zegos.. "scultura lignea di Antonino Ruggeri"

 zegos

Assustos  e  tristura  die chin die

Si pesan  dae terra in donzi logu

Niune chi  nelzat: “nade a mie”

Totu fuin  a  preta  ‘e custu fogu

Paret brujadu, ma no s’ ischit  chie

L’ apat  bogadu a malu disaogu

Pagu bi restat de sa nobilesa

Connota  prima d’ essere represa

Fuidu  s’ est impare  a su  tribagliu

Su   pius  bonu  de sos sentimentos

Su dare  amparu  a donzi  bisonzu

Paret   giogu antigu.. ma isconzu

Totu  pienos  sos ojos de lamentos

Chi  biden sol’ e ateru s’ ilbagliu.

 

torras in libeltade ,,!!

torras in libetade

^^^^^^^^^
Ite nde pessas de sa libbertade
Cando una cadena t’ at ligadu?
Narami tue.. nara in veridade
Si custu deris aias pessadu.
O forzis pessaias che s’ anade
De poder bolare che in passadu
Siat in s’ abba de su riu ‘ogadu
O subra ‘e muros de sa realtade

casu marzu

Casu marzu

It’ est chi ti  dat a tie sabore?

Su  tempus ,chi forzis  t’ at frommadu

O puru ca ti s’ at ilmentigadu

Chena giradu  deris su salidore?

Sa musca in su coro t’ est ‘intradu

Cambiendedi  su tastu  e su colore

Comente unu  ‘ etzu  licore

Ses tue  in totue disizadu

Fatu ti ses:  marzu.. cas’ elveghinu

Pessende  chi fis  de  pagu contu

Imbeze  tantu ses  pretziadu

Dae cando su  bobboi ti ses pasadu.

Zeltu no ses manigu pro  tontu

Chi  no  at connotu de sa vida  abbinu.

  

sa presentada (Capra, Black, Pintore Masia e Cambiganu)

Sa  presentada

Cosimo Capra

Ringratziamentu poetas noso 2

Ateruna familia acuistadu,
e apo amigos noso iscobeltu,
como inoghe puru che so feltu
pustis d’aer apena preguntadu,
e comete sa janna apo bussadu
gai cun gentilesa m’ana abeltu.
Isperantzosu fia ‘e m’atzetare
Po bos poder de coro saludare.

Giuseppe Pintore *

Es bellu Gosamu in donni zassu,
chi bi tenes amigos e parentes.
Chi sunu allirgos e divertentes,
tando tenes afetu cun ispassu.
Ue poesia zirat frecuente,
sa vida si che colat a discassu.
De custu sias persuasu e siguru,

Paola Black --- 

Lezitimu este a preguntare
e respunder est una cortesia,
in custu situ ca b'at poesìa
totus semus usos de atzetare
poet' amantiosu calesiat
bastet sa Limba nostra faeddare...
...Sas Musas nemos lassan a s'assuta
siat chi canten fiss' o un'iscuta...

Lussorio Cambiganu ^^^^^^^

Gosimu, in tratu ‘onu tue nde colas
Mai ti mustras coment’ invasore
Dae sa pesada noa a innoghe ‘olas
Sighende sa semida de Pintore
sos versos in paraulas bellas molas
comente trigu su mulinadore
gai che pane in furru ben’ inchesu
bogas sabore de limba ma’ intesu.

Francesco Masia .

Non mi podia esonerare
de ti mandare mannu saludu
de una cosa so tzertu e siguru
chi bene in noghe tas’acciappare
si ti piaghede in rima a cuntierrare
siguramente non est logu mudu
pienu de poesia e bella tzente
chi a donzi appellu est presente..

Cosimo Capra 

Beru  Rino,non so un’invasore
S’ap’in manos sa palma e s’olia,
mi piaghet sa ostra cumpanzia
jeo l’apo a bantu e a onore.
Sos bantos chi mi das in poesia
No isco si nde so mereschidore.
Pane onu ma de bonu sabore
no nde faghen solu in Baronia.

Pane de trig’in totu sa Sardigna,
Gai sa limba sarda de Logudoro
De Gaddura , barbagi’e Campidanu.

Jaios nostros no l’an dad’in cunsigna,
bene la mantenzemas in su coro,
non la miscemas cun s’italianu.

