sa natura

Sa natura

Tue ses de  natura cuss’ arbore

 naschidu pro nde fagher   menzus usu

not est  unu penseri ne s’ abusu

chi ti cambiat chitza ne  colore

ses tue su sorrisu e su core

de vita  ses   su chilir’ e su fusu

chin tegus  s’ amore si b’ est  fusu

pro dare a su sermentu  unu fiore

Cando sa limba sarda at a mancare...

Cando sa limba sarda at a mancare...


^^^^^
Sa limba sarda sighit s’ avventura
ne pius ne mancu de antigos talentos,
no si faghet casu e ne cura
pessende de los aer in testamentos.
Sa veridade est chi pagu nos durat
si peldimus s’ aizu e sos ammentos,
cando a palas nos amus a boltare
at esser tropu taldu a los chilcare

Ite narran sos frutos de sa terra
chi naschen chena numenes locales,
tancados intro de una serra
chena sabore e totu uguales.
Seadas su mele no las ammerrat
ca no b’ at pius frores pro sas abes ,
totu paret chi siat dezisu
limba sabore e colore prezisu.

Sas ‘accas prima totu numenadas:
“Mare pienu, Amorosa e Deus che siat”,
como in sas istallas cunfinadas
isetan chi su manigu lis dian.
Paren dae sas frabbicas frommadas
no s’ ischit si sun mortas o sun bias,
no b’ at meidu pius de las truvare
sa pasculia no l’ ischin mastigare.

Erigà.. fit sa bogh’ e su pastore
pro truvare s’ elveghe e tota s’ ama,
mesulanedda de biancu colore
totu a numen una pro una giamat.
De picarolas, marrazos.. su rumore
s’ anzone chi belidat a sa mama,
sun sonos chi pienan d’ armonia
sas baddes e sos montes d’ idda mia.

Sos cantos e sos gosos de zilleri:
Cocera chin Ciddoi e Caltapedde,
sos contos chi si faghian deris
parian ch’ apaltenian a sa pedde.
Como no s’ ischit pius inue si ferit
inutile chi abboigh’ e nde faedde,
su mundu paret unu e restat gai
naran: “in segus no si torrat mai”

A Maria Teresa Pirrigheddu

A Maria Teresa Pirrigheddu

Boghe de sa Caddura ses ladina
Chi cantat ‘onzi fromma ‘e poesia
In re, chin sa chiterra t’est vicina
Sardigna tota canta: corte e bia
Tue de corsicana ses bighina
De logudoro e s’ anima mia
Sempre de cantu pienat sa mesa
De bella melodia .. Maria Teresa 

Su sole brillat

Su sole brillat

Narami tue, oe comente betat?
Sa die, su tempus e sos pensamentos,
Chissaghi calchi cosa bona fetat
malannos bòlen chei sos bator bentos.
Si ’ onzi caminera restat neta
Si ramadat de bonos sentimentos,
oe a sant’ Andria in die de tres
‘su sole brillat …solu si bi cres.

Comente bellu 'e vida

Comente  bellu 'e vida

Cando  luna  s’ aparit  luminosa

E sos isteddos  faghen  de corona

Apena tue  t’ aceras  frisca rosa

Totu  sa lughe leas de sa zona

Chie a tie bidet.. si nde gosat

E sos fastizos totu los perdonat

Sa note chi la rendes risplendente

Comente  bellu 'e vida..est  evidente. 

unu disizu solu..

unu disizu solu..  

Comente   cussu bote  in su calburu

Brincat  su tupon’ e sa padedda

Gai  est sa pascescia de seguru

Proada  dae  sa bulvure niedda

Nd’ an cumbinadu milli e unu puru

Chin  sa cusciescia semper pius niedda

Bennid’ est s’ ora  ‘e totu cambiare

Pro poder vida nostra  mezorare.

Bogamuche  dae ojos sa caratza

De  gosos  mudados  dae sas chimeras

S’ inari,  totu brujat che sa patza

E frazigat  sas richesas beras

No est cont’ esser menzus o de ratza

Ma  d’ aer  su chi  an fatu  sas eras

Sa limba,  una terra e natzione

Chi faghet de populu s’ unione.

Gai  dae cabu ‘e susu   a  Teulada

Totu podimus bene cumpaltire

Su sole, mare, terra e faeddada

Chena dever  dae fora pedire

Una  domo  comuna fraigada

Chi nos potat  impare retzire

A mancu ‘e bisonzu ‘e dever  bender

unu disizu solu..   ‘e la difender.

Antoni Pazzola .. in paghe et armonia

Antoni Pazzola.. in paghe et armonia sias

Accò Pazzò.. a ti l’ ammentas cando
Su 29 austu ‘e s’ ottantunu
In bidda de Patada, ti dimando:
“sos temas pius bellos cale sunu?”
Rispundesi: “eo cando mi nd’ ando”
Ispero de agatare “calecunu”
“chi de sa paghe e de s’ armonia”
Nde fatat sa menzus poesia.

Como chi cussa die l’ as giumpada
E in tempos eternos ses ‘intradu
Faghe a moda tua sa presentada

A santos totu in die festada

Sa paghe e s’ armonia as agatadu
Comente l’ as disizad’ in Patada