Paola Black, Pintore, Cambiganu e Masia

 Paola Black 

In Casteddu, m'ant nadu,
b'at bon' un'oculista,
cumpetente, baratt'in sa pretesa:
chi ses mes'azzurpadu
ti torrada sa vista
in duas bisìtas e pag'ispesa;
chi s'est de bona luna,
nacch'est una fortuna:
sanat gratis sa pibirist' offesa...
...De s'istudiu sou
as bisonz' e de un'ozzale nou...

Lussorio Cambiganu 

Tue ti ses abbista
De cantu s’abilesa
In narrer est menzus de su fagher
S’abelta ‘e pibirista
Cussa chi fit ofesa
T’at fatu sa busciaca piangher
No est chistion’ e vista
Ma su dann’ e s’ispesa
Comente poder su ‘inari frangher
No ti nde fatas dolu
s‘inari no s’impitat a letolu

Paola Black ‎--- 

S' 'inare no est totu
eo l'appo cumpresa
peroe nos azzuat s'est presente,
c'a tie puru est notu
cando faghes ispesa 
chi neunu dat nudd'a su pezzente;
bon' o mala s'opera
s'inare s'adopera(t)
la deves pagare subitamente...
...s'iscuru chi' no nd'ada
addurat sena sa cura pagada...

Lussorio Cambiganu 

At esser beru su chi naras tue
in su bisonzu isse est padronu
ma si no b’ at salude a inue
andas pro gosare cussu donu
o puru s’istas semper fue fue
no as mai pasu e ne di’ e bonu
est solu in vida cunvinsciione
ch’ inare siat in domo padrone.

Paola Black ‎---

Beru: s'inar' est padronu malu
ma nos praghet su sou dominiu,
anzis de nd'esser isciaos galu
cherimos, sighinde s' abominiu;
est una dittadur' e bugginiu
no ischimos 'ue fagher iscalu...
...difizil' est su fissiu a perder
dae naschida fin'a nos isperder...

Lussorio Cambiganu

 Totu paret a isse rapportadu
Saludu, amore e ricchesa
Maleitu chi l’at inventadu
Nos at mente e amina presa
Cando s’omine s’est liberadu
De custa cadena d’ isciaesa
Podet narrer d’ aer agatadu
Su sensu de sa vida e sa bellesa.

Giuseppe Pintore ‎*

Sos ojos ti brillana,
de sole chelu e mare,
in die de beranu bella e jara.
Mi paret istillana,
solu a ti mirare,
una ermosura pro natura rara.
Sa tua simpatia
es che sa melodia,
chi sonat a sos coros tantu cara.
Ses amiru e recreu
valada nde pares de s'empireu.

Paola Black ‎--- 

Falada no nde soe
simmai nde so rutta
e firmada mi so in puntu bassu,
chi m'ant nadu sas Noe:
"leadi una frutta",
bettadu m'ant a zosso cun fragassu;
peroe rie rie
so innoghe, mi bie(s)
e mancu mi dispraghet custu zassu...
...Inie cascaviada,
ness'innoghe papp' e so attattada...

Francesco Masia

 Tue ses frisca che una rosa
e lughente cantu aurora mattutina
durche e letzera chei sa brina
e girontana che mariposa
in cumpantzia ses donosa
cà ses simpatica e carina
curres e giogas che leperedda
e ses fintzas una bella pisedda..

comente s’abba in gionedda
ses goduriosa e dissetante
che sirenetta incantante
e arrampicosa che cabrioledda
non ti trattentzas meda in nedda
cà ti faghede sa corte carchi bramante
cà custu logu nd’est impestadu
de latin lower assattanadu,