Lussorio Cambiganu ^^^^^^^^

Est beru custu cantu fitianu
Nos ponet totu in allegria
Comente bona sa pregadoria
Est pro s’ animu cristianu
Grupu ‘e cantu comente cumbessia
Paret custu chi gighimus in manu
Dae logudoro, gaddura e campidanu
Sardigna totu est in poesia

Simula ‘ona, e grogu fremmentalzu
Misciamus tot’ impare in s’ impastu
Gai carasau, poddine e civraxiu

Damus a su zovanu e a s’aju
S’ italianu chi est un’ impiastru
Che l’ imbolamus in su muntonalzu

• Cosimo Capra
  
  Da su Sarrabus fin’a s’Asinara 
  dae sant’Antiog’a Madalena, 
  cantan in poesia a boghe lena
  cantan in poesia a boghe jara,
  e su cantare no est cosa rara
  in donz’idda ripitin cuss’iscena.
  Sa limba nostra tenimu-nolla cara,
  senza limba su populu est in pena.
  
  Est sa limba sa vera identidade
  Chi distinghet una natzione
  unu populu mantened’unidu.
  
  Sena limba non b’at sovranidade,
  de onore non tenet portzione
  che cando mai b’esserat naschidu.

  
  

  
  

  Giuseppe Pintore *
• 
  Sa limba es timbru de sardidade,
  cando si pesat jara e sonora.
  ma tzelto cumpresu no an'ancora,
  e cheren jambare s'identidade.
  Si jaman sardos ma limbas de fora,
  sunu amiscende in veridade,
  istropiendela no si mezora,
  custu es sinnu de barbaridade.
  
  Che cando unu fizu no si curada,
  chi li manca s'afetu cun s'istima,
  podimos cumprender'ite figurada.
  
  Sa limba es pane de onni die,
  de mantennere est in s'alta chima,
  issa distinghede chie es chie.

  
  

  
  

  Francesco Masia .
• 
  

  Limba sarda cumposta dae dialettos
  in casteddu faeddana campidanesu
  e in Tathari su curiosu tattaresu
  in barbagia de nugoresu sun cumplettos
  in Ogliastra a su faeddu sun’attentos
  e in Tempiu su simpaticu cadduresu
  in Salighera s’ispagnolu catalanu
  e in Tula Logudoresu pius nostranu
  
  tottu cantos postos a cumone
  nd’è cumponene limba vera appretziada
  chi in su mundu non b’at paragone
  
  bene iscritta o carchi borta istroppiada
  onzunu si nd’è faghet opinione
  ma dai tottu cheret semper avvalorada..

  
  

  
  

  Lussorio Cambiganu 

  Chin s’ otada intradu
• Pustis unu soneto

  Como pro la finire in undighina
  Eo t’ apo saludadu
  Gosimu com’ iseto
  Versos bessidos de’ bona coghina
  Pone in fogu peta
  E sas rimas apreta
  Su modu ischirria tue o batorina
  Ma sempre in limba sarda
  Ebbai che colamus s’ ora tarda.
  
  
  
  

  • Cosimo Capra .
    
    

    Paret c’a talda ora
    Mi tocat de intrare
    De nou cun sas musas in cumbata.
    Una limba sonora
    cheria po cantare
    po la fagher bella o male fata.
    Che una cambiale
    fata bene o male
    ma a coa non la lasso sa rata.
    E la devo pagare
    A su ness’e ti poder cuntentare.

    
    
  • Cosimo Capra 
    
    

    Eu no ajjiu timori
    Di fa un’undicina
    Abà ti la focciu in gadduresu.
    No è di bon saori
    Ne di bona cucina
    Poeta no socu l’ai cumpresu.
    Ci piddemu lu custu
    Da chi no c’è arrustu
    A lu mancu lu fum’aemu presu
    E paldunam’ancora
    Ch’è una buruledda a talda ora.

    
    
  • 
    

    Paola Black ---
    
    

    A l'ies a Gosamu
    fenas in Gadduresu
    jughet totu sas Musas a sa soga,
    dae prima cun s'amu
    a s'esca fidi presu
    como s'isprendet e s'atza nde 'ogat;
    ma est una cadena 
    de fiores piena
    pro cuss' a sas Noe no las attogat...
    ...e anzis sun serenas
    cantan paris chin issu che sirenas...

sa metrica (Black - Canova - Capra - Pintore - Cambiganu)

Sa metrica

Paola Black

---
Poetas nachi b'ada
chin su metro in manu,
a mie paren peus de bechinos,
nos faghen mesurada
a chilu fitianu
chi paren comporend'in buteghinos,
a bissi cantu pesas
s'est bon' o no sa resa
de conc' a pes e fin'a sos butinos...
...ca t'ana preparadu
s'istire in antetzipu zincadu...

