de sa vida misteriu

de sa vida misteriu

^^^^^^^^

Vida  est  una  e restat su misteru

d’ esser  cominzu e fine d’ onzi cosa

naschid’ e morte inie armoniosa

de su bon’ usu ripagat de a beru

s’ amore   est  s’ amigu sinzeru

chi rendet  issa galan’ e donosa

sentidos bonos la faghen diciosa

pinta de bellu e de gosu  imperu

no balet de la pelder  in  anneu

in odios, gherras e avididade

sa dies passadas chi no torran mai

s’ ilmentigan  che nudda  a giummai

serenu  unu mundu in  amistade

diat esser  pro sa vida  unu recreu

s' imperadore de ..sa mente

s' imperadore de sa mente

Semper inie restat in sa mente
Cussu chi totu li namus errore
De su passadu alu restat presente
Su chi at causadu unu dolore
Est gai chi su meda de sa zente
Narat: est gulpa de s’ imperadore
S’ istoria si ripitit e in sa vida.. 
gai che semper paret como finida

triulos chi nos pedin tempu e gosu
seberas chena contos bene fatos
tantu pro rinunziare a su reposu
faghimus che sos canes chin sos ‘atos
si populu no binchet su ‘elosu
no b’at menzus in sos duos latos
siat a manca che a sa dereta
s’ imperadore restat sa retzeta.

Pro narrer “W sa democrazia”
Bisonzat de la biver in su coro
Onzunu podet dare de su sou

Pro mudare su mundu dae nou

Ma si cussa richesa restat s’ oro
Binchet s’ imperador’ atera ‘ia.

Mischinu.. ma mischinu chi' est?

Narat mischinu.. ma mischinu chi’ est?

Che musca ruen a sa die mala

Sentidos chi morin impar’ a issos

In undas de sos mares e abissos

Chi paltin dae sa cost’ e s’ ater’ ala

Pecados chi  nos restan in sas palas

E in su coro an a restare fissos

Issos in chelu an a esser ammissos

A nois  in sos fungutos totu falas

Mischinu .. chie  “mischinu narat”

Ma dae domo sua  no movet pes

Tancat sa gianna..su cor’ e sa mente

Cuadu  intro ‘ e cussu  continente

Totu  li paret  sou .. ma nudda est

Si  nemos in sa lughe lu cumparat.

Santu Franziscu .. su cantigu de sas criaduras (traduzioe dal cantico delle creature)

Santu Franziscu .. su cantigu de sas criaduras

Mannu, onnipotente Segnore diciosu.

 Tuas sunt sas laudes,

sa gloria e s’ unore et ‘onzi beneiscione.

Solu a Tie, Mannu, si addeghen,

 e perun’ omine est dignu de ti mentovare.

Sies laudadu, Segnore meu

chin totu sas criaduras tuas,

mescamente segnore frade Sole,

su cale est die, e nos illuminat pro isse.

Et  isse est galanu e luminosu

chin isplendore mannu:

de a Tie, Mannu, gighet sas intragnas.

Sies laudadu, Segnore meu,

pro sorre Luna e pro sos isteddos:

in chelu la as frommadas

 giaras, pretziosas e galanas.

Sias laudadu, Segnore meu,

 pro frade bèntu E pro s’ aera, sas nues

e su serenu et pro dònzi tempus,

pro su cale, a sas criaduras tuas das sustentu.

Sias laudadu, Segnore meu,

 pro s’ abba, sa cale est meda utile

 et umile et pretziosa et bìnnida.

Sias laudadu, Segnore meu,

pro frade fogu, pro su cale illuminas sa note:

et isse est bellu e giocundu et robustu e forte.

Sias laudadu, Segnore meu,

pro sorre nostra mama Terra.

Sa cale nos sustentat e guvernat,

et produit  divescias frutures

 chin fiores coloridos et elva.

Sias  laudadu, Segnore meu,

 pro cussos chi peldonan pro amore Tou

e sustenin maladias e tribulias.

Beados cussos chi sustenin sa paghe,

 ca de Te, Mannu, sian incoronados.

Sias laudadu, Segnore meu,

pro sorre  nostra, morte corporale,

da sa cale perunu omine vivente podet fuire:

guai a cussos chi an a morrer in pecadu mortale;

beados cussos chi s’ana at agatare

 in sa santa voluntade Tua,

ca sa morte chi at a benner

 no lis at a fagher dannu.

Laudade e beneighide su Segnore meu

e ringratziadelu et servidelu chin grande umilesa.

sole e terra

sole e terra

^^^^^^^^^^

Cantu  isto innoghe pessende

Sa terra  faghet  inghirios in tundu

Unu  tra iss’ e totu l’ est fatende

S’ ateru   tra su sol’ e custu mundu

Cando a una palt’ est basculende

Cambian sas istajones in su vundu

Cand’ una perra  est  a  cara sua

S’ atera  drommit  e restat  a sa cua

amore

amore

D’ amore est fatu su mundu
E ligat totu cantu su criadu
A bias isse curret vagabundu
In chie no l’at apreziadu
Ma sempr’ inie lu gighet in tundu
Isetat solu d’ esser invitadu
A ponner passos intr’ e su giannile
De chie at s’ animu gentile

Su sentimentu pius decantadu
Su pius chi est post’ in poesia
Sempre totue est istadu chilcadu
a s’indonu natura lu daiat
Pro cantu siat isse ilmentigadu
Cando bi fit su coro zocaiat.
a niune si podet negare
bastat de lu contivitzare.

S’ amore no est solu passione
Nemmancu est solu sentimentu
Est rejone, materia e pessone
Est benidore, presente e ammentu
S’ Amore a sa dereta si ponet
de su Segnore e su firmamentu
Est sa parte chi dat a sa vida
Sa forz’ e narrer “issa l’ap’ inchida”

De amore si pienat sa ‘ucca
Cando no at in coro su reposu
Gai faghiat sempre padre Luca
Cantende a finta cussu veru gosu
Totue est.. e sempre si tucat
Finas in logu pighidu e iscurosu
No est cosa chi frimmat sa mente
Ca trazat su destinu de sa zente

Totu est gulpa de s’eternu Dante
Ch’ at postu in poesia sa trisca
De animas in ilferru errantes
Notas comente Paul’ e Franzisca
A issos mi paret simitzante
Su sentimentu chi tropu  arriscat
pro cantu però isse s’ arrempellet:
“amor che move il sole e l’altre stelle”

S’ amore est chei sa poesia
benit cando paret pius atesu
presente no est zeltu chi bi siat
B’ at mamentos chi pius est azesu
che sa braja chi restat semper bia
In d’ unu furru chi est ben’ inchesu
Amore.. amore… amore et amore
Ite bella paraula ………….. amore…!!

bonu e malu..

bonu e malu...

^^^^^^^^^^

Sa terra, chelu, mare e abbitadores

Sun  issos chi bidimus  not’ e die

Donzunu pessat  “totu est dadu a mie”

-Lu chelzo, francu  pelea e dolores-

Gai, parimus che sos professores

Chi solven  beru e falzu che nie

De totu  si buglian e si nde rien

Mai  chi  muden  dae sos errores

Politica  dae semper si narat

 s’arte de cumbinare  zente in pare

ma cando issos  faghen presentada

paret de l’ aer como inventada

b’ est totu  cantu iscritu in sa natura

bonu e malu.. in s’ omine b’ addurat.