai l’ impignas

Pro dare lughe e vida a sa Sardigna.

Est  su dovere nostru  e s’ unore

D’ aer  siat  presente  che  antigu.

hapo piantu (traduzione dalla poesia di Silvestra Pittalis "ho pianto")

Hapo piantu..
(traduzione dalla poesia "ho pianto" di Silvestra Pittalis)

Hapo disizadu una funtana de abba bia
E hapo piantu,
pro lassare andare lutias de ammentu,
chi leant s’ anima
e la bucan.

Hapo sonniadu de cantare odes a su bentu
E hapo piantu,
in dd’ unu bolu chena fine de s’ immensu,
chi si perdet in sas paraulas
e in su mudine.

Hapo iscritu de amore pro sos frores
E apo piantu,
in s’ ammentu de su colore chi ilgiarit,
e si perdet in sa sicagna de su giardinu
e chena lamentu morit.

Hapo tremadu chin sa pinna in manu
E hapo piantu,
istrinende sos penseris mios in su boidu,
in sa pagina ilfusta chena tempus
e hapo bividu.

..E ho pianto - Da: "Pensieri scavati nel tempo" - Silvestra Pittalis

Ho desiderato una fonte d’acqua viva
e ho pianto,
per liberare gocce di memoria,
che assaltano l’anima
e la traforano.

Ho sognato di cantare odi al vento
e ho pianto,
nell’infinito volo dell’immenso,
che si perde nelle parole
e nel silenzio.

Ho scritto d’amore per i fiori
e ho pianto,
nel ricordare il colore che si spegne,
si perde nella secca del giardino
e senza un grido muore.

Ho vacillato con la penna in mano
e ho pianto,
nell’offrire i miei pensieri al vuoto,
nella pagina bagnata senza tempo
e ho vissuto.

“ammentos chi m’ iscaldin su core”

“ammentos chi m’ iscaldin su core”

Tio cherrer torrare un’ iscuta 
A poder sol’ a tie iscultare
Cando a s’ uca ‘e totu ischias dare
Cuss’ umile boghe gai funguta
Como chi in s’ olvidu pares ruta
In medas ti tian cherrer chilcare
No ischint chi bastat de ti amare
Pro ponner torra totu subr’ a suta.

Frastimos , boghes bellas de amore
Sos cantigos in bidda ‘e mesaustu
Sa mama chi brigat sa criadura

Pro li dar’ e sa vida amparadura.

Totu in limba sarda fit custu
“ammentos chi m’ iscaldin su core”

su 'asu

Su ‘asu

Su primu ‘asu chi nos dat sa vida
Est cussu chi nos torrat a sa mente
su caldu late ‘e mama a s’arveschida
disizu ‘e vida , e de vida semente 
paret chi siat bon' usu in dipartida
de narrer “mama mia” torra presente
cuss’ asu de sa prima naschidura
chelzo gosare torra in partidura.

Totu   sos milli.. e milli pius ancora

Porridos o furados  a sa cua

rezidos  da' una dea  incantadora

Dae giuda falzu chi a niune ajuat

Chie  sos pes  basat  et   onorat

De  anzenos  ..  comente mente sua

Totu custu  basare est in difetu

Ca no cumprit  de vida  diletu

Unu basu  est bellu e corporale

Cussu chi passat a su coro alenu

Cando  in su  disizu  est uguale

S’ affetu  chi si donat chena frenu

Donzunu  est  unicu  originale

Comente primu ‘asu dadu a lenu

Penseri, gosu  e de natura fatu

custu menzus est de, laras  cuntatu

No est domo chena ziminea azesa.. in ijerru

-No est domo chena ziminea azesa.. in ijerru



“Dezisamente.. diluviat

- arrusti sa castanza

“So iscriende una paristoria
..e diluviat
Randine e bentu meda forte”

-A ite ses pessende?

“chirco de non pessare , sinono est sa fine”

-Ite rumores ses intendende?

“S’ abba chi adobbat a sa cobeltura
Sighit chena abbacare
Sos tronos
Su sulare de su bentu”

-E tue?

“Eo no supolto su nieddore
Mi piaghet s’ abba chi mi ruet subra
Mi liberat..
Ma su chelu nieddu no lu bataglio..
Ruet..”

-Tias cherrer s’ abba chena nues?

“sole e abba..
.. a bias capitat, ma custu est
Unu diluviu chena fine.
..Est unu piantu de dolore”

-Tue cheres abba de beranu.. 
ti piaghen sa lagrimas de gosu.

“dezisamente eja.. las prefelzo
Mi piaghet su fritu
.. bastet chi no mi arrochet intro ‘e domo”

-Mancari su lentore de su manzanu..
 o puru sa ‘eddia de prima iscurigada

“disizo su nie
.. ma est diventadu unu miraju
 dae annos a custa parte
—cuss’ aria frita e sos giogos chin su nie,
 mi mancan meda
… Non est ijerru chena nie.”

-No est domo chena ziminea azesa
.. in ijerru