Francesco Canova *****

Sa poesia non'este mesurada
nemancu cun metro e ne livellu
cando su poeta faget'un'otada
ho puru faget'unu modellu
chilcat de lu fager meda bellu
sa poesia bene metricada
non servidi su metro pro misura
cando sos versos bessini de natura...

Cosimo Capra 

Paola non dispretzes
Ne metro ne misura
Sa metrica non mandes a tramontu.
Sas liricas caretzes
La tenes sa cultura
De sa metrica, bene l’as’in contu.
Cando chircas sas Musas
tue bene la usas
cun nemoso lu times su cunfrontu.
Lassami s’ironia
Ca metricada l’as sa poesia.

Giuseppe Pintore *

Non ponzas in sa bara
sa metrica solenne
cudda chi toca coldas de armonia.
Cura e dote rara
es bisonzu de tenne
musica suave a sa poesia.
No si pode fuere
o benit piuere
cantu s'animu a postu in bia.
Sa metrica in usu,
de mancu no nde chere ne piusu.

Lussorio Cambiganu 

Coment’ inzenieri
Su metro e sa misura
Sun pinzos de bisonzu naturale
Gai carabineri
De paga curtura
Pius che bene podet fagher male
Puru unu poeta
Pienat sa carreta
De lebiesa o de cuintale
Sa bella poesia
Est miscia tra ritim’ e fantasia

Paola Black ---

Cando chi su modellu
lu sighit su poete
pro estru e no pro custritzione
tando già lu est bellu
mancu nen prus bi nd' 'etet
gai l'essit bella sa funtzione
ca chie l'at detzisu
cussu sestu pretzisu
no fit nen tropu lanzu nen bentrone...
...si mastr' 'e pannu este
de apostizu, menzus mudu restet...

Lussorio Cambiganu

 Comente ‘onzi cosa
Sa fromma est sustascia
Cando su suzu est de cundimentu
Gai femin’ est rosa
Chi siat alt’ o bascia
Bastat chi apat bonu portamentu
Si est de bona lena
E de versos piena
Bi cheret musica et argumentu
Ma tue già l’ as cumpresa
Ses mastra ‘e poesia e d’ umilesa

Giuseppe Pintore 

Totu est a mesura
in sa vida terrena
chi sa vida matessi es medida.
Leade una figura
chi mirendel'apena
metru e giudisciu l'ischida
siat bonu o malu
in cue s'agualu
faghet po isperientzia e vida.
Metras in donni cosa
in poesia siat e in prosa.

Paola Black ---

A boltas sa mesura
est un' impedimentu
ch'inserrat in sa froma su sentidu
impresonàd' addurat
e frenat su talentu
cando chi fit liberu e pulidu
bos naro chi a boltas
menzus a rim' isolta
si cantat e cussolat su sidìdu...
...che abba de sos montes
falat a chea e trazat sos pontes...

Giuseppe Pintore

 Deo nde so siguru
s'arte poesiana
nde faghe derettas e pagu toltas.
no bat versu impuru
ca sa musa galana
cunfoltat a tie e la cunfoltas.
cun issa t'infiamas
ca l'odias e l'amas
siat rimas asadas che isoltas.
es nobile cumpagna
chi intrada sich'este in s'intragna.

Lussorio Cambiganu 

In versos ses lichita
Chena duda peruna
E de sos bonos tue nde faghes parte
No ses imparadita
A segus de nesciuna
De poesia as sa rima e s’ arte
Ma tue una ‘olta
As nadu rima isolta
No est pro te.. la tenes in disparte
Tando torra a mie
Metric’ e rima sun a geni’ a tie

Paola Black ---


M'ammento chi Esopu
iscritt'at unu contu:
su grodde disizad'at sa pabassa;
pr' ottennere s'iscopu
issu a brincos prontu
si pessat chi la tocat e l'abbassat,
s'abizada s'iscuru
no bi lompet seguru
e tando inub'este che la lassat...
...ca no b'est arrivìdu,
narat: "custu fruttu no est cumprìdu"...